வலைப்பதிவில் பணம் ஈட்டுவது எப்படி?

ஆர்வமுள்ள ஒரு துறை, தொடர்ந்து வலைப்பதிதல், பிற ஆர்வலர்களுடன் உறவாடல், பணம் ஈட்டுவது குறித்து தெளிவான திட்டமிடலும் முயற்சியும் இருந்தால் வலைப்பதிவில் நேரடியாகவும் மறைமுகமாகவும் பணம் ஈட்டுவதற்கு பல வழிகள் உள்ளன.

நேரடி வழிகள்

1. வலைப்பதிவில் விளம்பரம்

வலைப்பதிவில் பணம் என்றால் பலரும் புரிந்து கொள்வந்து இந்த நேரடி வழியைத் தான்.  வலைப்பதிவு ஆங்கிலத்தில் இருந்தால் கூடுதல் வாய்ப்புகள். ஒரு நாளைக்கு ஆயிரக்கணக்கில் வருகைகள் வேண்டும். Adsense, தட்டி விளம்பரங்கள், தொடுப்பு விளம்பரங்கள் மூலம் பணம் ஈட்டலாம். தூத்துக்குடியைச் சேர்ந்த 17 வயது மாணவர் சங்கர் கணேசு Adsense மூலமாக மட்டுமே ஒவ்வொரு மாதமும் 20,000+ பணம் ஈட்டுகிறார்.

2. விளம்பர இடுகைகள்

சில நிறுவனங்களின் பொருட்களைப் பற்றி வலைப்பதிவில் எழுத காசு தருகிறார்கள்.  விளம்பர இடுகைகள் எழுதும் மயூரேசன் கூடுதல் தகவல் தரலாம்.

3. முகவர் திட்டங்கள்

வாசகர்களுக்குப் பயனுள்ள பொருட்களின் முகவர்களாகச் செயல்படலாம். எடுத்துக்காட்டுக்கு, Amazon புத்தக முகவர் திட்டம்,  Hostgator வலையிட வழங்கி முகவர் திட்டம். வாசகர்கள் இந்த தொடுப்புகளை அழுத்திச் சென்று பொருட்களைப் பெறும் போது, நமக்கு ஒரு பங்குத் தொகை கிடைக்கும். இதற்குப் பெரிய அளவில் வாசகர்கள் வேண்டும் என்றில்லை. வழக்கமாக இந்தப் பொருட்களை நம் நண்பர்களுக்குப் பரிந்துரைக்கும் போது கூட இந்தத் தொடுப்புகளை அழுத்தி வாங்கச் சொல்லலாம்.

4. வலைப்பதிவு விற்பனை

நிறைய வாசகர்கள் ஒரு சமூகமாகப் பங்கெடுக்கும், பணம் ஈட்ட வாய்ப்புள்ள ஒரு வலைப்பதிவை உருவாக்கினால், அதை விலை கொடுத்து வாங்குவதற்கு ஆட்கள் உண்டு. மிக இலகுவாக, 500 அமெரிக்க டாலர் தொடக்கம் எந்த விலைக்கும் விற்க இயலும்.

மறைமுக வழிகள்

மேற்குறிப்பிட்ட நேரடி வழிகள் பலவும் அதிக வாசகர் வட்டம் உடைய ஆங்கில வலைப்பதிவுகளுக்கே பொருந்துபவை. ஆனால், ஓரளவு அறிமுகமான தமிழ் வலைப்பதிவுகள் மூலமும் கூட பணம் ஈட்டுவதற்கான வாய்ப்புகள் உள்ளன.

5. வலைப்பதிவு நுட்ப வேலை வாய்ப்புகள்

வேர்டுபிரெசு மென்பொருளை உங்கள் சொந்தத் தளத்தில் நிறுவி வலைப்பதிகிறீர்களா? வலைப்பதிவு நிறுவல், இற்றைப்படுத்தல், பராமரப்பு, பரப்புதல் ஆகியவற்றில் அனுபவம் உண்டா? வலைப்பதிவு வடிவமைப்பு, வரை கலை வடிவமைப்பு, நிரலாக்கம் ஆகியவற்றில் தேர்ச்சி உண்டா? இத்துறையில் ஏராளமான வேலை வாய்ப்புகள் உள்ளன. ஊரோடி பகீ, நான் உட்பட சில தமிழ் வலைப்பதிவர்கள் இது போன்ற WordPress நிறுவல் வேலைகளை எடுத்துச் செய்கிறோம்.

6. வலைப்பதிவு எழுத்து வேலை

பல தொழில் முனைவர்கள் தொழில்முறையில் வலைப்பதிவுகளைத் தொடங்கி அவற்றில் கட்டுரைகள் எழுத எழுத்தாளர்களைத் தேடுகிறார்கள். ஒரு கட்டுரைக்கு 2 அமெரிக்க டாலர் முதல் 200 அமெரிக்க டாலர் வரை வாய்ப்புகள் உள்ளன.

7. தொழில் வளர்ச்சிக்கு வலைப்பதிதல்

நமது தொழில் குறித்த விழிப்புணர்வு, விளம்பர வாய்ப்புகளுக்கும் வலைப்பதிவைப் பயன்படுத்தலாம். நேரடியாக உற்பத்தியாளரிடம் பேசித் தெளிவு பெற இயல்வதால் நம்பகத் தன்மை கூடி கூடுதல் விற்பனைக்கு உதவும். எடுத்துக்காட்டுக்கு, பதிப்புத் தொழில், தனது பதிப்பகம் குறித்து எழுதும் பத்ரி.

8. துறை வல்லுனராகும் வாய்ப்புகள்

நமக்கு ஈடுபாடுள்ள துறை, வேலை குறித்து தொடர்ந்து வலைப்பதிவதன் மூலம்  நம் திறமைகளைக் காட்சிப்படுத்தி புதிய வாய்ப்புகளை வெல்ல இயலும்.  வலைப்பதிவராகத் தொடங்கி அதன் மூலம் இன்று நூல் வெளியிடத் தொடங்கி உள்ளவர்கள், அச்சு ஊடகங்களில் தொடர்கள் எழுதுபவர்கள் இருக்கிறார்கள். எடுத்துக்காட்டுக்கு, லக்கிலுக் ஒரு எழுத்தாளராக வளரத் தொடங்கி உள்ளார். விக்கி, தானூர்திகள் துறையில் இந்திய அளவில் மதிப்புக்குரிய வலைப்பதிவராக உள்ளார்.
தொடர்புடைய இடுகைகள்:

இணையத்தில் பணம் பண்ணலாம் வாங்க – பகுதி 1

இணையத்தில் பணம் பண்ணலாம் வாங்க – பகுதி 2

இணையத்தில் பணம் பண்ணலாம் வாங்க – பகுதி 3

இணையத்தில் பணம் பண்ணலாம் வாங்க – பகுதி 4

என் வலைப்பதிவுப் போக்குகள்

2007 ஆம் ஆண்டை “வலைப்பதிதல் ஆண்டு” என்று நாட்குறிப்பில் எழுதத்தக்க அளவு வலைப்பதியும் வேகம் கூடுகிறது!! 2007 தொடக்கத்தில் துறை சார் பதிவுகள் என்று ப்ளாகரில் எண்ணற்ற புதுப் பதிவுகள் தொடங்கி, பராமரிப்பில் விழி பிதுங்கி, தொடக்க ஆர்வம் குன்றி நிறைய பதிவுகளை அழித்து விட்டேன். இனி புதிதாய் ஒரு வலைப்பதிவையும் எங்கும் திறக்கும் ஆர்வம் இல்லை. இருக்கிற வலைப்பதிவுகள் போதும் 🙂 தனித்தளத்துக்கு நகர்வது, திரட்டிகளில் இருந்து விலகுவது வலைப்பதியும் வேகத்தைக் குறைக்கும் என்று நினைப்பு பொய்த்துப் போனது 🙂 திரட்டிகளில் இருந்த போது இருந்ததை விட மறுமொழிகள் எண்ணிக்கை குறைந்தது. ஆனால், அவற்றின் தரம் கூடியது. வருகையாளர் எண்ணிகையும் கூடியது.

எச்சரிக்கை: நாட்குறிப்பு / சொந்தக் கதை 🙂

* 2005 சனவரியில் முதல் எழுத்து . அதற்கு ஆறு மாதம் முன்னரே தமிழில் எழுதக் கற்றிருந்தேன். ஆனால், அப்போது எங்கு, என்ன தமிழில் எழுதினேன் என்று நினைவில்லை. விக்கி அறிமுகம் மார்ச் 2005ல்,

* 2005 பிற்பகுதியில் ஜெர்மனிக்கு நகர்ந்த பிறகு தமிழ்மணம் அறிமுகமானது. இடுகைகள் எண்ணிக்கையும் கூடியது. பெரும்பாலும் செய்தி விமர்சனங்களே எழுதினேன்.

* 2006 தொடக்கம் பிற்பகுதி வரை அறவே வலைப்பதியவே இல்லை எனலாம். நெதர்லாந்துக்கு நகர்வு, வாழ்க்கைச் சூழல், விக்கி ஈடுபாடுகள் காரணம். பிற்பகுதியில் தமிழ் விக்கி திட்டங்கள் குறித்து எடுத்துரைக்க வேண்டி மீண்டும் வலைப்பதிவுகள் பக்கம் எட்டிப் பார்க்கிறேன். அன்று தொடங்கி செய்தி விமர்சனங்கள் எழுதுவதைப் பெரும்பாலும் தவிர்த்து விடுகிறேன். (காரணம்) . தமிழ், கணினி, வலைப்பதிதல், கட்டற்ற மென்பொருள், தமிழ்99 என்று கொஞ்சம் கொள்கை பரப்பு வேலைகளில் தீவிரமடையத் தொடங்குகிறது.

* 2007 ஆம் ஆண்டை “வலைப்பதிதல் ஆண்டு” என்று நாட்குறிப்பில் எழுதத்தக்க அளவு வலைப்பதியும் வேகம் கூடுகிறது!! 2007 தொடக்கத்தில் துறை சார் பதிவுகள் என்று ப்ளாகரில் எண்ணற்ற புதுப் பதிவுகள் தொடங்கி, பராமரிப்பில் விழி பிதுங்கி, தொடக்க ஆர்வம் குன்றி நிறைய பதிவுகளை அழித்து விட்டேன். இனி புதிதாய் ஒரு வலைப்பதிவையும் எங்கும் திறக்கும் ஆர்வம் இல்லை. இருக்கிற வலைப்பதிவுகள் போதும் 🙂 தனித்தளத்துக்கு நகர்வது, திரட்டிகளில் இருந்து விலகுவது வலைப்பதியும் வேகத்தைக் குறைக்கும் என்று நினைப்பு பொய்த்துப் போனது 🙂 திரட்டிகளில் இருந்த போது இருந்ததை விட மறுமொழிகள் எண்ணிக்கை குறைந்தது. ஆனால், அவற்றின் தரம் கூடியது. வருகையாளர் எண்ணிகையும் கூடியது.

ஆண்டின் நடுவில் படிப்புக் காரணங்களுக்காக வலைப்பதியும் வேகம் குறைந்தது. ஆனால், விடாமல், மாற்று!, வலைப்பதிவர் பட்டறை, வேர்ட்பிரெஸ் தமிழாக்கம், திறந்த OPML திட்டம் என்று என் வலைப்பதிவுகளுக்கு வெளியேயான வலைப்பதிவர் சமூகச் செயற்பாடுகள் கூடுகின்றன.

வேர்ட்பிரெஸ் தரும் சுதந்திரம் வலைப்பதிவு நுட்பம் குறித்து நிறைய நோண்டிப் பார்க்கத் தூண்டியது. மாற்று! பங்களிப்புகள் காரணமாக நாள் விடாமல் தமிழ் வலைப்பதிவுகளைப் படிக்க நேர்ந்தது. இப்போது என் கூகுள் ரீடரில் 700ஐத் தொடும் தமிழ்ப் பதிவுகள். எல்லாவற்றையும் படிக்கிறேன் என்றில்லை. ஜெயமோகன் படிக்கத்தக்க வகையில் நாளும் நிறைய எழுதுகிறார் என்றாலும் ஒருவரிடம் இருந்தே நிறைய இடுகைகள், அதுவும் seriousஆன இடுகைகள் வந்தால் படிக்க அயர்ச்சியாய் இருக்கிறது. நானும் ஒரே நாளில் 4,5 இடுகைகளைப் போட்டுத் தாக்குகையில் இதை நினைத்துத் தயங்குவது உண்டு. ஆனால், எல்லா நாட்களும் எழுத மனநிலை வாய்க்குதில்லை. வாய்க்கையில் ஒன்றோடு நிறுத்த ஒப்புவதில்லை 🙂 வரும் நாட்களில் பதிப்பிக்குமாறு செய்யும் வசதி இருந்தாலும் எழுதிய உடனே பதிப்பித்துப் பார்ப்பதில் ஒரு மகிழ்ச்சி 🙂

* சில சமயம் என் பதிவைப் பார்த்தால் எனக்கே கொள்கை பரப்பு வாடை தூக்கலா இருக்கு 🙁 ரொம்ப seriousஆ இருக்கோ? “ரொம்ப தமிழாராய்ச்சி பண்ணாம நானும் கருத்து சொல்வது போல் ஏதாவது எழுதேண்டா”ன்னு அக்கா சொன்னாங்க 🙁 அதுக்காக, எத்தனை தடவை தான் ஜட்டி, பனியன் காயப்போட முடியும் 🙂 வாசகர்களை மகிழ்விப்பதற்காக என்றே எழுதத் தொடங்கினால், அப்புறம் நாம எழுத விரும்புவதைக் கொஞ்சம் கொஞ்சமா விட்டுடுவோம்னு நினைக்கிறேன். ஆனால், பிற தளங்களில் என் இடுகைகளை மேற்கோள் காட்டி சிலர் எழுதும் போது, சில விசயங்களைக் கசப்பாக இருந்தாலும் சொல்லித் தான் ஆக வேண்டும் என்று நினைக்க வேண்டி இருக்கிறது.

* திருக்குறள் உரை, உயிர்ப்பேணியலுகை தொடங்கியதோடு நிற்கின்றன. இனி வரும் காலத்தில் சிரமம் எடுத்து அவற்றை முடிக்க வேண்டும். தமிழ் இணையத்தில் அதிகம் தென்படுவது திருக்குறள் உரை தான். இருந்தாலும், என் தனிப்பட்ட புரிதலுக்காகவாவது கொஞ்சம் கொஞ்சமாக எழுதி முடிக்க வேண்டும். இது போன்ற இடுகைகள் தேடு பொறிகளில் மூலம் தொடர் வாசகர்களையும் தர வல்லன.

* இனி திரைப்பட, இசை, நூல் விமர்சனங்கள் எழுதும் எண்ணம் இல்லை. அவற்றைப் பார்க்கும் போது, படிக்கும் போது ரசித்துப் பார்க்க இயலாமல், “விமர்சனக் கண்ணோடே” பார்ப்பது கடுப்பளிக்கிறது. நல்லாயிருக்கு, நல்லா இல்லை என்று ஒரு வரியில் நண்பர்களுக்குச் சொல்ல தான் Twitter இருக்கே ! செய்தி விமர்சனம் முதல் பல விசயங்களில் ‘நானும் கருத்து சொல்கிறேன்” என்று எழுதுவதை விட யாரும் எழுதாத விசயங்களைப் பற்றி கொஞ்சமாவது எழுத நினைக்கிறேன்.

* விக்கிப்பீடியா, விக்சனரி போன்ற பட இடங்களிலும் பங்கு கொள்வது புதிய இடுகைகள் எழுதுவதற்கான கருப்பொருள்களைத் தருகிறது.

* பெரிது பெரிதாய் உள்ள விளம்பரத் தட்டிகளால் எவ்வளவு இலாபம் வரும் என்று தெரியவில்லை. தரமான தமிழ் கூகுள் adsense வந்தால் ஒழிய தொடர்பில்லாத விளம்பரங்களைப் போடுவதில் ஆர்வம் இல்லை. வலைப்பதிவுகள் மூலம் பணம் ஈட்டுவது என்பது பெரிய நோக்கமாய் இல்லை.

* 3 ஆண்டுகளாக 200க்கும் மேற்பட்ட இடுகைகள் எழுதி உள்ளேன். இதற்காக விழா எடுக்க, வாழ்த்து மடல் பெறும் எண்ணம் ஏதும் இல்லை 😉

* எத்தனை widget, gadgetகளை நோண்டினாலும் ஒரு மாதத்துக்குள் அலுத்துத் தூக்கி விடுகிறேன் 🙂

* 2, 3 மாதங்களுக்குப் பிறகும் தொடர்ந்த பயன்படுத்தத் தோன்றுபவையே நல்ல நீட்சிகள், வார்ப்புருக்கள்.

* வார்ப்புரு மாற்றுவது, மறுமொழிகள் வந்திருக்கிறதா என்று பார்ப்பது, வருகை எண்ணிக்கையைப் பார்ப்பது வலைப்பதிவர்களைத் தாக்கும் வழமையான நோய் 🙂 வார்ப்புரு மாற்றும் நோயில் இருந்து மட்டும் தப்பி இருக்கிறேன் 🙂 கணிமை, தமிழ்த் தென்றல் பதிவுகளில் இருந்த புள்ளி விவர நிரல்களை நீக்கி விட்டு பதிந்த போது ஏதோ ஒரு நிம்மதி தோன்றியது. ஏன்? எத்தனை பேர் வருகிறார்கள் என்று கவலைப்படாமல் விரும்பிய போது விரும்பிய அளவு பதிவதும் ஒரு சுகம் தான் ! வேர்ட்பிரெஸ் புள்ளி விவரங்கள் நம்மை மேம்படுத்திக் கொள்ளத் தக்க விரிவான தகவல்களைத் தருவதால் அதை விட மனமில்லை.

* இப்போது என் வலைப்பதிவுகள் அனைத்திலும் மட்டுறுத்தல் இல்லாத மறுமொழிப் பெட்டிகள் இருக்கின்றன. இத்தனை ஆண்டுகளில் 2,3 ஆபாச மறுமொழிகளே வந்துள்ளன. மற்றபடி, எவ்வளவு மாற்றுக் கருத்தாக இருந்தாலும் அனுமதித்தே வருவதால் எதற்கு வீணாய் மட்டுறுத்தல் வேலை என்று விட்டு விட்டேன். எப்போதாவது haplog வகையறா எரிதங்கள் வந்தால் தற்காலிகமாக மட்டுறுத்தலாம். நான் சென்று மறுமொழி அளிக்கும் பதிவுகளில் மட்டுறுத்தல் இல்லாவிட்டால் எனக்குப் பிடித்திருக்கிறது. அதே போன்ற அனுபவத்தை என் வாசகர்களுக்கும் தர விரும்புகிறேன். மட்டுறுத்தல் இல்லா நேரத்தில் மறுமொழிகள் ஊடான உரையாடல்களும் வாசகர்களுக்கு இடையே விரைவாக நடைபெறும் தானே?

* திரட்டிகள் குறித்த விமர்சனத்தை கணிமையில் எழுதிய போது மாற்றுக் கருத்துக்கள் என்பதை விட விதண்டாவாதங்களே அதிகம் வந்தன. அப்போது மறுமொழிப் பெட்டியை மூடி வைத்த போது கொஞ்சம் நிம்மதி வந்தது. எவ்வளவு தான் கருத்துச் சுதந்திரம், இணைய ஊடகப் புரிதல் இருந்தாலும் விதிவிலக்கான நேரங்களும் இருக்கின்றன போலும், மிகவும் சர்ச்சைக்குரிய விசயங்களில் நம் கருத்தைப் பதிவது மட்டுமே நோக்கம் என்றால் மறுமொழிப் பெட்டியை மூடி வைப்பது சரியே. மறுமொழிகளை எதிர்ப்பார்க்காமல் சும்மா வலைப்பதிவது கூட பிடித்ததாகவே இருந்தது.

* நீட்டி முழக்கி எழுதும் வலைப்பதிவுகளை விட twitter குறும்பதிவுகள் பிடித்திருக்கிறது. அங்கு என்ன வேண்டுமானாலும் எழுத இயல்கிறது. பிம்பங்கள், மறுமொழிகள், புள்ளிவிவரங்கள், பராமரிப்பு என்று ஒன்றும் கிடையாது.

* என் கல்லூரி நண்பர்கள் சிலரும் என் பதிவுகளைப் படிக்கிறார்கள் போலும். அவர்கள் மறுமொழிகள் இடுவதில்லை என்பதால் அறியாமல் இருந்தேன். தொலைப்பேசியில் சொன்ன போது மகிழ்ந்தேன்.

* பல இடங்களில் ஒரே மறுமொழி அளிக்க வேண்டி வந்தால் அதைப் பற்றி ஒரு இடுகை எழுதி வைத்துக் கொண்டு தகுந்த இடங்களில் தொடுப்பாகவே கொடுத்து விடுவது உதவுகிறது.

* தமிழ் இணையம் முழுக்க கருத்துக்களுக்குப் பஞ்சம் இல்லாமல் இறைந்து கிடக்கின்றன. தகவலுக்குத் தான் பஞ்சம் ! இனி எழுதும் வலை ஆக்கங்களில் தகவல் முக்கியத்துவம் தந்து எழுத வேண்டும் என்று நினைத்து இருக்கிறேன்.

* கிட்டத்தட்ட இரண்டு ஆண்டுகளாய் தமிழ் வலைப்பதிவுகளைப் படிக்கிறேன். ஒரு நாளைக்கு ஒரு மணி நேரமாவது போகிறது. ஆனால், இதனால் பெற்ற அறிவு, பயன் என்ன என்றால் ஏமாற்றமாக இருக்கிறது. பல சமயங்களில் தவறாமல் குமுதம், விகடன் படிப்பதற்கும் இதற்கும் என்ன வேறுபாடு என்று புரியவில்லை. ஒரு வேளை இந்த நேரத்தை, புத்தகங்கள் படிப்பது போன்றவற்றில் செலவழித்திருந்தால் இன்னும் பயனுள்ளதாக இருந்திருக்குமோ? 🙁 உலக இணையத்தில் தகவல் முக்கியத்துவம் உள்ள தளங்களைத் தெரிந்தெடுத்து வாசிக்க இயல்கிறது. தமிழில் இன்னும் அந்த அளவு தகவல் தளங்கள் பெருகவில்லை 🙁 தமிழ் வலைப்பதிவுகளைப் படிக்கச் செலவிடும் நேரத்தைக் குறைக்க வேண்டும். திரட்டிகளுக்கு வெளியே பல நல்ல பதிவர்கள் இயங்குகிறார்கள். தேடிப் பிடிக்க கொஞ்சம் முயற்சி வேண்டும். தமிழ் வலைப்பதிவுகளில் அதிகம் பதிவுகள் பின்வருவனவற்றைக் குறித்து இருக்கின்றன: கவிதை (பெரும்பாலும் புலம்பல் 🙂 ), அரசியல், திரைப்படம், ஈழம், செய்தி விமர்சனம்.

* இது வரை எனக்குப் போலிகள் இல்லை. அதனால் இன்னும் மூத்த பதிவராகலைன்னு நினைக்கிறேன் 😉 ஆனால், யாரோ ஒரு சிலர் என்னைக் கண்டாலே பிடிக்கவில்லை என்று மட்டும் புரிகிறது. இரண்டு ஆண்டுகளுக்கு முன்னர் நான் எங்கோ இட்ட எனக்கே மறந்து போன மறுமொழிகளையும் குறிப்பெடுத்து எனக்கே நினைவூட்டுகிறார்கள். “அங்க அப்படி சொன்னீல்ல” என்று மிரட்டுகிறார்கள் 🙂 நல்ல நினைவாற்றல் உள்ள தரமான எதிராளிகள் 🙂 அடையாளம் காட்டாமல் ஏட்டிக்குப் போட்டியான கருத்துக்களைச் சொல்கிறார்கள். ஏதோ ஒரு விதத்தில் அவர்களை எரிச்சல்படுத்தி இருக்கிறேன். ஆனால், ஏன் என்று துல்லியமாகப் புரிந்து கொள்ள இயலவில்லை.

* Technology பிதாமகன் என்றொரு பட்டம் கிடைத்திருக்கிறது 🙂 ஆனா, சேது, நந்தா படங்கள் எனக்கு இன்னும் கூடப் பிடிக்கும் 🙂

* 99% சொந்தப் பெயரிலேயே பிற பதிவுகளில் கருத்து சொல்லி வருகிறேன். ஒரு சில இடங்களில் அடையாளம் காட்டாமல் மறுமொழி இட்டிருக்கிறேன்: அதற்கு முக்கிய காரணம் – சில சமயம் ஏனோ இணையம் முழுக்க என் பெயரை அள்ளி இறைப்பது போல் தோன்றுகிறது. இணையத்தில் என் படங்களை வெளியிடுவதைத் தவிர்ப்பதும் இதனாலே. “படிக்காம ஏன் நேரத்தை வீண்டிக்கிற”ன்னு அக்கா காதை திருகுவாங்க என்பதாலும் சில இடங்களில் பெயரைக் காட்டுவதில்லை 🙂 சிலர் என் பெயர் உள்ள மறுமொழிகளை அனுமதிப்பதில்லை 🙂 அங்கும் அடையாளமின்றி எழுத வேண்டி இருக்கிறது. சில இடங்களில் நான் சொல்கிறேன் என்பதை விட சொல்லவரும் கருத்து முக்கியம் என்று தோன்றினால், பெயர் இல்லாமல் கருத்து சொல்வதுண்டு.

* முடிவில்லாமல் நீளும் உரையாடல்கள் அயர்ச்சி அளிக்கின்றன. தமிழ்நாட்டில் ஒவ்வொருவருக்கும் ஒரு கருத்து இருக்கும். எல்லா இடங்களிலும் போய் நாம் வாதம் செய்வதில்லை. அது போல் இணையத்திலும் ஏற்பில்லாத கருத்தைக் கண்டாலும் புறக்கணிக்கக் கற்றுக் கொள்ள வேண்டும். ஒரு கருத்தைப் பதிந்தோம் என்றால் தொடர்ந்து அதன் மறுமொழிகளைக் கவனிப்பதில் நிறைய நேரம் போகிறது. நம் மறுமொழிகளைத் தாமதப்படுத்தினால், எப்படியும் நம் கருத்தை யாராவது ஒருவர் சொல்லி இருப்பார்கள் என்பதால் நேரம் மிஞ்சும்.

* சில மூத்த (!?) பதிவர்கள் மாற்றுக் கருத்துக்களைப் பதிப்பிப்பதில்லை. பதிப்பித்தாலும் பதில் சொல்வதில்லை. அட, நான்கு, ஐந்து இடுகைகளில் நல்ல மாதிரி கருத்து சொன்னாலும் “மரியாதைக்கு கூட” ஒரு சொல் திரும்ப வருவதில்லை. இனி இத்தகைய பதிவுகளில் கருத்திடலைத் தவிர்க்க வேண்டும்.

* தமிழ் இணையத்தில் சில pyscho பதிவர்களும் இருக்கிறார்கள் ! அவர்கள் என்ன சொன்னாலும் கண், காது, வாய் பொத்திக் கொள்வது நல்லது.

* “எந்த ஊரில் இருந்து எந்தப் பேருந்து பிடித்து வந்தார்கள்” என்ற அளவுக்கு Feedjit போன்றவை போட்டு IP கண்காணித்து விளம்பரப்படுத்தும் பதிவுகளைக் கண்டாலே பிடிக்கவில்லை.

* தமிழ் வலைப்பதிவர்களிடம் இருந்து தமிழ் இணைய முன்னேற்றம், தமிழ்க் கணிமை பங்களிப்புகளைப் பெரிதாக எதிர்ப்பார்க்கலாகாது. பலர் வாய்ச்சொல் வீரர்கள், புகழ் விரும்பிகள், பொழுது போக்கு விரும்பிகள்.

* நுட்பம் சாரா அறிவுரை இடுகைகள் வீண். தேவையும் இல்லை. போன ஆண்டு நானே வலைப்பதிவர் சமூகத்தை விமர்சித்து சில இடுகைகள் போட்டிருக்கிறேன். இனி அந்தத் தவறைச் செய்யப் போவதில்லை.

* தமிழ் வலைப்பதிவர்கள், தமிழ் வலைப்பதிவுகளில் ஏதும் விரும்பத்தகா போக்கு இருந்தால் அது சமூகத்தின் குறையே. சமூகத்தை மாற்றாமல் வலைப்பதிவு ஊடகத்தின் உள்ளடக்கம், செயற்பாடுகளை மாற்ற இயலாது. வலைப்பதிவு என்பது தனி மனித உணர்வுகள், சமூகத்தின் எதிரொளிப்பே. எனவே, தமிழ்ப்பதிவுகள் அதிர்ச்சி அளிப்பது போல் தோன்றினால் நிகழ் உலகச் சமூகமும் அவ்வளவு அதிர்ச்சிக்குரியது என்று புரிந்து கொள்ள வேண்டியது தான். சமூகம் தன்னை வெளிப்படுத்திக் கொள்வதற்கான பல கருவிகளில் ஒன்று தான் இணையம்.

* இது வரைக்கும் பொறுமையாகப் படித்து இந்த இடுகையில் எத்தனை smileyகள் இருக்கின்றன என்று எண்ணிச் சொல்பவர்கள் வலைப்பதிவுக்கு நிறைய மறுமொழிகள், வருகையாளர்கள் கிடைக்கட்டும் என்று வாழ்த்துகிறேன் !

புதிய தமிழ் வலைப்பதிவர்களுக்கான வேண்டுகோள்கள்

பல புதிய தமிழ் வலைப்பதிவுகளைக் காண்கையில் மனதில் தோன்றிய எண்ணங்களை இங்கு பதிந்து வைக்கிறேன். இக்கருத்துக்களில் நான் செய்து திருத்திக் கொண்ட பிழைகளும் அடங்கும். இன்னும் நிறைய புதியவர்களைப் பார்க்கையில் கருத்துகள் மாறலாம். கூடலாம்.

தங்கள் வாசிப்புக்காக மட்டுமே எழுதுவோர், நிகழ் வாழ்க்கை நட்பு வட்டத்துக்கு மட்டும் எழுதுவோர் இவ்வேண்டுகோள்களைக் கண்டு கொள்ள வேண்டாம். ஆனால், முன் பின் அறிமுகமில்லா பலரும் தன் எழுத்துக்களைத் தொடர்ந்து படிக்க வேண்டும் என்று எழுதுவோர் கவனிக்கலாம்.

பல புதிய தமிழ் வலைப்பதிவுகளைக் காண்கையில் மனதில் தோன்றிய எண்ணங்களை இங்கு பதிந்து வைக்கிறேன். இக்கருத்துக்களில் நான் செய்து திருத்திக் கொண்ட பிழைகளும் அடங்கும். இன்னும் நிறைய புதியவர்களைப் பார்க்கையில் கருத்துகள் மாறலாம். கூடலாம்.

தங்கள் வாசிப்புக்காக மட்டுமே எழுதுவோர், நிகழ் வாழ்க்கை நட்பு வட்டத்துக்கு மட்டும் எழுதுவோர் இவ்வேண்டுகோள்களைக் கண்டு கொள்ள வேண்டாம். ஆனால், முன் பின் அறிமுகமில்லா பலரும் தன் எழுத்துக்களைத் தொடர்ந்து படிக்க வேண்டும் என்று எழுதுவோர் கவனிக்கலாம்.

1. வலைப்பதிவு முகவரி

* சுருக்கமாகவும் நினைவில் கொள்ளவும் எழுதவும் இலகுவாகவும் முகவரி வையுங்கள்.

வண்ணாத்திப்பூச்சி சிறகடித்த போது என்பது உங்கள் வலைப்பதிவின் பெயராக இருக்கலாம். ஆனால், அதையே வலைப்பதிவின் முகவரியாக வைக்கத் தேவை இல்லை. http://vannaaththeepoochchisiragadiththappdhu.blogspot.com என்ற ரீதியில் பெயர் வைத்தால் முகவரியை வாசித்துப் புரிந்து கொள்வது, நினைவில் கொள்வது, உலாவியில் எழுதுவது எல்லாமே சிரமம். குழப்பமான முகவரியை விட தலைப்புக்குத் தொடர்பற்ற முகவரி பரவாயில்லை.

* வலைப்பதிவு முகவரி, வலைப்பதிவு பெயர் இவற்றை விட உங்கள் பெயரை நினைவில் வைத்துக் கொள்வது எளிது. ஒரு துறை சாராமல் பல விசயங்களையும், அனுபவங்களையும் எழுதும் வலைப்பதிவுகளுக்கு இந்த மாதிரி பெயர் சூட்டலாம். எடுத்துக்காட்டுக்கு, http://www.santhoshguru.blogspot.com/

* ஒரு துறை சார்ந்து மட்டும் தொடர்ந்து அப்பதிவில் எழுதப்போகிறீர்கள் என்றால் துறை தொடர்பான பெயரைச் சூட்டலாம். முகவரியைப் பார்த்த மட்டில் உங்கள் பதிவை நினைவில் கொள்ளவும் தேடு பொறிகளில் நல்ல இடம் பெறவும் உதவும். நல்ல எடுத்துக்காட்டு http://fuelcellintamil.blogspot.com, http://photography-in-tamil.blogspot.com/, http://tamilgnu.blogspot.com

* பதிவின் முகவரி தமிழில் இருந்தால் குழப்பத்துக்கு இடமளிக்காத எழுத்துக்கூட்டலைக் கொண்டிருப்பது நலம். எல்லாருக்கும் ஆங்கிலம் – தமிழ் எழுத்துப்பெயர்ப்பு விதிகள் தெரியாது. kaadhal, kadal, kaathal என்ற ஒரே சொல்லைப் பலவிதமாக எழுதுபவர்கள் இருக்கிறார்கள். குழப்பத்துக்கு இடமளிக்கும் தமிழ்ப்பெயரைக் காட்டிலும் தெளிவாக இருக்கும் ஆங்கிலப் பெயர்கள் பரவாயில்லை.

* முகவரியில் எண்கள், hyphen குறிகள் போன்றவற்றை இயன்ற அளவு தவிர்ப்பது நல்லது.

* தனித்தளப் பதிவர்களுக்கான பெயரிடல் குறிப்புகள்

2. வலைப்பதிவுத் தலைப்பு

எண்ணங்கள் என்ற ஒரே பெயரில் 2, 3 மூன்று வலைப்பதிவுகள் இருக்கின்றன. சிந்தனை, சொல், கவிதை, காதல் போன்று பரவலாகப் பயன்படும் கவர்ந்திழுக்கக்கூடிய சொற்கள் ஏற்கனவே பல பதிவர்களால் பயன்படுத்தப்படலாம். ஏற்கனவே பிரபலமான / கெட்ட பெயர் பெற்ற வலைப்பதிவுத் தலைப்புகள் உங்களுக்கு வீண் சிரமங்கள் / குழப்பங்களைத் தரலாம். எனவே, உங்கள் பதிவுக்குப் பெயரிடும் முன் கூகுள் பதிவுத் தேடலில் ஒரு முறை தேடிப் பார்த்து தனித்துவமான பெயரைத் தேர்ந்தெடுங்கள்.

3. பதிவர் பெயர்

* உங்கள் பதிவர் பெயரைத் தேர்ந்தெடுக்கும் முன்னும் கூகுள் பதிவுத் தேடலில் அதே பெயரில் வேறு யாரும் இருக்கிறார்களா என்று தேடிப் பாருங்கள். சிவா, ரவி, குமார் போன்ற தெருவுக்கு நான்கு பேர் வைத்திருக்கும் பேர் என்றால் சிரமம் தான் 🙂 ஏற்கனவே அப்பெயரில் உள்ள பதிவர் பிரபலமானவர் / கெட்ட பெயர் பெற்றவர் என்றால் அதே பெயரைத் தவிர்ப்பது நல்லது. இல்லாவிட்டால், உங்கள் மேல் நம்பிக்கை இருக்கும் பட்சத்தில், அதே பெயரில் எழுதி பிரபல வலைப்பதிவர் ஆகப் பார்க்கலாம். இல்லாவிட்டால் உங்கள் வலைப்பதிவுப் பெயர், ஊர்ப்பெயர் என்று ஏதாவது முன்னொட்டாகச் சேர்த்துக் கொண்டு வலைப்பதியலாம். எடுத்துக்காட்டுக்கு, Tiger சிவா, காஞ்சிபுரம் குமார், துபாய் சீனு, ரிவால்வர் ரீட்டா..

* வேறு மொழி வலைப்பதிவுகளிலும் அதிகம் வாசித்து கருத்து சொல்பவர் என்றால் உங்கள் பெயரை ஆங்கில எழுத்துக்களிலேயே எழுதிக் கொள்வது நல்லது. (கந்தசாமி 707 / kanthasaamy 707) என்று அடைப்புக்குறிகள், / குறி, எண்கள் கொண்டு எழுதுவதைத் தவிர்க்கலாம்.

* ஒரே பெயரைக் கடைசி வரைக் கொண்டிருக்கப் பாருங்கள். வாரா வாரம் வேற வேற மொழிகளில் தன் பதிவர் பெயரை எழுதி நோகடிக்கும் பதிவர்களையும் அறிவேன். உங்கள் பதிவர் பெயரைக் கொண்டு நீங்கள் பல்வேறு இடங்களிலும் பல்வேறு காலங்களிலும் எழுதிய இடுகைகளைத் தேடிப் பிடித்துப் படிக்க இயலும் என்பதால் வேறு வேறு பெயரில் எழுதினால் உங்கள் ரசிகர்களைச் சிதற விடுவீர்கள் 🙂

* உங்கள் பதிவர் பெயரும் வலைப்பதிவுத் தளத்துக்கான பயனர் கணக்குப் பெயரும் ஒன்றாக இருக்க வேண்டும் என்று அவசியம் இல்லை. மாற்றி வைத்துக் கொள்வது உங்கள் கடவுச் சொல் பாதுகாப்புக்கு நல்லது.

4. பதிவு விளக்கம்

திரைப்படங்களுக்குக் கீழ் Tagline போடுவது போல் வலைப்பதிவுத் தலைப்புகளுக்குக் கீழும் விளக்கம் தர ஒரு இடம் தருகிறார்கள். உங்கள் பதிவு எதைப்பற்றியது என்ற விளக்கத்தைத் தெளிவாக இங்கு தரவும். இந்த விளக்கம் புதிதாக உங்கள் வலைப்பதிவை ஓடைத் திரட்டிகள், தேடு பொறிகளில் பார்ப்பவர்களுக்குக் காட்டப்படும் என்பதால், அவர்கள் உங்கள் வலைப்பதிவைப் படிக்க முடிவெடுக்க இது உதவும். “என்னைப் பாதித்தவை, எனக்குத் தோன்றியவை” என்று விளக்கத்தை விட “கணினி, இணையம், வலைப்பதிவு, தமிழ் குறித்த தமிழ் வலைப்பதிவு” என்ற விளக்கம் கூடுதல் தகவல்களைத் தரும்.

5. பதிவர் படம்

* நீங்கள் ஏதேனும் ஒரு பதிவர் படத்தைத் தெரிவு செய்து தொடர்ந்து அதைப் பயன்படுத்துவது நல்லது. பல தளங்களில் இந்தப் பதிவர் படத்தின் அடிப்படையில் கருத்துகள்,பதிவுகளை யார் எழுதி இருக்கிறார்கள் என்று இலகுவாக நோட்டம் விட முடியும். இன்ன பதிவருக்கு இன்ன படம் என்பது மனதில் ஆழமாகப் பதியும் ஒன்று. எனவே, அதை அடிக்கடி மாற்ற வேண்டாம். எனவே, முதல் முறை படத்தைப் போடும் போதே என்ன படம் என்று தெளிவாக யோசித்துப் படம் போடுங்கள்.

* உங்கள் முகத்தைக் காட்டும் புகைப்படம் என்றாலும் வாரா வாரம் உங்களைப் புதிதாக எடுத்துக் கொள்ளும் படங்களைப் போட்டுக் கொள்ள வேண்டாம் 🙂 அவற்றை orkut, facebook போன்ற தளங்களில் போட்டு நண்பர்களுக்குக் காட்டலாம். அடிக்கடி அதை மாற்றினால் உங்கள் நண்பர்கள் அல்லாத வாசகர்களுக்கு உங்களை அடையாளம் கண்டு கொள்வதில் சிரமம் இருக்கலாம்.

* உங்கள் முகத்தைக் காட்டும் படம் என்றால் அதனால் வரக்கூடிய பின்விளைவுகள், சிக்கல்களை உணர்ந்த பின் போடுங்கள். நீங்கள் ரொம்ப பிரபலமானால், உங்களை நிம்மதியாக உணவு கூட உண்ண விடாமல் ரசிகர்கள் கையெழுத்து வாங்கத் துரத்தலாம் (நினைப்புத் தான் 😉 ) உண்மையில், உங்களை விரும்பாதோராலும், உங்கள் அனுமதியின்றியும் தவறுதலாகப் பயன்படுத்த வாய்ப்புகள் உண்டு. மிகவும் சர்ச்சைக்குரிய விசயங்களில் தீவிரமாக எழுதுவோர் என்றால் பாதுகாப்பு அச்சுறுத்தல்களும் உண்டு.

6. வலைப்பதிவு மொழி

பல வலைப்பதிவுச் சேவை தளங்களும் மொழி அடிப்படையில் உங்கள் தளத்தைக் காட்சிப்படுத்துகின்றன. அச்சேவைகளுக்கும், உங்கள் வாசகர்களுக்கும் ஒரே பதிவில் தமிழ், ஆங்கிலம் என்று மாற்றி மாற்றி காண்பது உவப்பாக இருக்காது. ஒரு வலைப்பதிவில் ஒரு மொழியில் மட்டும் எழுதலாம்.

7. வலைப்பதிவு எண்ணிக்கை

வலைப்பதிவுக்கு வந்த புதிதில் துறை சார் பதிவுகள், கூட்டுபதிவுகள், புகைப்படப்பதிவுகள் என்று பல வகையிலும் புதுப் புதுப் பதிவுகளாகத் திறக்கத் தோன்றலாம். ஆனால், ஏகப்பட்ட பதிவுகளை வைத்திருப்பது நிர்வகிக்கச் சிரமமாக இருப்பதுடன் உங்கள் வாசகர்களுக்கும் நீங்கள் எழுதும் இடங்களில் எல்லாம் தொடர்ந்து படிப்பது சிரமமாக இருக்கும். எனவே தேவையற்ற பதிவுகளை நீக்கி விடுங்கள். ஏற்கனவே இருப்பவற்றில் பொருத்தமானவற்றை ஒன்று சேர்த்து விடுங்கள்.

8. திரட்டிகளைச் சாராதீர்கள்

தமிழ் வலைப்பதிவுகளைத் திரட்டிக் காட்ட நிறைய தளங்கள் இருக்கின்றன. வலைப்பதிவுக்கு அறிமுகமாகும் புதிதில் புதிய வாசகர்கள், நட்புகளைப் பெற இவற்றைப் பயன்படுத்திக் கொள்வதில் தவறில்லை. ஆனால், இவற்றைப் பயன்படுத்திக் கொள்வதற்கும் தொடர்ந்து இவற்றைச் சார்ந்து இயங்குவதற்கும் உள்ள வேறுபாடுகளைப் புரிந்து கொள்ளுங்கள். எழுதத் தொடங்கி ஆறு மாதம் கழித்து திரட்டிகளில் இருந்து விலகி எழுதிப் பாருங்கள். இல்லை, திரட்டியில் இணைக்காமல் புதிய பதிவொன்றைத் தொடங்கி எழுதிப் பாருங்கள். உங்கள் எழுத்தின் தரம், தன் சொந்த வலுவில் அது பெற்றுத் தரும் தொடர் வாசகர்கள் குறித்து உங்களை ஆய்வுக்குட்படுத்திக் கொள்ள இது உதவும்.  என்ன எழுதினாலும் வந்து படித்து கருத்து சொல்லும் திரட்டி வாசகர்கள் உங்கள் எழுத்தாற்றல் பற்றிய மித மிஞ்சிய தன் மதிப்பீடுகளை வளர்த்து விடக்கூடும். உங்களுக்காக எழுதுவது போய் வாசகர்கள் விரும்பிப் படிப்பதை மட்டும் தரும் தூண்டுதலுக்கு உள்ளாவீர்கள்.

திரட்டிகளில் இருந்து விலகி இயங்குவது எந்த விதத்திலும் என் வலைப்பதிவுக்கான வருகையைக் குறைக்கவில்லை. மாறாக, அதை விடக்கூடுதல் வாசகர்களே வருகிறார்கள். திரட்டிகள் மூலமாக மட்டுமின்றி தேடுபொறிகள், ஓடைத் திரட்டிகள் மூலமாகவும் உங்கள் பதிவுகளை வாசிக்க நிறைய பேர் இருக்கிறார்கள். பல புதிய தரமான வாசகர்கள் பொருளுள்ள மறுமொழிகளைத் தருகிறார்கள். திரட்டிகளில் இருக்கையில் பதிவு போடும் அன்று மட்டும் வாசகர் வரத்து எண்ணிக்கை உயரும். மற்ற நாட்கள் வரத்து துப்புரவாக ஓய்ந்து போகும். திரட்டிகளில் இருந்து விலகிய பின் வலைப்பதிதல், வலைப்பதிவு நுட்பம் குறித்து அறிந்து கொண்டு தேடுபொறிகளுக்கு உகந்ததாக எழுதத் தொடங்கிய பின் ஒவ்வொரு நாளும் சீராகவும் நிறைவாகவும் வாசகர் வரத்து இருக்கிறது.

இவற்றையும் பாருங்கள்:

பதிவரா திரட்டியா?

திரட்டிச் சார்பின்மை

9.  தேடுபொறிகளுக்காகவும் இடுகைத் தலைப்புகளை எழுதுங்கள்

திரட்டிகளில் இணைந்திருப்போர் அவற்றின் மூலம் கூடுதல் வாசகர்களைக் கவர ஏடாகூடமான / கவர்ச்சித் தலைப்புகளை வைப்பது வழக்கம். ஆனால், இவை ஒரு நாளில் குறுகிய நேரத்துக்கு மட்டுமே வாசகர்களைப் பெற்றுத் தர உதவும். அதற்குப் பிறகு, தேடு பொறிகள் மூலம் உங்கள் இடுகைகளைத் தொடர்ந்து அடைய வேண்டுமானால்,  இடுகையின் உள்ளடக்கம் குறித்த தெளிவான, சுருக்கமான தலைப்புகளைத் தாருங்கள். கவிதை, கதை போன்றவற்றை விட தகவல்களைத் தரும் இடுகைகளுக்கு இவை பொருந்தும். “செம ரவுசான படம்” என்ற தலைப்புக்குப் பதில் “ஓரம்போ – திரை விமர்சனம்” என்ற தலைப்பு வைக்கலாம்.

10. உங்கள் அலுவலக, சொந்த விவரங்களை வெளியிடாதீர்கள்

உங்கள் அலுவலக விவரம், வீட்டு முகவரி, உங்கள் உறவினர் பெயர்கள், புகைப்படங்கள், வங்கிக் கணக்கு எண் போன்ற விவரங்களை வலைப்பதிவிலோ வேறு எந்த இணையக் களத்திலுமோ வெளியிடாதீர்கள்.

ஏற்கனவே நான் எழுதிய தமிழ் வலைப்பதிவர்களுக்கான 10 நுட்ப வேண்டுகோள்களையும் கவனத்தில் கொள்ளலாம்.

சற்றுமுன்

சற்றுமுன்… செய்திச் சேவை வரும் பிப்ரவரி 15 அன்று முதல் பிறந்த நாளைக் கொண்டாடுகிறது. வாழ்த்துகள் !

சற்றுமுன்… செய்திச் சேவை வரும் பிப்ரவரி 15 அன்று முதல் பிறந்த நாளைக் கொண்டாடுகிறது. வாழ்த்துகள் !

சற்றுமுன்னின் சிறப்புகளாக நான் கருதுவன:

– 24 மணி நேரமும் இற்றைப்படுத்தப்படும் உலகளாவிய தமிழ் இணையச் செய்திச் சேவை.
– இயன்ற அளவு இனிய தமிழில் செய்தி, தள வடிவமைப்பு.
– வாசிப்பவர்களாலேயே எழுதப்படுகிறது. தமிழ் வலைப்பதிவுலகில் மிகப்பெரிய கூட்டுப் பதிவு இது தான் என நினைக்கிறேன்.
– வெகு மக்கள் ஊடகங்கள் ஆர்வம் காட்டாத செய்திகளுக்கு முக்கியத்துவம் தருவது. முக்கியமாக, இணையப் பயனர்களுக்கு ஆர்வம் ஊட்டக்கூடிய செய்திகளைத் தருவது. எடுத்துக்காட்டுக்கு, கூகுள் knol குறித்த செய்தி.
– தமிழகம், ஈழம் தவிர்த்து பிற நாடுகளில் வாழும் தமிழ் மக்களுக்கு ஆர்வம் ஊட்டும் செய்திகளையும் பகிர்ந்து கொள்வது.
– செய்திகளில் வில்லைக்காட்சிகள், நிகழ்படங்கள் தருவது.
– அறிவியல் இன்று போன்ற முயற்சிகள்.
– யாகூ, எம்எஸ்என், ஏஓஎல் எல்லாமே தமிழுக்கு வந்தாலும் ராசிபலன், அழகுக் குறிப்புகள், சமையல் குறிப்புகள்.. என்ற அலுக்க வைக்கும் வணிக மந்திரத்தை விட மாட்டேன் என்கிறார்கள். அவற்றுக்கு இடையே சற்றுமுன் வேறுபட்டு நிற்கிறது.
– முழுமையான செய்தி ஓடை தருவது.
– விளம்பரங்கள் இல்லாமல் / குறைவாக இருப்பது.
– தினத்தந்தி வகையறா இதழ்கள் ஒருங்குறிக்கு மாறாமல் இருக்கையில், அவற்றில் உள்ள முக்கியமான செய்திகளை ஒருங்குறியில் பெற்றுத் தருவது.
– வெகுமக்கள் செய்தி ஊடகங்கள் போல் அரசியல் / வணிக உந்துதல் இல்லாமல் இருப்பது.
– ஒரே செய்திகளுக்கான பல்வேறு இதழ்களின் தொடுப்புகளையும் ஓரிடத்தில் பார்க்கத் தருவது. இதை வேறு எந்த வணிகத் தமிழ்த் தளமும் செய்யும் என்று தோன்றவில்லை.
– இன்னும் சில செய்திப் பதிவுகள், கூட்டுப் பதிவுகள், இதழ்கள் போல் இல்லாமல் செய்தியோடு, அரசியல், சொந்தக்கருத்தைக் கலக்காமல் செய்தியைச் செய்தியாக மட்டும் தருவது.
– தமிழில் வெளிவராத செய்திகளையும் மொழிபெயர்த்துத்தருவது.

சற்றுமுன்னுக்கான வேண்டுகோள்கள்:

– பிற தளங்களில் இருந்து படியெடுத்துப் போடும் செய்திகளின் எண்ணிக்கையைக் குறைக்கலாம். அல்லது, செய்தியின் நீளத்தைச் சுருக்கி முழுச் செய்தியைப் படிக்கத் தொடுப்பு கொடுக்கலாம்.
– எந்தத் தமிழ்த் தளத்திலும் வெளிவந்திராத முக்கியத்துவம் வாய்ந்த செய்திகளை பிற தளங்களில் இருந்து மொழிபெயர்த்துத் தருவதை கூடுதல் முக்கியத்துவம் கொடுத்துச் செய்யலாம்.
– சற்றுமுன் வளர வளர வருகை எண்ணிக்கைகளுக்கு மயங்கி, “ரஜினி பேரனுக்கு மொட்டை அடித்தனர்” போன்ற செய்திகளைத் தராமல் இருப்பது.
– அரசியல் கலந்த கேலிச்சித்திரங்களைத் தவிர்ப்பது. தொடர்ந்தும் தளத்திலும் செய்திகளிலும் அரசியல் கலக்காமல் இருப்புத.

நான் சற்றுமுன் தளத்தில் செய்திகள் எழுதுவது இல்லை என்றாலும் தள பராமரிப்பில் பங்களித்து வருகிறேன். அந்த வகையில் வேர்ட்ப்ரெஸ் குறித்து நிறைய கற்றுக் கொள்ளவும் தூண்டுதலாக இருக்கிறது.

தொடர்ந்து சற்றுமுன்… வளர வாழ்த்துகள்.

வலைப்பூவா வலைப்பதிவா ?

வலைப்பூ, வலைப்பதிவு – இரண்டுமே blog என்பதற்கு ஈடான சொற்களாகப் புழங்குகின்றன. எது நல்ல சொல்?

இந்த இரண்டு சொற்களின் இளகுத் தன்மையையும் பார்ப்போம்.

வலைப்பதிவு

weblog – வலைப்பதிவு

blogger – வலைப்பதிவர்

blogging – வலைப்பதிதல்

blog (வினை) – வலைப்பதி.

blogger circle – பதிவர் வட்டம்.

blog world / blogdom – பதிவுலகம்

videoblog – நிகழ்படப்பதிவு / ஒளிதப் பதிவு

audioblog – ஒலிதப்பதிவு.

வலைப்பூ

weblog – வலைப்பூ

blogger – வலைப்பூக்காரர் ?? 😉

blogging – வலைப்பூத்தல் ?? 😉

blog (வினை) – வலைப்பூ பூ?? 😉

blogger circle – பூ வட்டம்?? 😉

blog world / blogdom – பூவுலகம் ?? பூந்தோட்டம் ??

videoblog – படப்பூ ?? 😉

audioblog – ஒலிப்பூ ?? 😉

புதுச் சொற்களை உருவாக்கும்போது வேர்ச்சொற்களிலிருந்தும் வினை சார்ந்தும் ஒரு சொல்லில் இருந்து பல சொற்கள் கிளைத்து வருவது போலவும் ஒன்றுக்கு ஒன்று தொடர்புடையதாகவும் தனிச்சொல்லாக இல்லாமல் சொற் தொகுதியாகவும் (word ecosystem) இருக்க வேண்டும் என்று மொழி அறிஞர்கள் வலியுறுத்துகிறார்கள்.

வலைப்பூ என்ற சொல்லில் உள்ள பெரிய குறை, வலை என்கிற முன்னொட்டை விட்டு விட்டு அதனால் செயல்பட முடியாது. தனித்து, பூ என்ற சொல்லை மட்டும் வைத்து சுருக்கமாக இந்த நுட்பம் குறித்து பேச முடியாது. வலைப்பூ என்பது தமிழ்மணம், தேன்கூடு என்று பூ சார்ந்த பெயர்களில் தளப்பெயர்கள் அமையத் தான் வழி வகுக்குமே தவிர வலைப்பதிவு நுட்பத்தை விவாதிக்க உதவாது.

வலைப்பதிவு என்பது வலுவான சொல்லாகத் தெரிகிறது.