தமிழ் அகரமுதலிகள்

* ஆங்கில வழியத்தில் படித்து தமிழில் துறை சார் சொற்கள் அறியாதோர் பயன்படுத்த வேண்டியது தமிழ் இணையப் பல்கலை அகரமுதலி . இதனால், சொற்களைத் திரும்ப கண்டுபிடிக்கும் அசட்டுத்தனத்தையும் பொருத்தமற்ற சொற்களை புதிதாக உருவாக்கும் பிழையையும் தவிர்க்கலாம்.

*  இலக்கியத்தில் உள்ள பழங்காலத் தமிழ்ச் சொற்கள், போன சில நூற்றாண்டுகளில் தமிழில் புழங்கிய பிற மொழிச் சொற்கள் குறித்து அறிய  சென்னைப் பல்கலைக்கழக அகரமுதலி விலை மதிப்பற்ற ஒரு களஞ்சியம். 

வலைப்பதிவு (blog), திரட்டி (aggregator) போன்ற அண்மைய கால நுட்பங்கள், போக்குகளுக்கான தமிழ்ச் சொற்களை அறிய உள்ள ஒரே தளம் தமிழ் விக்சனரி மட்டுமே. அதில் இல்லாத சொற்கள் குறித்து கேட்க, தேவையான இடங்களில் புதுச் சொற்களை உருவாக்க, பழைய பொருத்தமற்ற சொற்கள் குறித்து உரையாட தமிழ் விக்சனரி உரையாடல் குழுமத்தில் சேரலாம்.

4. இந்த முறை நான் இந்தியா சென்று திரும்பிய போது வாங்கி வந்த ஒரே நூல் – க்ரியாவின் தற்காலத் தமிழ் அகராதி. சன்னதியா சன்னிதியா சந்நிதியா? கருப்பா கறுப்பா? சிகப்பா சிவப்பா ? அரைஞாணா அரைஞானா ? – போன்ற அடிக்கடித் தோன்றும் குழப்பங்களைத் தீர்த்துக் கொள்ள உதவும் நல்ல அகரமுதலி இது. இது போன்று அச்சடிக்கப்பட அகரமுதலிகள் இல்லாதோர் பலர், இந்தக் கேள்விகளுக்கான விடையை அறிய கூகுளில் கருப்பு-கறுப்பு என்று இரு சொல்லையும் இட்டு எது அதிகமான முடிவுகளைத் தருகிறதோ அதை சரியெனக் கருதுவது உண்டு. சில சமயம், இது சரியான முடிவுகளைத் தரும் என்றாலும், இது ஒரு பிழையான அணுகுமுறையாகும். மேலும் அறிய கூகுளுக்குத் தமிழ் தெரியாது பாருங்கள்.

விக்சனரி (பன்மொழி – தமிழ் இணைய அகரமுதலி)

கட்டற்ற பன்மொழி – தமிழ் – பன்மொழி அகரமுதலி ஒன்றை உருவாக்கும் முயற்சியாக 2004 முதல் தமிழ் விக்சனரி தளம் செயல்படுகிறது. டிசம்பர் 2008 நிலவரப்படி ஒரு இலட்சத்துக்கும் கூடுதலான சொற்களுக்கு பொருள் சேர்த்துள்ளோம்.

ஒரு சொல் பெயர்ச்சொல்லா வினைச்சொல்லா என்பது முதலிய குறிப்புகள், ஒரு சொல்லை எப்படி பயன்படுத்துவது என்பதற்கு எடுத்துக்காட்டுச் சொற்றொடர்கள், பலுக்கல் ஒலிக்கோப்புகள், பொருத்தமான படங்கள், அச்சொல்லுக்கான பிற மொழி விக்சனரி இணைப்புகள் ஆகியவை தரப்படுகின்றன.

நீங்கள் அறிய விரும்பும் சொல்லை Googleல் இருந்தே தேடலாம். எடுத்துக்காட்டாக, mosquito ஆங்கிலம் என்று தேடினால் கூகுளில் முதல் பக்கத்திலேயே விக்சனரிக்கான தொடுப்பு இருக்கும்.  தேடிய சொல் கிடைக்காவிட்டால், அதைச் சேர்க்குமாறு தளத்தில் தெரிவிக்கலாம்.  

ஏற்கனவே உள்ள பக்கங்களில் திருத்தங்கள் செய்யலாம். புதிதாக சொற்களைச் சேர்க்கலாம். ஒரு சொல்லின் பொருள் குறித்த ஐயம், ஆலோசனை இருந்தால் கலந்துரையாடலாம். பல பங்களிப்பாளர்களும் தொடர்ந்து தளத்தைக் கவனித்து வருவதால் பிழையான பங்களிப்புகள் உடனடியாக சரி செய்யப்படுவது உறுதி. எவரும் அவர் விரும்பிய வண்ணம் கட்டுப்பாடின்றி பங்களித்துப் பயன்படுத்துவதே விக்சனரியின் சிறப்பு. 

சொற்களுக்கான பொருளை நல்ல தமிழில் விளக்குவதால், தமிழில் கலந்துள்ள பிற மொழிச்சொற்களை இனங்காணலாம். கலைச்சொல்லாக்க முயற்சிகளுக்கான களமாகவும் விக்சனரி திகழும். தற்பொழுது ஆங்கிலம் – தமிழ் அகரமுதலியையே கவனிக்கிறோம் என்றாலும், பங்களிப்பாளர் திறன், அறிவைப் பொருத்து தமிழ் உள்ளிட்ட எம்மொழிச் சொல்லுக்கும் தமிழில் பொருள் தரலாம்.

தமிழ் விக்சனரி

இந்த நிரல்துண்டினை வெட்டி, உங்கள் தளத்தின் ஒரத்தில் இட்டு, விக்சனரி பற்றி விளம்ப வேண்டுகிறேன்.