Tag: தமிழ் இணையம்

தன் ஊரில் உள்ள தமிழார்வம் மிக்கவர்களுக்குத் தமிழ் வலைப்பதிவுகளை அறிமுகப்படுத்த விருப்பம் என்றும், ஆனால் தமிழ் வலைப்பதிவுகளின் தற்கால நிலைமை தன்னைத் தயங்கச் செய்வதாயும் நக்கீரன் எழுதி இருந்தார். இவரைப் போல் இன்னும் சிலரும் சில இடங்களில் எழுதக் கண்டிருக்கிறேன். இவர்கள் பலருக்கும் தமிழ் வலைப்பதிவுகளை அறிமுகப்படுத்த வேண்டும் என்பதைக் காட்டிலும் இணையத்தில் தமிழ் புழங்குவதை அறிமுகப்படுத்தித் தர வேண்டும் என்று விரும்புவதாகவே உணர்கிறேன்.

ஆனால், தமிழ் இணையத்தை அறிமுகப்படுத்த தமிழ் வலைப்பதிவுகளில் இருந்தோ அவற்றைத் திரட்டிக் காட்டும் தளங்களில் இருந்தோ தான் தொடங்க வேண்டும் என்று எந்தக் கட்டாயமும் இல்லையே? உண்மையில், தமிழ் இணையத்தில் தமிழ் வலைப்பதிவுகள், அவற்றின் வாசகர்கள் ஒரு சிறு பகுதி தான். வலைப்பதிவுகளைப் பற்றி அறியாமல் இயங்குவோரும், அறிந்தும் ஒன்றாமல் இயங்குவோரும் பலர். எனவே, தமிழ் வலைப்பதிவுகளின் நிலையை எண்ணி, தமிழ் இணையம் குறித்த அறிமுகத்தைத் தள்ளிப் போட வேண்டாம்.

சரி என்ன செய்யலாம்? சில அடிப்படையான இலகுவான வழிகள்:

– கணினியில் தமிழ் தெரியும், தமிழில் எழுதலாம் என்பதையே “அலாவுதீனின் அற்புத விளக்கில் இருந்து சீபூம்பா பூதம்” வந்த கதையாகப் பார்ப்பவர்கள் நிறைய இருக்கிறார்கள். அவர்களுக்குக் கணினியில் ஒருங்குறித் தமிழைப் பார்கவும் எழுதவும் கற்றுக் கொடுக்கலாம். பள்ளியில் தமிழ் வழியத்தில் படித்துப் பின் பொறியியல் பட்டப்படிப்பு முடித்து வலைத்தள வடிவமைப்பு நிறுவனம் நடத்தும் நண்பன் ஒருவன் “உடைந்து சிதறி கொம்பும் கொக்கியுமாகத் தெரியும் ஒருங்குறித் தமிழ் எழுத்துக்களை” அது தான் இயல்பு போல என்று எண்ணி சிரமப்பட்டுப் படித்துக் கொண்டிருந்தான்…இந்தக் கொடுமையை எங்கு போய் சொல்ல ? தமிழுக்கு இவ்வளவு தெரிவதே மேல் என்று நினைத்துக் கொள்கிறார்களோ??

– கூகுள், யாகூவில் தமிழில் தேடலாம்; தமிழில் மின்மடல் அனுப்பலாம், பெறலாம்; தமிழில் அரட்டை அடிக்கலாம் என்று பலருக்குத் தெரியாது. அதைச் செய்து காட்டுங்கள். பழைய யாகூ மெயிலில் தமிழ் படிக்க இயலாமல் தடவிக் கொண்டிருப்பவர்களைப் புதிய யாகூ மெயிலுக்கு மாறச் சொல்லுங்கள்.

– தமிழ் விக்கிப்பீடியா, தமிழ் இணையப் பல்கலைக்கழகம், மதுரைத் திட்டம், நூலகம் திட்டம், தமிழ் விக்சனரி போன்ற தகவல் ஆதாரங்களைச் சுட்டலாம்.

– தமிழ் பிபிசி, சீனத் தமிழ் வானொலி, ஒலி 96.8 போன்ற தரமான உலகச் சேவைகளைக் காட்டலாம்.

– தமிழ் செய்தித் தளங்களைப் படிக்கச் சொல்லலாம்.

– எழுத்தார்வம் இருப்பவர்களுக்கு வேர்ட்பிரெஸ் தளத்தில் வலைப்பதிவு தொடங்க உதவுங்கள்.

– விருப்ப வலைத்தளங்கள், வலைப்பதிவுகளின் செய்தியோடைகளைப் படிப்பதற்கு கூகுள் ரீடர் அறிமுகப்படுத்தலாம்.

– வலைப்பதிவுகளைக் காட்டிலும் மடற்குழுக்கள், குழுமங்கள், மன்றங்களில் உலாவுவது சிலருக்கு இலகுவாக இருக்கலாம். மட்டுறுத்தப்பட்டு நெறிமுறைகளுடன் இயங்கும் இத்தகைய பல நல்ல தமிழ்த் தளங்கள் உள்ளன. அவற்றை அறிமுகப்படுத்தலாம்.

சற்றுமுன்… செய்திச் சேவை வரும் பிப்ரவரி 15 அன்று முதல் பிறந்த நாளைக் கொண்டாடுகிறது. வாழ்த்துகள் !

சற்றுமுன்னின் சிறப்புகளாக நான் கருதுவன:

– 24 மணி நேரமும் இற்றைப்படுத்தப்படும் உலகளாவிய தமிழ் இணையச் செய்திச் சேவை.
– இயன்ற அளவு இனிய தமிழில் செய்தி, தள வடிவமைப்பு.
– வாசிப்பவர்களாலேயே எழுதப்படுகிறது. தமிழ் வலைப்பதிவுலகில் மிகப்பெரிய கூட்டுப் பதிவு இது தான் என நினைக்கிறேன்.
– வெகு மக்கள் ஊடகங்கள் ஆர்வம் காட்டாத செய்திகளுக்கு முக்கியத்துவம் தருவது. முக்கியமாக, இணையப் பயனர்களுக்கு ஆர்வம் ஊட்டக்கூடிய செய்திகளைத் தருவது. எடுத்துக்காட்டுக்கு, கூகுள் knol குறித்த செய்தி.
– தமிழகம், ஈழம் தவிர்த்து பிற நாடுகளில் வாழும் தமிழ் மக்களுக்கு ஆர்வம் ஊட்டும் செய்திகளையும் பகிர்ந்து கொள்வது.
– செய்திகளில் வில்லைக்காட்சிகள், நிகழ்படங்கள் தருவது.
– அறிவியல் இன்று போன்ற முயற்சிகள்.
– யாகூ, எம்எஸ்என், ஏஓஎல் எல்லாமே தமிழுக்கு வந்தாலும் ராசிபலன், அழகுக் குறிப்புகள், சமையல் குறிப்புகள்.. என்ற அலுக்க வைக்கும் வணிக மந்திரத்தை விட மாட்டேன் என்கிறார்கள். அவற்றுக்கு இடையே சற்றுமுன் வேறுபட்டு நிற்கிறது.
– முழுமையான செய்தி ஓடை தருவது.
– விளம்பரங்கள் இல்லாமல் / குறைவாக இருப்பது.
– தினத்தந்தி வகையறா இதழ்கள் ஒருங்குறிக்கு மாறாமல் இருக்கையில், அவற்றில் உள்ள முக்கியமான செய்திகளை ஒருங்குறியில் பெற்றுத் தருவது.
– வெகுமக்கள் செய்தி ஊடகங்கள் போல் அரசியல் / வணிக உந்துதல் இல்லாமல் இருப்பது.
– ஒரே செய்திகளுக்கான பல்வேறு இதழ்களின் தொடுப்புகளையும் ஓரிடத்தில் பார்க்கத் தருவது. இதை வேறு எந்த வணிகத் தமிழ்த் தளமும் செய்யும் என்று தோன்றவில்லை.
– இன்னும் சில செய்திப் பதிவுகள், கூட்டுப் பதிவுகள், இதழ்கள் போல் இல்லாமல் செய்தியோடு, அரசியல், சொந்தக்கருத்தைக் கலக்காமல் செய்தியைச் செய்தியாக மட்டும் தருவது.
– தமிழில் வெளிவராத செய்திகளையும் மொழிபெயர்த்துத்தருவது.

சற்றுமுன்னுக்கான வேண்டுகோள்கள்:

– பிற தளங்களில் இருந்து படியெடுத்துப் போடும் செய்திகளின் எண்ணிக்கையைக் குறைக்கலாம். அல்லது, செய்தியின் நீளத்தைச் சுருக்கி முழுச் செய்தியைப் படிக்கத் தொடுப்பு கொடுக்கலாம்.
– எந்தத் தமிழ்த் தளத்திலும் வெளிவந்திராத முக்கியத்துவம் வாய்ந்த செய்திகளை பிற தளங்களில் இருந்து மொழிபெயர்த்துத் தருவதை கூடுதல் முக்கியத்துவம் கொடுத்துச் செய்யலாம்.
– சற்றுமுன் வளர வளர வருகை எண்ணிக்கைகளுக்கு மயங்கி, “ரஜினி பேரனுக்கு மொட்டை அடித்தனர்” போன்ற செய்திகளைத் தராமல் இருப்பது.
– அரசியல் கலந்த கேலிச்சித்திரங்களைத் தவிர்ப்பது. தொடர்ந்தும் தளத்திலும் செய்திகளிலும் அரசியல் கலக்காமல் இருப்புத.

நான் சற்றுமுன் தளத்தில் செய்திகள் எழுதுவது இல்லை என்றாலும் தள பராமரிப்பில் பங்களித்து வருகிறேன். அந்த வகையில் வேர்ட்ப்ரெஸ் குறித்து நிறைய கற்றுக் கொள்ளவும் தூண்டுதலாக இருக்கிறது.

தொடர்ந்து சற்றுமுன்… வளர வாழ்த்துகள்.

ஏப்ரல் 2007ல் இணையத்தமிழ் உள்ளடக்க உருவாக்கத்துக்கு தமிழக அரசு செய்ய வேண்டியது குறித்து எழுதி இருந்தேன். அதை யாரும் பார்த்தார்களா தெரியாது 🙂 நேற்று கூட இதன் தேவை குறித்து தமிழ் விக்கிபீடியாவில் உரையாடினோம். நேற்று இரவே, தமிழ்நாட்டுப் பள்ளிப் பாடத்திட்ட நூல்கள் pdf வடிவில் இணையத்தில் கிடைக்கத் தொடங்கி இருப்பதை கண்டு அடைந்த மகிழ்ச்சிக்கு அளவே இல்லை.

http://www.textbooksonline.tn.nic.in/ என்ற முகவரியில் 1 முதல் 12 வகுப்பு வரைக்குமான பாடநூல்கள் தமிழ், ஆங்கிலம் இரு வழியிலும் கிடைக்கின்றன. இது ஒரு நல்ல தொடக்கம். அடுத்து, நாட்டுடைமையாக்கப்பட்ட நூல்களையும் இது போல் வெளியிட்டால் நன்றாக இருக்கும்.

இன்னும் செய்ய வேண்டியவை:

1. சில பாடநூல்கள் scan செய்து போட்டவை போல் தோன்றுகிறது. அப்படி இல்லாம முழுக்க மின்-நூலாகவே தந்தால் pdf கோப்புகளுக்குள் உரையைத் தேடிப் பார்க்க உதவும்.
2. ஒரே பாட நூலைச் சின்னச் சின்னப் பகுதிகளாகத் தந்திருப்பது வேகம் குறைவான இணைய இணைப்பு உள்ளவர்களுக்கு உதவும். அதே வேளை ஒவ்வொரு பாடநூலையும் ஒரே கோப்பாகவும், ஒரு வகுப்பின் பாடநூல்கள் அனைத்தையும் zip கோப்பாகவும் தந்தால் பதிவிறக்கி வினியோகிக்க உதவும்.
3. HTML பக்கங்களில் utf-8 குறியாக்கத்தில் தந்தால் தேடு பொறிகளில் இந்நூல்களின் உள்ளடக்கம் சிக்கும். இந்தத் திட்டத்தின் முழு வீச்சு, பலன் அப்போது தான் கிடைக்கும்.

சிவபாலனின் பதிவில் இதனால் என்ன பயன் என்று சர்வேசன் கேட்டிருந்தது வியப்பளித்தது. பலன்களாக நான் கருதுவன:

1. பாடப்புத்தகம் தாமதமாகும் போது இதில் பெற்றுக் கொள்ளலாம்.
2. பாடத்திட்டத்தில் திருத்தங்களை இங்கு உடனுக்குடன் வெளியிடலாம்.
3. cbse, matric முறையில் இருப்போர் தங்கள் பாடத்திட்டம் தவிர, பிற பாடத்திட்டங்களைக் கலந்தாலோசிக்க விரும்புவோர் அதற்காக காசு கொடுத்து புத்தகம் வாங்காமல் இணையத்தில் பார்க்கலாம். மாநிலப் பாடத்திட்டத்தில் முதல் பிரிவில் படிப்போர் கூட அடுத்த பிரிவின் முழுமையான தாவரவியல், விலங்கியல் பாடங்களைப் புரட்டிப் பார்க்கலாம்.
4. சென்ற ஆண்டுப் பாடங்களைப் பார்க்க விரும்புவோருக்கு உதவும்.
5. பிற மாநிலப் பாடத்திட்டக் குழுவுக்கு நம் பாடத்திட்டத்துடன் ஒப்பிட்டுப் பார்க்க முடியும். குறிப்பாகப், பிற மாநிலங்களில் தமிழ்ப் பாடம் நடத்துவோர் நம் பாடங்களைப் பார்த்துக் கொள்ள முடியும்.
6. இலங்கை, மலேசியா போன்ற நாடுகளில் முழுக்கத் தமிழ் வழியக் கல்வி பயில்வோர் நம்மோடு ஒப்பு நோக்கியும் ஒருங்கிணைந்தும் செயல்பட உதவும். கலைச்சொல்லாக்கத்தில் ஒத்திசைவு, பாடத்திட்ட இற்றைப்படுத்தத்துக்கு உதவும்.
7. புலம்பெயர்ந்த தமிழர், இந்தியாவில் பிற மாநிலத்தில் உள்ள தமிழர் தங்கள் பள்ளிப் பாடங்களைத் திருப்பிப் பார்க்கவும் தங்கள் குழந்தைகளுக்குத் தமிழ் கற்பிக்கவும் தமிழில் கற்பிக்கவும் உதவும்.
8. இணையத்தில் இது குறிப்பிடத்தக்க தமிழ் உள்ளடக்கம். பொழுதுபோக்கு, செய்திகள் தவிர தமிழில் தகவலுக்காகவும் இணையத்தை அணுகுவார்கள். பயனுள்ள உள்ளடக்கம் இல்லாமல் இணையத்தில் பயன் குறைவானதே.
9. என்னைப் போல் ஆங்கில வழியத்தில் பயின்ற பலருக்குத் தமிழில் கலைச்சொற்களைக் கற்க உதவும். விக்கிபீடியா போன்ற தளங்களில் கட்டுரை எழுதுவோருக்கு பெரிதும் உதவும்.
10. முக்கியமாக, தமிழ்நாட்டுப் பாடநூல் கழகத்தின் வெளியீடுகள் மக்கள் சொத்து. அது உலகில் உள்ள எந்த ஒரு தமிழனுக்கும் இலவசமாகக் கிடைப்பதாக இருப்பது மிகப் பொருத்தம்.

பி.கு – இத்திட்டத்துக்கு 50 இலட்சம் ஒதுக்கப்பட்டதாகத் தெரிந்து அதிர்ச்சியாக இருக்கிறது 🙁 scan செய்யாமல் இருந்தால் கூட ஏற்கனவே இந்தக் கோப்புகள் எல்லாம் நூலாக அச்சிடும் காரணங்களுக்காக இருந்திருக்கக்கூடியவை தானே? இணையத்தில் பதிவேற்றுவது மட்டும் தானே செய்யப்பட வேண்டி இருந்திருக்கும்…ஹ்ம்ம்..இலங்கையில் இருந்து இயங்கும் தன்னார்வல முயற்சியான நூலகம் திட்டம் மூலம் சுமார் இந்திய ரூபாய் ஒன்றரை இலட்சம் ரூபாய் செலவில் ஏறக்குறைய 1000 நூல்களை இணையத்தில் ஏற்றி இருக்கிறார்கள் !! செலவுக் கணக்கையும் பொதுவில் வைத்திருக்கிறார்கள் !!

—————————————
இந்தப் பதிவின் Feedburner ஓடையில் இருந்த வழு காரணமாக, பழைய இயல்பிருப்பு ஓடை முகவரியான http://blog.ravidreams.net/feed என்ற முகவரிக்கு ஓடை நகர்த்தப்பட்டுள்ளது. கூகுள் ரீடர் முதலிய திரட்டிகள் மூலம் இந்தப் பதிவைப் படித்து வருபவர்கள் ஓடை முகவரியைத் தயவு செய்து திருத்திக் கொள்ளவும். நன்றி.

சென்னை வலைப்பதிவர் பட்டறை திட்டமிடப்பட்டது எப்படி?

989 மடல்கள். இரண்டு மாத உழைப்பு, திட்டமிடல். நூற்றுக்கணக்கில் தொலைபேசி உரையாடல்கள். ஒவ்வொரு வாரமும் பட்டறை குறித்த திட்டமிடலுக்கான நேரடி சந்திப்புகள். அரங்கத்தை இறுதி செய்வது, குறுந்தகடு, நூல் அச்சிடல் வேலை என்று இவற்றுக்காக குறைந்தது 15 மனித உழைப்பு நாட்களாவது செலவு இடப்பட்டிருக்கும். இவற்றின் விளைவாகத் தான் பதிவர் பட்டறை சாத்தியமானது.

மே 20, 2007 கோவை வலைப்பதிவர் பட்டறை முடிந்து ஒரு வாரத்தில் இதற்கான திட்டமிடல் தொடங்கி விட்டது. நுட்பத்தை முன்னிறுத்தி பட்டறை நடை பெற வேண்டும் என்ற ஒத்த நோக்கும் புரிந்துணர்வும் உள்ள நண்பர்களான பாலபாரதி, பொன்ஸ், விக்கி, icarus பிரகாஷ், மா.சிவகுமார் ஒன்று கூடினோம். தொடர்ந்து ஆர்வம் காட்டிய லக்கிலுக், சிந்தாநதி எங்களுடன் இணைந்து கொண்டார்கள். இதற்கான ஒரு கூகுள் குழுமம் உருவாக்கப்பட்டது. இன்றோடு அதில் 989 மடல்கள். திட்டமிடல் வரிசை:

1. நிகழ்வு நாள் எல்லாரும் கலந்து கொள்ளத் தக்க விடுமுறையான ஞாயிறாக இருக்க வேண்டும். நிகழ்வு குறித்த விழிப்புணர்வு பரவ 2 மாதமாவது அவகாசம் வேண்டும்.

2. அரங்கம் எல்லாராலும் எளிதாக அடையத்தக்கதாக இருக்க வேண்டும். இணைய, கணினி வசதி உள்ள வகுப்பறைகள் அருகில் இருக்க வேண்டும்.

3.அரங்கையே இலவசமாகப் பெற வேண்டும். வாடகை அரங்குகள் செலவே 30, 000 ரூபாய் பிடிக்கலாம். நன்கொடையில் நடத்தும் நிகழ்வுக்கு இது கட்டுபடியாகாது. கல்லூரி, பள்ளி, பல்கலைக்கழகம் ஆகியவற்றில் நடத்தினால் அவர்களின் ஒத்துழைப்பும் நிகழ்வுக்கு அங்கீகாரமும் கிடைக்கும். இந்த அடிப்படையில் ஜூன் மாதப் பாதியிலேயே சென்னைப் பல்கலைக்கழக அரங்கு அமைந்தது.

4. பணிகளைப் பிரித்து கொண்டோம்.

பதிவர்களுடனான தொடர்பு, ஒருங்கிணைப்பு – பொன்ஸ்.

ஊடகங்கள், ஆதரவாளர்கள் தொடர்பு – விக்கி, மா.சி, பிரகாஷ்

நிதி நிர்வாகம் – பாலபாரதி, மா.சி

உள்ளடக்கம் – மா.சியும் நானும்.

குறுந்தகடு, பை, banner, கணிச்சுவடி அச்சிடல், சாப்பாடு உள்ளிட்ட logisitics – பாலபாரதி, லக்கி லுக்

banner, bit notice, logo, cd cover உள்ளிட்ட அனைத்து design பணிகள் – லக்கி லுக், சிந்தாநதி

CD உருவாக்கம் – நந்தா, ப்ரியன்

பதிவு, தளம் ஒருங்கிணைப்பு – விக்கி, நான். (விக்கி மென்பொருள், wordpress தான் நமக்கு பிடிச்ச விசயமாச்சே 🙂 )

ஒவ்வொருவரின் பொறுப்பும் வேலைகளில் உள்ள முன்னேற்றமும் தினமும் மடலாடற்குழுவிலும் அதற்கான கூகுள் docsலும் ஆவணப்படுத்தப்பட்டது.

இணைய வழித் தொடர்பில் இருந்தவர்கள் பெயரை மட்டும் குறிப்பிட்டிருக்கிறேன். நேரடியாக வராததால் களத்தில் பங்காற்றிய இன்னும் பலரின் உழைப்பை குறிப்பிடாமல் விட்டிருக்கிறேன்.

5. ஏற்கனவே பதிபவர்களுக்கு unconference தலைப்புகள். புதிதாக வருபவர்களுக்கு தலைப்பு வாரியாகப் பயிற்சி அறை. வகுப்பு, பாடம் இல்லாமல் பொறுமையாகப் பயில ஒரு அறை. எல்லாரும் ஒரே நிகழ்ச்சி நிரலைப் பின்பற்றாமல் விரும்பிய தலைப்புகளில் கலந்து கொள்ளும் வகையில் இப்படி திட்டமிடப்பட்டது.

கொள்கைகள்

தமிழ் வழி செயல்பாடு – மடல் உரையாடல். நிகழ்வு முழுக்க தமிழில்.

பட்டறைக்கான சின்னம் முதலில் blog camp என்பதைக் குறிக்கும் வண்ணம் ஆங்கிலத்தில் இருந்தது. தமிழர் தமிழுக்காக நடத்தும் நிகழ்வில் ஆங்கிலம் எதற்கு என்று உணரப்பட்டு பின் தமிழில் வடிவமைத்தோம்.

தமிங்கிலத் தட்டச்சைக் காட்டிலும் திறமான தமிழ்99 முறையை முன்னிறுத்திப் பயிற்சி அளிப்பது.

திறவூற்று ஆதரவு – குறுந்தகட்டில் உள்ள மென்பொருள்கள் எல்லாம் திறவூற்று மென்பொருள்கள்.

நிதி மேலாண்மை – வரவு, செலவுக் கணக்குளைப் பொதுவில் வைத்தல். பட்டறை ஒருங்கிணைப்பாளர்களின் மீதான நம்பகத்தன்மைக்கும் திறந்த செயல்பாட்டுக்கும் இது அவசியம். நன்கொடை பணம் மீதமானால் அதையும் அடுத்து வரும் பட்டறை, கணித்தமிழ் வளர்ச்சிக்காகப் பயன்படுத்துவது.

ஆடம்பரம் குறைப்பு – தரமான உணவு ஆனால் நியாயமான செலவில். பட்டறைக்கான டி-சட்டை அடிக்கலாம் என்று யோசித்தோம். ஆனால், அதிகம் பயனில்லாத டி-சட்டையை விட அந்தச் செலவில் இன்னொரு பட்டறையே நடத்திவிடலாம் என்று அந்த எண்ணத்தைக் கை விட்டோம்.

ஆதரவாளர்கள் – தனி நபர்களே எந்த எதிர்ப்பார்ப்பும் இன்றி பெயரைக் கூட வெளிக்காட்டிக் கொள்ளாமல் ஆயிரக்கணக்கில் நன்கொடைகளை அள்ளி அள்ளி வழங்கும்போது, அவர்களுக்கு உரிய மரியாதை தரும் வகையிலேயே ஆதரவாளர்களைப் பெற்றுக் கொண்டோம். வணிக நோக்குக்காக 1,000 அல்லது 2,000 கொடுத்து கடை விரிக்க நினைத்தவர்கள், விளம்பரத் தட்டி வைக்க விரும்பியவர்களை வரவேற்கவில்லை. பட்டறை எங்கும் விளம்பரங்களாக நிறைந்து பொருட்காட்சி போல் ஆகி விடக்கூடாது என்பதில் உறுதியாக இருந்தோம். பணமாகப் பெற்றுக் கொள்வதை விட புத்தகம் அச்சிடல், அரங்கு உதவி, வாடகைக் கணினி என்று பொருளாகப் பெற்றோம். இதன் மூலம் நிகழ்வில் அவர்களும் அங்கமாக உணர முடியும் அல்லவா? தமிழ் எழுது மென்பொருள்கள் விற்கும் நிறுவனம் ஒன்று அணுகியது. இலவச எ-கலப்பை இருக்க காசு கேட்டு விற்கும் மென்பொருள்களை ஆதரிக்கக்கூடாது என்று அவற்றைத் தவிர்த்து விட்டோம்.

இயன்ற அளவு திறந்த திட்டமிடல் – யார் என்ன தலைப்பில் பேசப் போகிறார்கள், எப்படி நிகழ்வு நடக்கப்போகிறது என்பதைக் கூகுள் குழுமங்கள், பதிவு இடுகைகள், தளம் மூலம் இயன்ற அளவு திறந்த முறையில் திட்டமிட்டோம்.

இலவச அனுமதி – காசு இல்லை என்ற ஒரே காரணத்துக்காக யாரும் நிகழ்வில் கலந்து கொள்ளாமல் போய் விடக்கூடாது. காசு கட்டி தான் கலந்துக்கணுமா என்ற அலட்சியமும் சலிப்பும் எவருக்கும் வரக்கூடாது. கணினிப் பயன்பாடும், கணினியில் தமிழும் பரவ வேண்டும் என்றால் இது போன்ற விசயங்களை இலவசமாகவே சொல்லிக் கொடுக்க வேண்டும் என்று நினைத்தோம். நாம் அறிந்ததை இன்னொருவருக்கு சொல்லித் தந்து உதவ கட்டணம் தேவை இல்லை தானே?

பட்டறையின் முக்கியத்துவம்:

எனக்குத் தெரிந்து,

இந்திய மொழிகளில் வலைப்பதிவு, கணிமை ஆகியவற்றில் இவ்வளவு பெரிய அளவில் மக்களை ஒன்றுகூட்டிய முதல் மொழி தமிழ் தான்.

எந்த ஒரு வணிக நிறுவனமோ அமைப்போ இதை நடத்த வில்லை. மக்களால் மக்களுக்காக மக்கள் பணத்தில் செய்யப்பட்ட நிகழ்வு. பொதுவாக ஒரு நிகழ்வை எப்படி இணைய வழி ஒருங்கிணைப்பது, திறந்த முறையில் திட்டமிடுவது, பெறும் நன்கொடைக்கு எப்படி நம்பகத்தன்மையை உறுதி அளிப்பது என்பதற்கு இது ஒரு முயற்சி.

ஆன்மிகம், இலக்கியம், சமையல், ஜோசியம், பட்டிமன்றம், திரைப்படம் என்ற அலுத்துப் போன வட்டத்தைத் தாண்டி நிகழுலக நவீனத் தேவைகளுக்காக தமிழை முன்னெடுத்து இருக்கிறோம். நுட்பத்தை மக்களின் தாய்மொழியிலேயே சொல்லித் தர முடியும். அது இன்னும் இலகுவாகப் போய்ச் சேரும் என்பதற்கு இது எடுத்துக்காட்டு.

பட்டறையில் கலந்து கொண்டவர்கள், நடத்தியவர்கள் அனைவரும் இளைஞர்கள். வழக்கமாக வயது கூடியவர்கள் தான் தமிழ் சார்ந்த நிகழ்வுகளில் ஒருங்கிணைப்பார்கள். இளைஞர்களுக்குத் தமிழில் ஆர்வம் இல்லை என்று யார் சொன்னது? 🙂

நிகழ்வில் பங்களித்தவர்களில் பலர் சமூகத்தின் உயர்தட்டு வர்க்கத்தில் இருப்பதாகப் பார்க்கப்படும் கணினி தொழிற்துறையினர். பணமும் நுனி நாக்கு ஆங்கிலமும் உலகப் பார்வையும் வந்தாலும் தமிழார்வமும் சமூக அக்கறையும் குன்றத் தேவை இல்லை என்பதற்கான அத்தாட்சி.

சமயம், சீரழிவில் இருந்து மீட்பு, கல்வி, மருத்துவம், போர்ச்செலவு, ஊர் வளர்ச்சி ஆகியவற்றுக்கே இது வரை மக்கள் நன்கொடை அளித்திருக்கிறார்கள். மொழிக்காகவும் நன்கொடை அளிப்பார்கள், அளிக்க வேண்டும் என்பதை உணர்த்தியிருக்கிறோம்.

“அவையில் கூடி இருக்கும் ஆன்றோர்களே, அவரே, இவரே, பெரியோரே, தாய்மாரோ” போன்ற கல் தோன்றா காலத்து சம்பிரதாயங்களை மூட்டை கட்டி unconference முறையைப் பயன்படுத்தி இருக்கிறோம்.

இணைய வழி ஒருங்கிணப்பு, இயன்ற அளவு திறந்த திட்டமிடல்.

பட்டறையின் கொள்கைக்கு உடன்படும் விளம்பரதாரரைப் பெற்றுக் கொள்ளுதல். 🙂

கணினி என்றாலே ஆங்கிலம் தானோ என்ற எழுதப்படாத mythஐ உடைக்க முயலுதல்.

தமிழ் வலைப்பதிவுலகுக்கு முதல் பெரிய ஊடக வெளிச்சம்.

அடுத்து என்ன?

ஒரு நிகழ்வின் முதல் வடிவத்தைக் கொண்டு வர தான் உழைப்பு அதிகம் தேவைப்படும். ஒரு நாள் பட்டறை என்பதற்காக இவ்வளவு மெனக்கடவில்லை யாரும். இது ஒரு இயக்கம் போல் தமிழ்நாடு எங்கும் பரவ வேண்டும் என்பது தான் எங்கள் ஆவல். அடுத்த பட்டறையை நடத்துபவர்களுக்கான என் பரிந்துரைகள்:

– தனி ஆளாக இறங்காதீர்கள். தனி ஆளாக செய்யாதீர்கள். செய்யவும் இயலாது. தவிர, திறந்த முறையில் செய்வதால் – இது நம்ம விழா – என்று உணர முடிவது சிறப்பு. இந்த உணர்வைத் தொடரச் செய்வது உங்கள் பொறுப்பு

– அரங்கம் வைத்து பெரிய அளவில் செய்ய வேண்டும் என்று தான் இல்லை. செலவும் அதிகம். உளைச்சலும் அதிகம்.

– குறுந்தகடு, கணிச்சுவடி என்று எல்லாம் தயாராக இருக்கிறது. அதற்காக மெனக்கடும் வேலை மிச்சம். ஒரு அரங்கம், பயிலகம், வாடகைக்கணினிகள், நுட்பம் அறிந்து உதவ விவரமான ஓரிரு பதிவர் இருந்தால் பட்டறையை எளிதாக நடத்தலாம். ஒவ்வொரு பயிற்சிக்கும் ஒரு பதிவர் என்று தேவை இல்லை. நான்கைந்து பயிற்சிகளை ஒரே பதிவரே தந்து விடலாம். குறுந்தகட்டில் சில பயிற்சிகளின் நிகழ்பட விளக்கமும் உண்டு. அதையும் பயன்படுத்திக் கொள்ளுங்கள்.

– அடுத்த பட்டறைகளில் பயிற்சி வகுப்புகள் அதிகமாக இருக்கட்டும். ஆண்டுக்குப் பல முறை கூடி வலைப்பதிவு பற்றி unconferenceல் உரையாடுவதால் பயனில்லை. கலந்துரையாடல்கள் கூடிய நிகழ்வை ஆண்டுக்கு ஒரு முறை பெரிய அளவில் செய்யலாம். திட்டமிடலுக்குப் போதிய அவகாசமும் கலந்து கொள்ள முன்னணிப் பதிவர்களுக்குத் தூண்டுகோலாகவும் இருக்கும். அடிக்கடி பட்டறை என்றால் ஊடக வெளிச்சமும் குறையும். பதிவர் ஆர்வமும் குறையும். போதிய இடைவெளி வேண்டும். வெளிச்சம் இடாமல் பதிவர் அல்லாத பொதுமக்கள், மாணவர்களுக்கு அடிக்கடி நடத்தலாம். வலைப்பதிவுக்கான பட்டறை என்பதைக் காட்டிலும் கணினி, இணையத்தில் தமிழ் குறித்து வலைப்பதிவர்கள் நடத்தும் பட்டறையாக இருந்தால் நன்றாக இருக்கும். பட்டறையின் ஒரு பகுதியாக வலைப்பதிவை அறிமுகப்படுத்தலாம்.

– இதற்காகப் பதிவர் சங்கம் பதிவது என்று இறங்கினால் ஏகப்பட்ட அரசியல், நடைமுறைச் சிக்கல்கள் உண்டு. இப்போது உள்ளது மாதிரி ஆர்வலரே கூடி செய்யலாம். அது இறுக்கத்தைக் குறைக்கிறது. பலரின் பங்களிப்பை அளிக்கிறது.

– blogger, தமிழ்த்திரட்டி என்ற வட்டத்தில் இல்லாமல் wordpress, google reader போன்றவற்றையும் அறிமுகப்படுத்துங்கள்.

– தயவு செய்து தவறான தமிங்கிலத் தட்டச்சைப் பரப்பி விடாதீர்கள். சரியான முறையைச் சொல்லிக் கொடுப்பது நம் கடமை. தமிழ்99 முறையில் தமிழ்த் தட்டச்சைச் சொல்லித் தாருங்கள்.

Tamilbloggers.org

தற்போது தமிழ் வலைப்பதிவுலகத்துக்கான அதிகாரப்பூர்வ புள்ளிவிவரத் தளம் இல்லை. தமிழ்மணம் முதலிய திரட்டிகள் இருந்தாலும் அவை நிறுவன மயப்படுத்தப்பட்டுள்ளதால் அவற்றின் பெயரை நாம் பயன்படுத்தி ஆதரவாளர்களைத் தேட முடியாது. ஆதரவாளர்களுக்கு நம் பலத்தைக் காட்ட, இது போன்று நடவடிக்கைகளுக்கு ஒரு களம் தேவை. இதை முன்னிட்டு Tamilbloggers.orgப் பலப்படுத்துவது நல்லது.

ஒவ்வொரு வலைப்பதிவு வாசகர், பதிவரும் இந்தத் தளத்தில் பயனர் கணக்கு உருவாக்கினால் எத்தனை பேர் வாசிக்கிறார்கள், எழுதுகிறார்கள் என்று தமிழ் வலைப்பதிவுலகத்தின் பரப்பை அளவிட முடியும். தமிழ் வலைப்பதிவர் உதவிப் பக்கத்தை இங்கு நகர்த்தலாம். தமிழில் கணினி, பதிவு குறித்து விளக்க, உரையாட இங்கு ஒரு மன்றம் அமைக்கலாம். வலைப்பதிவு தொடர்பான உதவிக் கட்டுரைகளை விக்கிப்பக்கங்களில் தொகுக்கலாம்.

இந்தத் தளம் பதிவர்களின் கட்டுப்பாட்டில் இருப்பதாக பதிவர்களின் நலனை முன்னிறுத்திச் செயல்படுவதாக இருக்கும். அரசியல் புகாமல் நுட்பம் பேசும் இடமாக இருக்கும். ஒரு வலுவான தளத்தைக் கட்டி எழுப்ப முடியும் என்றால் அதைச் சுட்டி ஆதரவாளர்களைப் பெற முடியும். தளத்தில் விளம்பரங்களைப் பெற்று வெளியிட்டால் அதுவே கூட அடுத்தடுத்த பட்டறைச் செலவுகளுக்கு உதவும். நன்கொடை முறை நன்று தான் என்றாலும் கூடுதலாக எவ்வளவு பொருள் ஈட்ட முடியுமோ ஈட்டி அவற்றைப் பதிவுலக மேம்பாட்டுக்காகப் பயன்படுத்திக் கொள்ள வேண்டும்.

நேரடியாகக் களத்தில் இருந்து செயல்பட்டவர்களுக்கும் தொடர்ந்து இந்த முயற்சியை முன்னெடுக்க இருப்பவர்களுக்கும் வாழ்த்துக்கள்.

நான் அறிந்த சில இணையத் தமிழ் நுட்ப ஆர்வலர்கள் பெயரைப் பதிந்து வைக்கிறேன்.

(எந்த வரிசையிலும் இல்லை)

1. முகுந்த் – தமிழா! அமைப்பின் முனைப்பான பங்களிப்பாளர்களில் ஒருவர். இவர் உருவாக்கிய எ-கலப்பை பல தமிழர்கள் கணினியில் எளிதாகத் தமிழ் எழுத உதவுகிறது.

2. மாகிர் – தமிழூற்று – தமிழர்களின் அறிவுச் சுரங்கம் என்ற பெயரில்  தமிழிணையம் சார்ந்து பல நுட்பப் பணிகள் ஆற்றி வருகிறார். தமிழ் இணையத்தளங்கள், வலைப்பதிவுகள், விக்கி இயக்கங்கள் தொடர்பில் பயனுள்ள தேடு கருவிகள், வழிகாட்டுக் கருவிகள் உருவாக்கி உள்ளார்.

3. கோபி – இந்திய மொழிகள் பலவற்றுக்குமான ஒருங்குறி எழுது கருவிகள் செய்திருக்கிறார். இது தவிர, பல பயனுள்ள தமிழ் சார் Firefox நீட்சிகள் செய்து தந்திருக்கிறார்.

4. ஜெகத் – இனியன் என்ற பெயரில் இந்திய மொழிகளுக்கான தமிழ் எழுத்துப் பெயர்ப்புக் கருவியைத் தனி உழைப்பில் கொண்டு வந்திருக்கிறார்.

5. Voice on Wings – முகுந்த், கோபியுடன் இணைந்து Firefox தமிழ்விசை நீட்சியின் உருவாக்கத்தில் பங்கு வகித்தவர். விக்கிப்பீடியா, வலைப்பதிவுகள் தொடர்பான Firefox நீட்சிகளையும் உருவாக்கி இருக்கிறார். இவரது அண்மைய உழைப்பு – மாற்று!.

6. மயூரன் – தமிழில் கட்டற்ற முயற்சிகள் எங்கிருந்தாலும் அங்கு மயூரனும் இருப்பார்! தமிழ் லினக்சு, தமிழ் உபுண்டு, தமிழ்க் கணிமை குழுக்களில் இவரது ஈடுபாடு பலரும் அறிந்தது.

7. காசி – தமிழ் வலைப்பதிவுகள் பெருகத் தொடங்கிய போது அவற்றைக் காட்சிப்படுத்தி, கூடிய வாசக வெளிச்சம் கிடைக்க உதவியாகத் தமிழ்மணம் திரட்டியை உருவாக்கினார்.

8. சுரதா – தமிழிணையக் கருவிகளுக்கு இவர் உருவாக்கிய சுரதா தளம் ஒரு களஞ்சியம் போல். இவருடைய சுரதா ஒருங்குறி எழுதி, பொங்குதமிழ் கருவிகளைப் பயன்படுத்தி இராதவர்கள் மிகக் குறைவே.

9. மறைந்த உமர் தம்பி அவர்கள் – இவரது உழைப்பும் உணர்வும் கோபி, மாஹிர் போன்ற பலரையும் தூண்டி விட்டது பெரும் சிறப்பாகும்.

10. மறைந்த சாகரன் என்னும் கல்யாண் – தேன்கூடு, பெட்டகம் என பல நல்ல இணையத்தளங்களை உருவாக்கினார். ஆனால், இவரது மறைவுக்குப் பிறகு இம்முயற்சிகளும் மறைந்தது சோகம்.

11. சிந்தாநதி – பல தமிழ் இணைய முயற்சிகளில் பின்னணியில் இருந்து செயல்பட்டு ஊக்குவித்தவர். இவரது அகால மறைவு பெரும் இழப்பு.

12. முனைவர் A. G. Ramakrishnan – இவரது குழுவினர் தமிழில் எழுதிய உரையைப் பேச்சுக்கு மாற்றும் செயலியைக் கண்டுபிடித்துள்ளனர்.

13. K. S. Nagarajan – NHM writer, NHM converter என்ற இரண்டு அருமையான மென்பொருள்களை உருவாக்கியவர். தமிழில் தற்போது கிடைக்கும் எழுதிகளில் NHM writer மிக அருமையானது. முழு நேரமாகவே தமிழ்க் கணிமைகளில் ஈடுபட்டிருக்கும் இவரிடம் இருந்து இன்னும் நிறைய எதிர்பார்க்கலாம்.

14. சுந்தர் – தமிழ் இலக்கண கணிமை, விக்கி நுட்பம் ஆகியவற்றில் ஆர்வம் உள்ளவர். தானியங்கியாக தமிழ் விக்சனரியில் ஒரு இலட்சம் சொற்கள் சேர்த்தது சுந்தரின் மிக முக்கியமான பங்களிப்பு.