Category: வலைப்பதிவு

Yahoo! Pipes, Google Reader இரண்டுமே தன் விருப்பத் திரட்டிகள் செய்ய உதவுகின்றன.

முதலில், திறம் வாய்ந்த Yahoo! Pipes கொண்டு நான் உருவாக்கிய திரட்டிகள் சில:

1. தமிழ்மணத்தில் எனக்குப் பிடித்த நான்கு துணை ஓடைகளை ஒன்றிணைக்கும் திரட்டி. இதே முறையில் தமிழ்மண ஓடைகளுக்குப் பதில் நம் விருப்பப் பதிவுகளின் ஓடைகள் அல்லது நம் பல்வேறு பதிவுகளின் ஓடைகளை ஓன்றிணைத்துக் கொள்ள முடியும்.

2. துறை வகைகள் போக, நாம் விரும்பாத பதிவுகள், விரும்பாத பதிவர்கள் ஆகியோரையும் ஓர் ஓடையில் இருந்து நீக்கிக் கொள்ளலாம். எடுத்துக்காட்டுக்கு, மகளிர் சக்தி திரட்டியில் இருந்து கலை என்ற பதிவரை மட்டும் விலக்கி நான் உருவாக்கி உள்ள ஒரு திரட்டியை இங்கு பார்க்கலாம். (இங்கு, கலை அவர்களை விலக்கி நான் உருவாக்கியது ஓர் எடுத்துக்காட்டுக்கு மட்டுமே. மற்றபடி, அவர் பதிவுகளை விரும்பிப் படிக்கவே செய்கிறேன்!).

இப்படி, வடிகட்டித் திரட்டிகள் உருவாக்க இயல்வதால், நமக்கு விருப்பமில்லா பதிவர்களை, பதிவுகளை நீக்கச் சொல்லி எந்த ஒரு திரட்டி நிர்வாகத்திடமும் முறையிட்டுக் காத்திருக்கத் தேவை இல்லை. அவர்கள் விலக்கும் வரை வேறு வழியின்றி அப்பதிவுகளைப் பார்க்க நேரிடவும் வேண்டாம். திரட்டித் தளங்கள் தாமே தன் விருப்பமாக்கல் வசதிகளைத் தரும் வரை இது போன்ற திரட்டிகளை நாம் உருவாக்கிக் கொள்ளலாம்.

3. தமிழில் செய்திகள்.

4. தமிழ் இணைய இதழ்கள்.

5. தமிழ்நாடு குறித்த ஆங்கிலச் செய்திகள்.

6. தமிழ் வலைப்பதிவுத் திரட்டிகளின் சங்கமம் – சில தமிழ் வலைப்பதிவுத் திரட்டிகளின் வலை சீர்தரங்களுக்குட்படாத ஓடை வடிவங்களின் காரணமாக, இத்திரட்டி அவ்வளவு திறம் வாய்ந்ததாக இல்லை. இது தொடர்பில் தமிழ்மணம், தேன்கூடு, தமிழ்ப்பதிவுகள் தளங்களுக்கு மின்மடல் இட்டிருக்கிறேன். அவர்கள் ஓடை வடிவம் மாற்றப்படும்போது, இத்திரட்டியின் திறமும் கூடும்.

இத்திரட்டிகளின் முகப்பில் இடப்பக்கத்தில் உள்ள view/edit pipe இணைப்பைப் பின்பற்றி இத்திரட்டியை படியெடுத்து நாம் விரும்பும் வண்ணம் ஓடை முகவரிகளை மாற்றி சேமித்துக் கொள்ள முடியும்.

Yahoo! Pipes தளத்தில் சற்று நேரம் விளையாடிப் பார்த்தால் அதன் சாத்தியங்கள் புலப்படும். ஏதேனும் உதவி தேவையென்றால் மறுமொழியில் கேளுங்கள்.

வலை 1.0, வலை 2. 0 என்றால் என்ன என்று இங்கு விளக்கி இருப்பதைப் பார்க்கலாம். Yahoo! Pipes போன்றவைகளை வலை 3.0 என்று கருத இயலும். இந்த வலை 3.0 என்னவென்றால், இணையத்தளங்களை வெறும் காட்சிப்படுத்தலுக்கான தளங்களாகக் கருதாமல் அவற்றில் இருந்து வேண்டிய தரவுகளைப் பெற்று நிரலாக்கத்தின் மூலம் நம் விருப்பப்படி பார்க்க இயல்வதாகும். இதை வலை நிரலாக்கம் (web programing) என்கிறார்கள்.

இனி, கூகுள் மூலம் திரட்டி செய்வது எப்படி என்று பார்ப்போம்.

தற்போது பலரும் அறிந்திருக்கும் மகளிர் சக்தி திரட்டி, கூகுள் மூலம் உருவாக்கப்பட்டது தான்.

1. Google Readerல் உங்கள் ஜிமெயில் கணக்கு விவரம் கொண்டு புகுபதியவும்.

2. உங்கள் விருப்பப் பதிவுகளின் முகவரியை Add Subscription என்ற பெட்டியில் ஒவ்வொன்றாக இட்டுச் சேர்த்துக் கொள்ளுங்கள். (திரைக்குறிப்பு a)

3. எடுத்துக்காட்டுக்கு, நீங்கள் குழந்தைகள் மட்டும் எழுதும் வலைப்பதிவுகளுக்கான திரட்டி உருவாக்குகிறீர்கள் என்று வைத்துக் கொள்வோம். இப்பொழுது, Manage Subscriptions (திரைக்குறிப்பு b) சென்று குழந்தைப் பதிவர்களின் பதிவுப் பெயர்களுக்கு அடுத்து இருக்கும் Add to folderஐத் தெரிவு செய்து New Folder->kids என்று பெயரிட்டுக் கொள்ளுங்கள். (திரைக்குறிப்பு c)

4. அதே பக்கத்தின் மேலே Tags என்று இருக்கும் இணைப்பைச் சொடுக்கிச் சென்று kids என்ற குறிச்சொல்லை privateல் இருந்து publicஆக மாற்றுங்கள் (திரைக்குறிப்பு d).

5. இப்போது, Add a clip to your site என்ற இணைப்பு வரும். அதைப் பின்பற்றி குழந்தைகளின் பதிவுகளை மட்டும் திரட்டும் திரட்டியை உங்கள் பதிவின் பக்கப்பட்டையில் இட முடியும் (திரைக்குறிப்பு e).

6. அதே பக்கத்தில் kidsகு அடுத்து View Public Page (திரைக்குறிப்பு f) என்று இருக்கும். அதைப் பார்வையிட்டால் உங்கள் kids திரட்டிக்கான ஓடை முகவரி (திரைக்குறிப்பு g) இருக்கும். அதைப் பெற்று உங்கள் நண்பர்களுக்குத் தரலாம்.

இதே போல் உங்கள் பதிவுகள் அனைத்தையும் குறிச்சொல்லிட்டு ஒன்றிணைத்துப் பொது ஓடை உருவாக்கி நண்பர்களுக்குத் தரலாம்.

அவ்வளவு தான் திரட்டி நுட்பம் !

—

அருஞ்சொற்பொருள்

தன் விருப்பத் திரட்டி – Personalised aggregator

ஓடை – Feed

வலை சீர்தரம் – Web Standard

தரவு – Data

நிரலாக்கம் – Programing

புகுபதி – Login

உங்கள் குரலை மட்டும் பதிய:

1. Audacity, LAME MP3 encoder ஆகிய இரு மென்பொருளைப் பதிவிறக்கி நிறுவிக் கொள்ளுங்கள்.
2. Audacity மென்பொருளைக் கொண்டு ஒலிப்பதியுங்கள். பதிந்த பின், file->export as-> MP3 சென்று உங்கள் பதிவை MP3 கோப்பாக மாற்றிக் கொள்ளுங்கள்.
3. ijigg.com சென்று ஒரு பயனர் கணக்கு உருவாக்கிக் கொண்டு உங்கள் MP3 கோப்பைப் பதிவேற்றுங்கள். அங்கு கிடைக்கும் embed codeஐ உங்கள் பதிவில் படியெடுத்து ஒட்டுங்கள்.

உங்கள் நண்பருடனான இணைய வழி உரையாடலைப் பதிய:

1. Skype பயன்படுத்தி உரையாடுங்கள்.
2 Powergramo பயன்படுத்தி அந்த உரையாடலைப் பதியலாம். பின்னர் அந்தக் கோப்பை audacity கொண்டு தொகுத்து, mp3ஆக மாற்றி, ijiggல் பதிவேற்றிக் கொள்ளுங்கள்.

அவ்வளவு தான் ஒலிப்பதிவு நுட்பம்!

தமிழ் வலைப்பதிவுகளை வாசிக்க தற்போது கூகுள் திரட்டி பயன்படுத்துகிறேன். இதனால் வந்த நன்மைகள்:

1. பிடிக்காத, தலைவலி தரும் வலைப்பதிவுகளை நாம் விரும்பாவிட்டாலும் பார்த்துத் தொலைக்க வேண்டியதில்லை. அவற்றை நீக்கச் சொல்லி யாருக்கும் எழுதிக் காத்துக் கொண்டிருக்கத் தேவை இல்லை.பிடித்த பதிவுகளை மட்டும் தான் சேர்த்துக் கொள்ளப்போகிறோம் என்பதால் பிடிக்காத பதிவுகளை நீக்கும் வேலை இல்லை.

2. எவ்வளவு நாள் ஆனாலும் நம் விருப்ப வலைப்பதிவுகளைத் தவற விடாமல் எளிமையாகப் படிக்கலாம்.

3. பின்னூட்டக் கயமையில் ஏமாந்து மொக்கைப் பதிவுகளைப் படிக்க வேண்டியதில்லை.

4. ஒவ்வொரு தளமாக சென்று பார்க்காமல் அனைத்து வலைப்பதிவுகளையும் ஒரே இடத்தில் முழுமையாகப் படிக்க முடிகிறது.

5. வலைப்பதிவுகள் மட்டுமல்லாமல் ஆங்கில, தமிழ் இணையத்தளங்களின் செய்திகளையும் கூட ஒரே இடத்தில் படிக்க முடிகிறது.

6. பதிவுகளை நாம் விரும்பும் துறை வரிசை, கால வரிசையில் படிக்க முடிகிறது.

7. அருமையான, எளிமையான தள இடைமுகப்பு. கூகுள் வழங்கியின் வேகம்!

மொத்தத்தில் நான் விரும்பிய பதிவுகள், தளங்களை நான் விரும்பும் வகையில் யாருடைய திணிப்பும் சார்பும் இல்லாமல் எளிமையாகப் படிக்க முடிகிறது. நான் எதைப் பார்க்க நேரிடும், படிக்கிறேன் என்பதை நானே தீர்மானிக்கிறேன்.

தமிழ்மணம் சில சமயம் வழங்கிக் கோளாறால் செயல் இழந்த போது, “கை, கால் ஓடவில்லை” என்று சொல்லும் அளவுக்கு சிலர் ஒரு திரட்டியைச் சார்ந்து இருப்பவர்களாக இருக்கிறார்கள். கூகுள் திரட்டி போன்ற தன்விருப்பத் திரட்டிகளை உருவாக்கிக் கொள்வது இதைத் தவிர்க்கும். Tamilblogs, தேன்கூடு, தமிழ்மணம் ஆகியவை தங்களிடம் இணைக்கப்பட்டுள்ள பதிவுகளின் முழுமையான விவரம் அடங்கிய OPML கோப்பை வழங்குவது நல்ல முன்மாதிரியாக இருக்கும். தற்போது தேன்கூடு இத்தகைய OPML கோப்பு வழங்குகிறது. ஆனால், இது முழுமையானதாகத் தோன்றவில்லை.

—

தமிழ்மணத்துக்கு என் புதுப்பதிவுகளை அனுப்பிக் கொண்டிருந்த போது இருந்ததற்கும், தற்போது எந்த ஒரு திரட்டியையும் சாராமல் வலைப்பதிவதற்கும் உள்ள வேறுபாட்டை எண்ணிப் பார்க்கிறேன்.

1. முன்பு தொடர்ந்தாற் போல் வரிசையாக இடுகைகளை இட மாட்டேன். காரணம், தமிழ்மண முகப்பில் ஒரு இடுகை மட்டுமே பெரிதாகத் தெரியும். அடுத்தடுத்த இடுகைகள் ஒரு வரி இணைப்பாக மட்டுமே தெரியும். இதனால், ஒரு இடுகைக்கு கிடைக்கக்கூடிய கவனத்தைக் குறைக்கக்கூடாது என்பதற்காக காத்திருந்து அடுத்த இடுகையை இடுவது வழக்கம். வார இறுதிகளில் இடுகைகளை இட யோசிப்பேன். காரணம், இந்நாள்களில் வாசகர் வரவு குறைவாக இருக்கும். அதையே திங்கள் கிழமை இட்டால் அதிகம் பேர் வருவரே என்று யோசிப்பேன். போலி டோண்டு, சல்மா அயூப் என்று தமிழ்மணப் புயல்கள் அடிக்கையில் நல்ல இடுகை போட்டால் காணாமல் போய் விடுமே என்று காத்திருந்திருப்பது உண்டு. இல்லை, நல்ல இடுகை போட்டாலும் போதிய கவனம் கிடைக்காதது போல் தோன்றும்.

சில சமயம் பின்னூட்டங்களையும் உடனடியாகவோ வரிசையாகவோ பதிப்பிப்பதில்லை. இதனால், அண்மையில் மறுமொழியப்பட்ட இடுகைகள் பட்டையில் இருந்து கிடைக்கும் கவனம் குறையும் என்பது காரணம். ஒரு வேளை 😉 பின்னூட்ட மழை பொழியும் பதிவாக இருந்திருந்தால், பின்னூட்டங்கள் 40 நெருங்குவது போல் தோன்றினால், நானே பின்னூட்டம் இட்டு கவனத்தை வீண்டிக்க வேண்டாமே என்று பின்னூட்ட உரையாடலை ஒரு செயற்கையான, வேகம் குறைவான, தொடர்ச்சியற்ற முறையில் கொண்டு சென்றிருப்பதற்கும் வாய்ப்பு உண்டு.

இப்பொழுது நினைத்த நாள், நினைத்த நேரம், நினைத்த வேகத்தில் வரிசையாக எந்த மனக்கட்டுக்களும், வாசகர் வருகை குறித்த மனக்கணக்குகளும் எதிர்ப்பார்ப்புகளும் இன்றி இடுகைகள், பின்னூட்டங்களைப் பதிப்பிக்கிறேன். ஒரு நாளுக்குத் துண்டுத் துண்டாக 50 இடுகைகள் இட்டாலும் ஏன் இப்படி செய்கிறாய் என்று யாரும் கேட்கப்போவதில்லை. முறையிடப் போவதில்லை. இதே தமிழ்மணத்தில் இணைந்திருக்கையில் செய்தால், தமிழ்மண வைரஸ் என்று முறையிடப்பட்டிருப்பேன்.

2. முன்பு, நல்ல இடுகை ஒன்று எழுதி இருப்பதாகத் தோன்றினால், அது பூங்காவில் வருகிறதா, வாசகர் பரிந்துரையில் வருகிறதா என்று பார்த்துக் கொண்டிருப்பேன். மெனக்கெட்டு கள்ள வாக்குகள் போடுவதும் உண்டு.

இப்பொழுது வலைப்பதிய மட்டும் செய்கிறேன். வீண் பரப்பு வேலைகளுக்கான உந்துதல் இல்லை.

3. புது பிளாக்கருக்கோ wordpressக்கோ பிற வலைப்பதிவு மென்பொருள்களுக்கோ மாறும் முன்னர் இதைத் திரட்டிகள் ஆதரிக்குமா என்று தயங்க வேண்டி இருக்கும். திரட்டி நிரல்களில் ஏதேனும் குறை வந்தால் அதை சரி செய்ய பொழுது வீணாகும்.

இப்பொழுது நினைத்த வலைப்பதிவு மென்பொருளில் எந்தத் தயக்கமும் இன்றி உடனடியாக வலைப்பதியலாம்.

4. தமிழ்மணத்தில் ஒரு பதிவை இணைக்கும் முன் பதிவு முழுக்கத் தமிழில் இருக்க வேண்டும், மூன்று பதிவுகள் இருக்க வேண்டும் என்று கட்டாயம் சில சமயம் தேவையற்ற ஒட்டுப் பதிவுகளை இட வைத்தது. தவிர, தமிழ்ப் பதிவில் நடுவில் ஆங்கிலத்திலும் எழுத முடியாது.

தற்போது, என் பதிவில் என்ன மொழியில் வேண்டுமானாலும் மாற்றி மாற்றி எழுதிக் கொள்ளலாம். யாருடைய ஏற்பும் அவசியம் இல்லை.

திரட்டிகளைச் சாராதிருக்கத் தொடங்கிய பின், நான் எதை, எப்படி, எங்கு, எப்போது, எவ்வளவு வலைப்பதிகிறேன் என்பதை நானே தீர்மானிக்கிறேன். ஒரு திரட்டியோ அதில் இணைந்துள்ள பிற வலைப்பதிவர்களின் போக்குகளோ இப்பொழுது என் வலைப்பதியும் போக்கைத் தீர்மானிப்பதில்லை. இது ஒரு வகையில் நுட்ப, மனக் கட்டற்றதாய், எனக்குப் பிடித்ததாய் இருக்கிறது 🙂

எல்லோருக்கும் இக்கட்டுக்கள் இருக்க வேண்டும் என்று அவசியமில்லை. ஆனால், புதிதாகவோ விவரம் தெரியாமலோ இருக்கும் பெரும்பான்மைப் பதிவர்கள் தங்களை அறியாமல் இக்கட்டுக்களை இட்டுக் கொள்ளும் வாய்ப்பு நிறையவே உண்டு.

என் கட்டற்ற கணினி, கட்டற்ற கலைக்களஞ்சிய, கட்டற்ற அகரமுதலி ஆர்வ வரிசையில் தமிழ்ச் சூழலில் கட்டற்ற வலைப்பதியும் / வாசிக்கும் வழக்கமும் ரொம்பவும் பிடித்ததாய் இருக்கிறது 🙂

நான் அண்மையில் விரும்பிக் கேட்ட பாடல்களை கீழே ஒலிபரப்புகிறேன். நீங்களும் இதுபோல் எளிதாக செய்யலாம்.

Get Your Own Hindi Songs Player at Music Plugin

மேலே உள்ள பாடல் பட்டியல் – உன்னைக் கண்டேனே (பாரிஜாதம்), உன்னாலே உன்னாலே (உன்னாலே உன்னாலே), காற்றின் மொழியே (மொழி).

இது போல் நீங்களும் பாடல்களை ஒலிபரப்ப,

1. http://www.musicplug.in செல்லுங்கள்.
2. ஒரு பயனர் கணக்கு உருவாக்குங்கள்.
3. நீங்கள் விரும்பும் பாடல்களுக்கு அருகில் உள்ள + குறியை அழுத்தி, ஒரு albumல் சேருங்கள்.
4. இப்பொழுது அந்த albumஐத் திறந்து பாட விடுங்கள்.
5. கீழ் வருவது போல் உங்கள் இயக்கியில் உள்ள embed code அருகில் உள்ள copy to clipboard என்ற பொத்தானை அழுத்தி, நிரலை பிளாக்கரில் ஒட்டி விடுங்கள்.

அவ்வளவு தான்..உங்கள் சொந்த juke box, radio mirchy, சூரியன் FM எல்லாம் தயார் 🙂

இந்த Musicplug.in தளத்தை அண்மையில் தான் கண்டுபிடித்தேன். இதன் சிறப்பியல்புகள்:

1. Raaga.comக்கு இணையான பாடல்களின் ஒலிப்புத் தரம்.
2. Raaga.comஐ மிஞ்சும் கவர்ச்சியான தள வடிவமைப்பு.
3. நண்பர்களுக்கு மின்மடலில் பாடல் அனுப்ப, இணைப்புகளை பகிர, இப்படி உங்கள் தளத்தில் இருந்து ஒலிபரப்ப என்று ஏகப்பட்ட வசதிகள்.
4. இந்தி, தமிழ், தெலுங்கு, கன்னட, மலையாள, பஞ்சாபி பாடல்கள்.
5. முக்கியமாக உயிரை வாங்கும் விளம்பரங்கள் இல்லை. Raagaவில் “ஊட்டுக்கு பணம் அனுப்புறியா, அனுப்புறியா”-னு ஒரு மேரி அக்கா கூவிக்கிட்டே இருக்கும் 🙂
6. பாடல்கள், பாடல் பட்டியல் தானாக திரும்பத் திரும்ப பாடும் வசதி.
7. புதிய, பழைய பாடல்கள் என்று நிறைய குவிந்திருக்கின்றன.
8. Realplayer தேவை இல்லை. Raagaவில் இது முக்கியத் தொல்லை.
9. லினக்ஸ், Firefox எல்லாவற்றிலும் பாடுகிறது. Raaga லினக்சில் மக்கர் செய்யும். Realplayer plugin போடு என்று அழும் !

தளத்துக்கு போய் பாட்டு கேட்டுப் பார்த்து சொல்லுங்களேன்..யார் கண்டார்? தமிழ்ப் பதிவுலகில் இதைத் தொடர்ந்து வானொலிப் பதிவுகள் வந்தாலும் வரலாம். வந்தாலும் நல்லா இருக்கும் தான்.

Raaga, 5 ஆண்டுகளுக்கு முன் எப்படி இருந்ததோ இப்பொழுதும் அப்படியே இருக்கிறது. நுட்ப அளவில் ஒரு மாற்றமும் இல்லை. Youtube போன்ற தளங்கள் நிகழ்படப் பகிர்வுகளை பரவலாக்கியது போல் இந்த தளமும் இந்தியப் பாடல் பகிர்வுகளை பரவலாக்கக் கூடும். கூடிய சீக்கிரம் இந்த தளம் Raagaவை ஏறக் கட்டி விடும் என்பது என் கணிப்பு. பார்க்கலாம்.

—
பி.கு.
1. இந்த இடுகையை நீங்கள் திறக்கும்போது தானாகவே பாடத் தொடங்கி விடும். இது போல் அல்லாமல் பயனர் விரும்பி பாட வைக்க musicplug நிரலில் autoplay=true என்பதை false என மாற்றிக் கொள்ளுங்கள்.
2. தமிழ்த் திரைப்பாடல்களை துல்லியமாக, எளிதாகத் தேட ஆன்ந்த் ஒரு நிரல் உருவாக்கி உள்ளார். தகவலுக்கு நன்றி, மு.கார்த்திகேயன்.

—

தொடர்புடைய இடுகை:

வலைப்பதிவில் ஒலிப்பதிவு இடுவது எப்படி?

வலைப்பூ, வலைப்பதிவு – இரண்டுமே blog என்பதற்கு ஈடான சொற்களாகப் புழங்குகின்றன. எது நல்ல சொல்?

இந்த இரண்டு சொற்களின் இளகுத் தன்மையையும் பார்ப்போம்.

வலைப்பதிவு

weblog – வலைப்பதிவு

blogger – வலைப்பதிவர்

blogging – வலைப்பதிதல்

blog (வினை) – வலைப்பதி.

blogger circle – பதிவர் வட்டம்.

blog world / blogdom – பதிவுலகம்

videoblog – நிகழ்படப்பதிவு / ஒளிதப் பதிவு

audioblog – ஒலிதப்பதிவு.

வலைப்பூ

weblog – வலைப்பூ

blogger – வலைப்பூக்காரர் ?? 😉

blogging – வலைப்பூத்தல் ?? 😉

blog (வினை) – வலைப்பூ பூ?? 😉

blogger circle – பூ வட்டம்?? 😉

blog world / blogdom – பூவுலகம் ?? பூந்தோட்டம் ??

videoblog – படப்பூ ?? 😉

audioblog – ஒலிப்பூ ?? 😉

புதுச் சொற்களை உருவாக்கும்போது வேர்ச்சொற்களிலிருந்தும் வினை சார்ந்தும் ஒரு சொல்லில் இருந்து பல சொற்கள் கிளைத்து வருவது போலவும் ஒன்றுக்கு ஒன்று தொடர்புடையதாகவும் தனிச்சொல்லாக இல்லாமல் சொற் தொகுதியாகவும் (word ecosystem) இருக்க வேண்டும் என்று மொழி அறிஞர்கள் வலியுறுத்துகிறார்கள்.

வலைப்பூ என்ற சொல்லில் உள்ள பெரிய குறை, வலை என்கிற முன்னொட்டை விட்டு விட்டு அதனால் செயல்பட முடியாது. தனித்து, பூ என்ற சொல்லை மட்டும் வைத்து சுருக்கமாக இந்த நுட்பம் குறித்து பேச முடியாது. வலைப்பூ என்பது தமிழ்மணம், தேன்கூடு என்று பூ சார்ந்த பெயர்களில் தளப்பெயர்கள் அமையத் தான் வழி வகுக்குமே தவிர வலைப்பதிவு நுட்பத்தை விவாதிக்க உதவாது.

வலைப்பதிவு என்பது வலுவான சொல்லாகத் தெரிகிறது.