கூகுள் தானியங்கித் தமிழாக்கக் கருவி

பிற மொழிகளில் இருந்து தமிழுக்கும் தமிழில் இருந்து பிற மொழிகளுக்கும் தானியக்கமாய் மொழிபெயர்க்கும் கருவி ஒன்றை கூகுள் வெளியிட்டுள்ளது.

தமிழ்க் கணிமையைப் பொறுத்தவரை இது ஒரு மிகப்பெரிய சாதனை என்பதில் ஐயம் இல்லை. அதிலும் ஆங்கிலம், தமிழ் இரண்டு மொழிகளுக்கு மட்டுமல்லாமால் பல மொழிகளுக்கும் இடையே இரு வழியாக மொழிபெயர்க்கலாம் என்பது சிறப்பு. செருமன், நெதர்லாந்து மொழிகளைச் சோதித்துப் பார்த்தேன்.

கூடவே தமிழ்ச் சொற்களை உச்சரித்துக் காட்டும் கருவி, தமிழ் உரையை உரோம எழுத்துகளில் எழுதிக் காட்டும் கருவியும் இணைக்கப்பட்டுள்ளது. தமிழ்ச் சொற்களை உச்சரிக்கும் கருவியின் திறன், சந்தையில் ஏற்கனவே உள்ள துவணி, MILE கருவிகளை ஒத்துள்ளது. தமிழ்ச் சொல் உச்சரிப்பு குறித்து கூகுள் தனியே ஏதேனும் ஆய்வு செய்துள்ளதா என்று அறிய வேண்டும்.

மிகச் சிறிய, நாம் நன்கு அறிந்த சில சொற்றொடர்களை நிறைவாகவே மொழிபெயர்க்கிறது. பெரிய பக்கங்களை அளிக்கும் போது அதன் திறன் மிகக் குறைவாக உள்ளதுடன், கிடைக்கும் தாறுமாறான மொழிபெயர்ப்பில் இருந்து நாமே தப்பும் தவறுமாக ஊகிக்க வேண்டியதாகவே உள்ளது. இது ஒரு alpha நிலை சோதனைக் கருவி என்பதால் இதற்கு மேல் எதிர்ப்பார்ப்பதும் திறனாய்வதும் பொருத்தமாக இருக்காது. இந்திய சந்தைத் தேவைகளுக்கான ஆய்வில் கூகுள் அவ்வளவாக பணம் செலவிடுவதாகத் தெரியாததால், அடுத்த நிலையான beta கருவி எப்போது வரும், இதன் தரம் மேம்படுமா என்று சொல்வதற்கு இல்லை.

எனினும், இந்தக் கருவியின் உருவாக்கத்துக்குப் பின்னணியில் இருந்த வழிமுறைகள் சர்ச்சைக்குரியவை.

இக்கருவியை உருவாக்க கூகுள் பின்பற்றிய ஆய்வு வழிமுறை statistical machine translation approach எனப்படும். அதாவது, ஒரே உரை இரண்டு மொழிகளில் மொழிபெயர்க்கப்பட்டிருந்தால், அது போல் இலட்சக்கணக்கான ஆவணங்களைப் படித்துப் பார்த்து, இரண்டு மொழிகளிலும் உள்ள ஈடான சொற்களைப் புரிந்து கொள்கிறது.

Fried rice, Vegetable rice, Egg rice

என்பது தமிழில்

வறுத்து சோறு, காய்கறிச் சோறு, முட்டைச் சோறு

என்று இருக்குமானால், rice = சோறு என்று குத்துமதிப்பாகப் புரிந்து கொள்ளும். இதற்கு, கணினிக்கு தமிழோ ஆங்கிலமோ தெரியவேண்டாம். ஆனால், தனித்தனிச் சொற்களைப் புரிந்து கொண்ட பிறகு, சரியான சொற்றொடர் அமைப்பை உருவாக்க அந்தந்த மொழிகளில் இலக்கண அமைப்புகளைப் புரிந்து கொள்ளவும், அதனைக் கணினிக்குப் புரிய வைப்பதற்கான கட்டளைத் தொடர்களை எழுதவும் குறிப்பிட்ட மொழி அறிவு தேவைப்படும்.

தமிழில் இவ்வாறான இரு மொழி ஆவணங்கள் பெருமளவில் கிடைக்காததால், கூகுளே இத்தகையை ஆவணங்களை உருவாக்க முனைந்தது. இதனை முன்னிட்டு, சில தொழில்முறை மொழிபெயர்ப்பாளர்களைப் பணியில் அமர்த்தி ஆங்கில விக்கிப்பீடியாவில் உள்ள கட்டுரைகளை மொழிபெயர்த்துத் தமிழ் விக்கிப்பீடியாவில் இடச் செய்தது. இதே போன்று இந்தி, தெலுங்கு, வங்காளம், கன்னடம் உள்ளிட்ட இந்திய மொழிகளிலும் செய்தது.

முதல் சில நூறு கட்டுரைகள் இவ்வாறு இடப்படும் வரை கூகுள் தான் இந்தப் பணியைச் செய்கிறது என்று புரியாமல் இருந்தது. பிறகு, தமிழ் விக்கிப்பீடியரான சுந்தர், எதேச்சையாக இப்பணியில் ஈடுபட்டுள்ள கூகுள்காரர் ஒருவரைச் சந்திக்க நேர்ந்ந பிறகே இது கூகுளின் பணி என்று தெரியவந்தது.

கூகுள் இவ்வாறு இட்ட கட்டுரைகள் நீளமாக, முழுமையாக இருந்தாலும் பல சிக்கல்கள் இருந்தன. இவ்வாறு எழுதப்பட்ட கட்டுரைகள் தமிழ் விக்கிப்பீடியாவின் தர எதிர்ப்பார்ப்பை நிறைவு செய்யவில்லை. எழுத்துப் பிழை, இலக்கணப் பிழை, சொற்றொடர் அமைப்புப் பிழை, தகவல் பிழை மலிந்து இருந்தன. கூகுள் கருவியை உருவாக்குவதற்கான தேவையை முன்னிட்டு மொழிபெயர்ப்புகள் ஏனோ தானோவென்று அமைந்திருந்தனவே தவிர, ஒருவர் அக்கட்டுரையைப் படித்துப் பயன் பெறுவாரா என்ற நோக்கில் அமையவில்லை.

எனினும், கூகுள் போன்ற பன்னாட்டு நிறுவனம் ஒன்று சரியான முறையில் விக்கிப்பீடியாவுக்குப் பங்களிப்பதற்கான பெரிய அளவிலான சாத்தியத்தை முன்னிட்டு, தமிழ் விக்கிப்பீடியா தானாக முன்வந்து கூகுளுடன் சேர்ந்து இத்திட்டத்தை ஒருங்கிணைக்கும் பணியை ஏற்றுக் கொண்டது. இந்த ஒருங்கிணைப்பின் படிப்பினைகளைப் பொருத்து திட்டத்தைப் பல்வேறு இந்திய மொழிகளிலும் திற்னபடச் செய்யலாம் என்று நினைத்தோம்.

எனினும் கூகுள், மொழிபெயர்ப்பு நிறுவனங்கள் இரண்டுமே ஓரளவுக்கு மேல் தத்தம் நலனையே முன்னிறுத்தினவே ஒழிய, தமிழ் விக்கிப்பீடியாவின் நலனைக் கருத்தில் கொள்ளவில்லை. கிட்டத்தட்ட ஓராண்டு கால ஒருங்கிணைப்பு, 20க்கும் மேற்பட்ட தமிழ் விக்கிப்பீடியர்களின் நூற்றுக்கணக்கான மணி நேரங்கள் செலவழிப்பு, பயிற்சிகள், நேரடிச் சந்திப்புகளுக்குப் பிறகு, சொல்லாமல் கொள்ளாமல் இத்திட்டத்தில் இருந்து கூகுள் விலகிக் கொண்டது. இத்திட்டத்தின் மூலம் 1,000+ கட்டுரைகள் தமிழ் விக்கிப்பீடியாவில் ஏற்றப்பட்டன. அவற்றின் தரம் நிறைவு அளிக்காததால், அதற்கு மேல் ஒரேயடியாக கட்டுரைகளை ஏற்ற மறுத்து, பல தரக்கட்டுப்பாடுகளை உருவாக்கியதால் தமிழ் விக்கிப்பீடியாவுக்கு ஏற்பட்ட சேதம் ஓரளவு கட்டுப்படுத்தப்பட்டது. இப்போதும், அவர்கள் விட்டுச்சென்ற கட்டுரைகளைச் சீர் செய்ய பல ஆயிரம் மணி நேரம் செலவு ஆகும். கூகுளின் போக்கு பிடிக்காமல், வங்காள விக்கிப்பீடியர்கள் தொடக்கத்திலேயே கூகுள் திட்டத்தைத் தடை செய்தார்கள். தமிழ் தவிர பிற இந்திய மொழி விக்கிப்பீடியாக்களில் இத்திட்டத்தை பெரிய அளவில் சீர்படுத்தவில்லை என்பதால், இவ்விக்கிப்பீடியாக்களின் தரம் வெகுவாகப் பாதிக்கப்பட்டுள்ளது.

விக்கிப்பீடியா என்றால் என்ன, அதன் சமூகத்தின் தன்மை என்ன, கொள்கை – செயல்பாடுகள் என்ன என்று ஏதும் புரிந்து கொள்ளாமல், கூகுள் சகட்டு மேனிக்குக் கட்டுரைகளை உருவாக்கியது தவறு. கூகுள் ஒரு தேடு பொறி என்பதால் அது தானே இணையத்தில் உருவாக்கும் உள்ளடக்கங்கள் தேடல் முடிவுகளில் வந்தால் அதன் முதன்மை நோக்கத்தோடு முரணாகும். இந்தக் காரணத்தாலேயே கூகுளின் இந்ந விக்கிப்பீடியா பணி பெரிதாக அறிவிக்கப்படவில்லை. தவிர, இந்திய மொழிகளை இணையத்தில் வளர்ப்பதற்கான முயற்சி போல் போலித்தனமாகச் செயல்பட்டார்களே ஒழிய, ஒரு போதும் இது தங்கள் கருவியை மேம்படுத்துவதற்கான ஆய்வு முயற்சி என்று வெளிப்படையாக ஒப்புக் கொள்ளவில்லை. இத்திட்டத்தின் போது கூகுளின் இணைந்து செயல்பட்டு நேரடியாக அவர்களின் பண்பை அறிந்ததன் மூலம், அந்நிறுவனத்தில் மேல் வைத்திருந்த மதிப்பு வெகுவாக குறைந்துள்ளது என்பதே உண்மை.

காண்க: சென்ற ஆண்டு விக்கிமேனியாவில், இத்திட்டத்தின் நிறை குறைகள் பற்றி நான் அளித்த கட்டுரை.

விக்கிப்பீடியா

(12 நவம்பர் 2009 புதிய தலைமுறை இதழில் வெளிவந்த விக்கிப்பீடியா அறிமுகம். என் நேரமின்மை காரணமாக, வெளிவந்த கட்டுரையின் இறுதிப்பகுதியை ஆசிரியர் குழு எழுதியது. இதழ் நடைக்கு ஏற்ப சில சிறிய மாற்றங்களும் உண்டு)

புதுக்கோட்டை மாவட்டம் மாங்குடி அரசு நடுநிலைப் பள்ளி. காவிரி ஆற்றைப் பற்றி ஒரு கட்டுரைப் போட்டி. மாணவர்கள் தமிழ் விக்கிப்பீடியா ( http://ta.wikipedia.org ) என்ற இணையத்தளத்துக்குச் செல்கிறார்கள். காவிரி ஆற்றுடன் நிற்காமல் அதனுடன் தொடர்புடைய குடகு, மேற்குத் தொடர்ச்சி மலை, வங்காள விரிகுடா பற்றியும் படித்துப் பார்க்கிறார்கள். “விக்கிப்பீடியாவின் வரவுக்குப் பிறகு மாணவர்கள் தங்கள் பாடத்திட்டத்துக்கு வெளியே உள்ளவற்றையும் ஆர்வத்துடன் கற்கிறார்கள். ஒரே மாதிரியான பாடநூல், நூலக கட்டுரைகளை மனப்பாடம் செய்வதில்லை. படைப்பூக்கம் கூடி இருக்கிறது. ஏன், ஆசிரியர்களே கூட தெரிந்து கொள்ள வேண்டிய பல விசயங்கள் விக்கிப்பீடியாவில் உள்ளன” என்கிறார் பள்ளியின் தலைமை ஆசிரியர் திரு. சோதிமணி.

இது என்ன விக்கிப்பீடியா?

விக்கிப்பீடியா ஒரு கலைக்களஞ்சியம். சொற்களுக்குப் பொருள் தெரிய வேண்டும் என்றால் அகராதி பார்க்கிறோம் அல்லவா? அதைப் போல் எந்தத் தலைப்பு பற்றியும் விரிவாகத் தெரிந்து கொள்ள கலைக்களஞ்சியங்களைப் பார்க்கலாம்.

மிக எளிமையான சிந்தனைகள் தான் உலகைப் புரட்டிப் போட்டிருக்கின்றன. 2001 ஆம் ஆண்டு விக்கிப்பீடியாவைத் துவக்கிய சிம்மி வேல்சு, லாரி சாங்கர் ஆகியோரின் சிந்தனையும் எளிமையான ஒன்று தான்:

“உலகில் உள்ள எல்லோருக்கும் அறிவு கிடைக்க வேண்டும்.

இதற்காக ஒரு கலைக்களஞ்சியத்தைக் கூட்டு முயற்சியில் உருவாக்குவோம். அதை யார் வேண்டுமானாலும் எப்படி வேண்டுமானாலும் மேம்படுத்தி இலவசமாகப் பயன்படுத்த உரிமை அளிப்போம். ”

இன்று, உலகில் கூடுதலாகப் பார்க்கப்படும் முதல் பத்து இணையத்தளங்களுள் விக்கிப்பீடியாவும் ஒன்று. ஆங்கில விக்கிப்பீடியாவில் மட்டும் 3 மில்லியன் கட்டுரைகள் உண்டு. நீங்கள் அறிய விரும்பும் எல்லா துறைகளும் விக்கிப்பீடியாவில் கிடைக்கும். கூகுளில் போய் தேடினால் கூட பெரும்பாலான முதற்பக்க முடிவுகள் விக்கிப்பீடியாவுக்கு இட்டுச் செல்லும். பலருக்கும் கூகுளும் விக்கிப்பீடியாவும் மட்டுமே இணையம் ! விக்கிப்பீடியாவின் வளர்ச்சிக்கு ஈடுகொடுக்க முடியாமல் Microsoft நிறுவனமே தன்னுடைய MSN Encarta திட்டத்தை நிறுத்திக் கொண்டது என்றால் பாருங்களேன் ! மனித வரலாற்றில் உருவான மிகப் பெரிய அறிவுத் தொகுப்பாக விக்கிப்பீடியா விளங்குகிறது.

தற்போது, 250க்கும் மேற்பட்ட உலக மொழிகளில் விக்கித்திட்டங்கள் இயங்குகின்றன. கலைக்களஞ்சியத்துக்குத் துணையாக, விக்கி அகராதி, விக்கி நூல்கள், விக்கி செய்திகள் என்று பல புதிய திட்டங்கள் வந்துள்ளன.

சரி, விக்கிப்பீடியாவால் தமிழருக்கு என்ன நன்மை?

தமிழில் தஞ்சைத் தமிழ்ப் பல்கலைக்கழகம் உருவாக்கிய கலைக்களஞ்சியங்கள், விகடன் தமிழாக்கிய பிரித்தானியா கலைக்களஞ்சியம் போன்றவை கிடைக்கின்றன. ஆனால், இவற்றை அனைவராலும் விலை கொடுத்து வாங்க முடியாது. அச்சு வடிவில் மட்டுமே இருக்கும். போகும் இடம் எல்லாம் தூக்கித் திரிய முடியாது. புதிய செய்திகள் இருக்கா. ஆங்கிலம் அறிந்தவர்கள் இணையத்தில் தகவல் தேடிப் படிக்க பல இணையத் தளங்கள் இருக்கின்றன. ஆனால், தமிழ் இணையத்தளங்கள் பலவும் அரசியல், திரைப்படம், விளையாட்டு, செய்திகள் என்ற வட்டத்திலேயே உள்ளன. தமிழ் மட்டுமே அறிந்த ஒருவர் இணையத்தின் மூலம் இலவசமாக பல துறை அறிவு பெற தமிழ் விக்கிப்பீடியா மட்டுமே தற்போது ஒரே வழி. பள்ளி மாணவர்கள் தங்கள் பாடத்திட்டம் தொடர்பான கட்டுரைகளைப் படிக்கலாம். கல்லூரி மாணவர்கள் தங்கள் துறை சார்ந்து உள்ள கட்டுரைகளைப் படிக்கலாம். முதற்பக்கத்தில் உள்ள பொது அறிவு, உலக நடப்புக் கட்டுரைகளைப் படித்துப் போட்டித் தேர்வுகளில் வெற்றி பெறலாம்.

உலகின் பல்வேறு பகுதிகளில் பணியாற்றிய அனுபவம் உள்ள துறை சார் வல்லுனர்கள் கட்டுரைகளை எழுதுகிறார்கள். இவர்களுடன் எந்தத் தயக்கமும் இன்றி ஒரு நண்பரைப் போல உரையாடி அவர்களின் அறிவையும் நட்பையும் பெற்றுக் கொள்ள இயல்வது எவ்வளவு பெரிய நன்மை? எடுத்துக்காட்டுக்கு, தமிழ் விக்கிப்பீடியாவுக்குப் பங்களிக்கும் வல்லுனர்கள் பட்டியல்.

பேராசிரியர்கள் – வி. கிருஷ்ணமூர்த்தி (கணிதம்), செ. இரா. செல்வக்குமார் (மின்னணுவியல்)

முதுகலை ஆசிரியர் – சு. இரவிசங்கர் ( இயற்பியல்)

முனைவர் பட்ட ஆய்வு மாணவர்கள் – கார்த்திக் பாலா (காட்டுயிர்கள்), ரெங்கராசு (பொறியியல்)

அறிவியல் ஆய்வாளர்கள் – தானியல் பாண்டியன் (மருத்துவம்), மகிழ்நன் (உயிரித் தொழில்நுட்பம்), கலையரசி (மூலக்கூற்று உயிரியல்), இரா. செல்வராசு (வேதியியல்).

மென்பொருளாளர்கள் – சுந்தர், சிவக்குமார், நற்கீரன், மயூரன், உமாபதி, கோபி, சிறீதரன், விஜி பழனியப்பன், அராப்பத்

கல்லூரி மாணவர்கள் – ராஜ்குமார் (இசை), நிரோஜன் சக்திவேல் (திரைப்படம்), சிந்து (இசை), கலாநிதி (கணக்கு வழக்குகள்)

ஈழத்து நாடகக் கலைஞர் – கே. எஸ். பாலச்சந்திரன் (நாடகம்)

எழுத்தாளர்கள் ஜெயமோகன், அ. முத்துலிங்கம் ஆகியோர் தங்கள் கட்டுரைகள் சிலவற்றை உரிமம் விலக்கிப் பதிப்பிக்கத் தருகிறார்கள்.

விக்கிப்பீடியாவில் கட்டுரைகளைப் படிப்பது எப்படி?

1. http://ta.wikipedia.org என்ற இணைய முகவரிக்குச் செல்லுங்கள்.

2. தளத்தின் இடப்பக்கத்தில் ஒரு தேடல் பெட்டி இருக்கும். அதில் நீங்கள் தேடும் தலைப்பை உள்ளிட்டு “செல்” என்ற பொத்தானை அழுத்தினால் கட்டுரைப் பக்கத்துக்கு அழைத்துச் செல்லும்.

நீங்கள் விரும்பும் கட்டுரைகள் தளத்தில் இல்லையா? ஒவ்வொரு விக்கிப் பக்கத்தின் மேலும் “உரையாடல்” என்று ஒரு பொத்தான் உண்டு. அதனை அழுத்தி உங்கள் வேண்டுகோளை இட்டு “மாற்றங்களைச் சேமிக்கவும்” என்ற பொத்தானை அழுத்துங்கள். உங்கள் தேவைக்கு ஏற்ற கட்டுரைகளை மற்ற விக்கிப் பங்களிப்பாளர்கள் உருவாக்கித் தருவார்கள்.

விக்கிப்பீடியாவுக்கு நீங்கள் எப்படி பங்களிக்கலாம்?

சமூகம், மொழி, கல்வி வளர்ச்சிக்கு ஏதாவது செய்ய வேண்டுமே என்று நினைப்பவரா நீங்கள்? அப்படி என்றால், தமிழ் விக்கிப்பீடியாவுக்குப் பங்களிப்பது சரியான வழி. தமிழ் விக்கிப்பீடியாவில் தற்போது ஏறத்தாழ 19, 800 கட்டுரைகளே உள்ளன. பல்வேறு அடிப்படைத் தலைப்புகளில் ஒரு இலட்சம் கட்டுரைகளையாவது விரிவாக விரைந்து எழுதினாலே தமிழ் விக்கிப்பீடியா நல்ல பயன் தரும்.

உங்களிடம் ஒரு கணினி, இணைய இணைப்பு இருந்தால் ஓய்வு நேரத்தில் விக்கிப்பீடியாவுக்குப் பங்களிக்கலாம். கணினியில் தமிழில் எழுதப் பழகுங்கள். பங்களிப்பதற்கு யாருடைய ஒப்புதலும் கல்வித் தகுதியும் தேவை இல்லை. நல்ல நோக்கம் மட்டும் போதும். உங்களுக்கு விருப்பமான எந்தத் துறை பற்றியும் தகவல்களைக் குவித்து எழுதலாம். எடுத்துக்காட்டுக்கு, உங்களுக்கு கிரிக்கெட் மீது ஆர்வமா? கிரிக்கெட் விளையாட்டின் விதிமுறைகள், வரலாறு, இந்திய அணியின் வீரர்கள், உலகக் கோப்பை கிரிக்கெட் போட்டிகள் பற்றி கட்டுரைகள் எழுதலாம். மற்ற பங்களிப்பாளர்கள் உங்கள் கட்டுரைகளைத் திருத்தி மேம்படுத்துவர். ஏற்கனவே உள்ள கட்டுரைகளில் பொருத்தமான படங்கள் சேர்க்கலாம். பிழை திருத்தலாம். விரிவாக்கி எழுதலாம். தகவல்களைச் சரி பார்க்கலாம். உங்களின் ஒவ்வொரு பங்களிப்பும் உங்கள் பெயரில் பதிவாகும். காலத்துக்கும் நிலையாக இருக்கும். விக்கிப்பீடியா ஒரு இலாப நோக்கற்ற திட்டம். எனவே, உங்கள் உழைப்பு வருங்காலத் தமிழ்ச் சமூகம் முழுமைக்கும் இலவசமாக கிடைக்கும்.

விக்கிப்பீடியாவில் குறையே இல்லையா?

விக்கிப்பீடியாவில் யார் வேண்டுமானாலும் எழுதினால் அதை எப்படி நம்புவது, யாராவது தவறான தகவலைத் தர மாட்டார்களா என்று நினைக்கலாம். Nature ஆய்விதழ் விக்கிப்பீடியாவின் 42 அறிவியல் கட்டுரைகளை பிரித்தானிக்கா கலைக்களஞ்சியத்தோடு ஒப்பிட்டுப் பார்த்தது. இரண்டும் கிட்டத்தட்ட ஒரே தரத்திலேயே இருந்தன. பிரித்தானிக்கா நூற்றாண்டு வரலாறு கொண்டது. விக்கிப்பீடியா தோன்றி 8 ஆண்டுகளே ஆகின்றன. இன்னும் பலரும் பங்களிக்கத் தொடங்கும் போது விக்கிப்பீடியாவின் நம்பகத்தன்மை கூடுவது உறுதி. 24 மணி நேரமும் உலகின் பல பகுதிகளில் உள்ள தன்னார்வலர்கள் விக்கிப்பீடியாவில் நிகழும் மாற்றங்களைக் கண்காணித்துக் கொண்டிருக்கிறார்கள். தவறான தகவல் எதுவும் சேர்ந்தால் உடனே நீக்கி விடுகிறார்கள். விக்கிப்பீடியாவில் உள்ள தகவல்களைச் சரிபார்த்துப் பயன்படுத்தவே பரிந்துரைக்கிறோம். எனவே, ஒரு துறையில் உள்ள தகவல்களுக்கு நுழைவாயில் என்ற அளவில் விக்கிப்பீடியாவைத் தாராளமாகப் பயன்படுத்தலாம்.

விக்கிப்பீடியா ஒரு கலைக்களஞ்சியம் என்பதைத் தாண்டி ஒரு உலகாளவிய பண்பாட்டுப் புரட்சி. எந்த அதிகார அமைப்பும் இல்லாமல், மனிதர்கள் தங்களின் இயல்பான ஒன்று கூடி வாழும் குணத்தால் அரிய அறிவுச் செல்வங்களை உருவாக்க முடியும் என்பதற்குச் சான்று.

இந்த விக்கிப்பீடியா தேரை ஊர் கூடி இழுப்போம் வாருங்கள். தேர் வரக் காத்திருக்கும் மாங்குடிகள் நிறைய இருக்கின்றன…

***
பெட்டிச் செய்தி 1:

தமிழ் விக்கித் திட்டங்கள்

* http://ta.wikipedia.org
* http://ta.wiktionary.org
* http://ta.wikinews.org
* http://ta.wikisource.org
* http://ta.wikibooks.org

பெட்டிச் செய்தி 2:

மயூரநாதன், ஐக்கிய அரபு அமீரகத்தில் பணியாற்றும் கட்டிடக் கலைஞர். யாழ்ப்பாணத்தைச் சேர்ந்தவர். 2003ல் தமிழ் விக்கிப்பீடியாவைத் தொடங்கி கட்டியெழுப்பிய முன்னோடி. இன்று வரை 3000 க்கும் மேற்பட்ட கட்டுரைகளை எழுதி உள்ளார். இவரைப் போல பல பேராசிரியர்கள், மென்பொருளாளர்கள், அறிவியல் ஆய்வாளர்கள், பல்கலைக்கழக மாணவர்கள், எழுத்தாளர்கள் பலர் உலகெங்கும் இருந்து தமிழ் விக்கிப்பீடியாவில் கட்டுரைகள் எழுதுகிறார்கள்.

பெட்டிச் செய்தி 3:

தமிழ் விக்கிப்பீடியா பயன்படுத்த, அதில் கட்டுரைகள் எழுத உங்களுக்கு உதவி வேண்டுமா? tamil.wikipedia@gmail.com என்ற முகவரிக்கு எழுதுங்கள். அல்லது, 99431 68304 அழையுங்கள்.

நவம்பர் 7 – கோவையில் தமிழ்க் கணிமை ஆர்வலர் சந்திப்பு

கோவையில், நவம்பர் 7, 2009 சனிக்கிழமை அன்று தமிழ்க் கணிமை ஆர்வலர் சந்திப்பு நடைபெறுகிறது.

குமரகுரு பொறியியல் கல்லூரி கணினி அறிவியல் துறையைச் சேர்ந்த முனைவர். முத்துக்குமார் இந்த ஒன்று கூடலை ஏற்பாடு செய்திருக்கிறார்.

உத்தமம் அமைப்பின் செயலாளார் திரு. வா. மு. செ. கவியரசன் அவர்கள் தலைமையேற்று உத்தமத்தின் செயல்பாடுகளை விளக்குவார். அடுத்து விக்கிப்பீடியா, தமிழ் இணையம், வலைப்பதிவுகள், தமிழ்மணம் முதலிய திரட்டிகள் பற்றி நண்பர்கள் விளக்குவோம். மற்ற கல்லூரிகளில் இருந்தும் தமிழார்வல மாணவர்கள், ஆசிரியர்கள் வருகிறார்கள். மாணவர்கள் என்னென்ன தமிழ்க் கணிமைத் திட்டங்களில் ஈடுபடலாம், அவற்றுக்கு யார் உதவியைப் பெறலாம் என்பது குறித்து கலந்துரையாடுவது கூட்டத்தின் முக்கிய நோக்கமாக இருக்கும்.

அனைத்து விக்கிப்பீடியா, வலைப்பதிவு, தமிழ்க் கணிமை ஆர்வலர்களையும் இந்த ஒன்று கூடலுக்கு வரவேற்கிறோம். நன்றி.

இடம்: குமரகுரு பொறியியல் கல்லூரி, கோவை.

D-தொகுதி கருத்தரங்க அறை (முதல் தளம். உணவகத்துக்கு எதிர்ப்புறம்.)

நேரம்: நவம்பர் 7, 2009 சனிக்கிழமை. பகல் 2.00 முதல் 4.00 மணி வரை.

வழி: சரவணம்பட்டி, அன்னூர் செல்லும் பேருந்துகள். பேருந்து எண் 45. பேருந்து நிறுத்தத்தில் இருந்து தானி மூலம் கல்லூரிக்கு வர 30 ரூபாய்.

உதவிக்கு: 99444 36360

தமிழ் விக்கிப்பீடியாவில் கிரந்தம்

1. தமிழ் விக்கிப்பீடியாவில் கிரந்தம் கொண்டு எழுதலாமா கூடாதா?

எழுதலாம். கிரந்தம் தவிர்த்து தான் எழுத வேண்டும் என்று யாரும் கட்டாயப்படுத்த மாட்டார்கள்.

2. தமிழ் விக்கிப்பீடியாவில் கிரந்தம் பயன்பாட்டில் உள்ளதா?

தமிழ் விக்கிப்பீடியாவில் கிரந்த எழுத்தில் தொடங்கும் கட்டுரைகள் பட்டியலைக் கீழே காணலாம். இவை தவிர, கட்டுரை உரைகளில் ஆயிரக்கணக்கான இடங்களில் கிரந்த எழுத்துகள் உள்ளன. இவை எல்லாவற்றையும் நீக்கி தமிழ் எழுத்துகளுக்கு மாற்றும் திட்டம் ஏதும் இல்லை. அதற்குத் தேவையும் இல்லை. சாத்தியமும் இல்லை.

தமிழ் விக்கிப்பீடியாவில் ஸ என்ற எழுத்தில் தொடங்கும் கட்டுரைகள்

தமிழ் விக்கிப்பீடியாவில் ஷ என்ற எழுத்தில் தொடங்கும் கட்டுரைகள்

தமிழ் விக்கிப்பீடியாவில் ஹ என்ற எழுத்தில் தொடங்கும் கட்டுரைகள்

தமிழ் விக்கிப்பீடியாவில் ஜ என்ற எழுத்தில் தொடங்கும் கட்டுரைகள்

தமிழ் விக்கிப்பீடியாவில் ஸ்ரீ என்ற எழுத்தில் தொடங்கும் கட்டுரைகள்

3. தமிழ் விக்கிப்பீடியாவில் கிரந்தப் பயன்பாடு குறித்த கொள்கை என்ன?

இதுவரை தமிழ் விக்கிப்பீடியாவில் கிரந்தப் பயன்பாடு குறித்த உறுதியான வழிகாட்டல் ஏதும் இல்லை. விரைவில் இது குறித்த வழிகாட்டுக் கொள்கை ஒன்றைப் பொதுவில் முன்வைத்து உரையாடி, தேவையான மாற்றங்களைச் செய்வோம். இக்கொள்கை கிரந்தத்தை முற்றிலும் நீக்காது. குறிப்பாக, தமிழர் பெயர்கள், கலைப்படைப்புகள், ஊர்ப்பெயர்களில் உள்ள கிரந்த எழுத்துகளை ஏற்று எழுதுவதற்கான பொதுவான புரிந்துணர்வு உண்டு.

4. விக்கிப்பீடியாவில் ஏன் கிரந்தத்தை எல்லா இடங்களிலும் ஏற்றுக் கொள்ளக்கூடாது?

கிரந்தம் விடுத்து எழுதுவது தமிழ் விக்கிப்பீடியர்களின் கண்டுபிடிப்போ திணிப்போ இல்லை. ஆழ்வார்கள், நாயன்மார்கள், கம்பன், பாரதி முதற்கொண்டு பல நூற்றாண்டுகளாக கிரந்தம் விடுத்து எழுதும் வழக்கம் இருக்கிறது. ஓட்டல், இந்தி, இமயம் என்பது போன்று பரவலான மக்கள் புழக்கத்தில் உள்ள சொற்கள் கிரந்தம் விடுத்து எழுதப்பட்டவையே. இந்த வரலாற்று, மக்கள் வழக்கத்தைப் பின்பற்றியும் தகுந்த காரணங்களைச் சுட்டியும் கிரந்தம் விடுத்து எழுதலாமே என்று மற்ற பங்களிப்பாளர்கள் கோரலாம்.

எடுத்துக்காட்டு 1: கிரந்த எழுத்து துல்லியமான ஒலிப்பு தராத போது.

எடுத்துக்காட்டு 2: பயன்பாடு அருகி வரும் க்ஷ போன்ற எழுத்துகளைப் பயன்படுத்தினால்.  இலக்ஷம் என்பதற்குப் பதில் இலட்சம் என்று எழுதலாமே என்று ஒருவர் கேட்கலாம்.

எடுத்துக்காட்டு 3: கிரந்தம் விடுத்து எழுதும் வழக்கு கூடுதலாக இருந்தால். ஹிந்தி, ஹிந்து என்பதை விட இந்தி, இந்து ஆகியவை கூடுதலாகப் புழக்கத்தில் உள்ளன.

5. ஏன் தமிழ் விக்கிப்பீடியாவில் கிரந்தத்தை முன்னிட்டு சர்ச்சைகள் எழுகின்றன?

நீங்கள் எப்படி வேண்டுமானாலும் உங்கள் வலைப்பதிவில் எழுதலாம். யாரும் உங்களைக் கேள்வி கேட்டு மாற்ற முடியாது. நீங்கள் ஒரு வார இதழுக்கு எழுதும் கட்டுரையை, இதழாசிரியர் எப்படி வேண்டுமானாலும் மாற்றி வெளியிடலாம். நீங்கள் அவரைக் கேள்வி கேட்க முடியாது 🙂 ஆனால், விக்கி ஒரு கூட்டாக்கம். நீங்கள் எழுதுவதை எல்லாரும் கேள்வி கேட்கலாம். எல்லாரும் மாற்றலாம். விக்கியின் மொழி நடை உட்பட்ட அனைத்துக் கூறுகளும் கலந்துரையாடி எடுக்கும் பொது முடிவுக்கும் மாற்றத்துக்கும் உட்பட்டவையே. இந்தக் கூட்டுச் செயற்பாடுகளும் கூட்டு எழுத்தாக்கமும் தமிழுக்குப் புதிது.

எப்படி கிரந்த எழுத்தை விடுத்து எழுத வேண்டும் என்று கட்டாயப்படுத்த முடியாதோ அதே போல் கிரந்தம் சேர்த்து தான் எழுத வேண்டும் என்றும் கட்டாயப்படுத்த இயலாது. இரு வேறு கருத்து நிலைகள் உள்ளோர் கூடிச் செயலாற்றும் போது கருத்து வேறுபாடுகள் எழுவது இயல்பு. ஒரே வகையான கருத்து முரண்பாடுகள் வந்தால், அவை பற்றி பேச்சுப் பக்கத்தில் உரையாடுகிறோம். ஒரு கருத்து உரையாடலில் இருக்கும் போது, அதே வகை மாற்றங்களைத் தொடர்வதைத் தவிர்க்கிறோம். ஆனால், கிரந்தம் கலந்து எப்படி எழுதினாலும் கேள்வி கேட்காமல் அப்படியே ஏற்றுக் கொள்ள வேண்டும் என்று சிலர் எதிர்பார்க்கத் தொடங்கும் போது சர்ச்சைகள் வருகின்றன. சோவியத் யூனியை சோவியத் ஒன்றியம் என்று மாற்றினால் கூட தனித்தமிழ் வெறி என்கிறார்கள். இவர்களிடம் என்னவென்று உரையாட?

தமிழ் விக்கிப்பீடியா மீதான விமர்சனங்களும் பதில்களும்

1. தமிழ் விக்கிபீடியாவில் இலங்கைத் தமிழ் நடை கூடுதலாகத் தென்படுகிறதே?

தமிழ் விக்கிப்பீடியா தொடக்கம் முதல் பெருமளவு ஈழத்தமிழர்கள் ஆர்வத்துடன் பங்களித்து வருகிறார்கள். அவர்கள் நடையிலேயே அவர்கள் எழுதுவது இயல்பான ஒன்று. நாமும் கட்டுரை எழுதாமல், எழுதுவோரையும் எங்கள் நாட்டுத் தமிழ் நடையில் எழுதுங்கள் என்று கோருவது பண்பாடன்று.  எனினும், பன்னாட்டுத் தமிழருக்கும் புரிய வேண்டும் என்ற நோக்கில் அவர்களும் பெருமளவு பொதுவான சொற்களைப் பயன்படுத்தியே எழுத முயல்கிறார்கள். சில கலைச்சொற்கள், ஈழம் சார் சொற்களுக்கு மாற்றுச் சொல் இல்லாத நிலையிலும் பிற நாட்டுச் சொற்களைக் காட்டிலும் ஈழச் சொற்கள் பொருத்தமாகவும் இருக்கையில் ஈழ வழக்கே முதன்மை வழக்காக இருக்கிறது.

பல நாட்டுத் தமிழரும் ஒன்று கூடி ஒரு கூட்டு முயற்சியில் இறங்குவது புதிது. இதில் பெரும்பான்மை முதலிய வாதங்களை முன்வைத்து ஒரு நாட்டு வழக்கை மட்டும் திணிக்க இயலாது. அதே வேளை, தமிழை வளப்படுத்தவும் இது ஒரு வாய்ப்பு.  தமிழ் இணையம் தோன்றிய பிறகு, எத்தனையோ ஈழத்து வழக்குச் சொற்களை உள்வாங்கி இருக்கிறோம். எடுத்துக்காட்டுக்கு, அவதானிக்கிறேன், பகிடி, கதைக்கிறேன் போன்ற சொற்கள். எப்படி, பிரித்தானிய ஆங்கிலம், அமெரிக்க ஆங்கிலம் ஆகிய இரண்டும் இருந்தும் ஒன்றை ஒன்றைப் புரிந்து கொண்டு செயல்பட முடிகிறதோ அதே போன்று தமிழிலும் பல நாட்டு வழக்குகளைப் பற்றிய புரிதலும் ஏற்பும் வர வேண்டும்.

பல நாட்டுத் தமிழர், குறிப்பாக, தமிழ்நாட்டுத் தமிழர் கூடிய அளவில் தமிழ் விக்கிப்பீடியாவுக்குப் பங்களிக்கத் தொடங்குவதே ஒரு நடுநிலையான பொதுத் தமிழ் நடை வர உதவும்.

2. தமிழ் விக்கிப்பீடியா நடை கடினமாக இருக்கிறதே? ஆங்கில விக்கிப்பீடியா புரிந்து கொள்ள இலகுவாக இருக்கிறதே?

தமிழ் விக்கிப்பீடியாவைப் பள்ளி மாணவர்களும் புரிந்து கொள்ளுமாறு எழுதவே விரும்புகிறோம். இன்னும் நிறைய பேர் பங்களித்து கட்டுரைகளை எளிமையாக எழுத உதவ வேண்டும். ஆங்கில விக்கிப்பீடியா 8 ஆண்டுகளுக்கும் மேல் இலட்சக்கணக்கான பங்களிப்பாளர்களால் சீர்செய்யப்பட்டு வருகிறது. தற்போது தான் வளரத் தொடங்கி உள்ள தமிழ் விக்கிப்பீடியாவில் உடனடியாக அந்த சீர்மையை எதிர்பார்க்க இயலாது.

ஒரு கட்டுரையைப் புரிந்து கொள்ள அத்துறை அறிவு, மொழியறிவு இரண்டுமே தேவை. எவ்வளவு தான் ஆங்கில அறிவு இருந்தாலும், ஆங்கிலத்தில் உள்ள சட்ட ஆவணத்தையோ மருத்துவ ஆவணத்தையோ சட்டென புரிந்து கொள்வது கடினம். எல்லோருக்கும் புரிகிற வெகுமக்கள் ஊடக சொற்களை மட்டும் வைத்துக் கொண்டு அனைத்து அறிவுத் துறைகளையும் தமிழில் எழுதி விட முடியாது. தமிழ் விக்கிப்பீடியாவில் உள்ள பல கட்டுரைகள் தமிழ்ச் சிந்தனைத் தளத்தில் புதிதாக எழுதப்படுவன. இத்துறைகளுக்குத் தேவையான புதிய கலைச்சொற்களை உருவாக்குவதும் புரிந்து கொள்ள முயல்வதும் தவிர்க்க இயலாதது.

பள்ளிக்கூடத்துக்குப் பிறகு பெரும்பாலான வாசிப்பை ஆங்கிலத்தில் கொண்டிருப்பவர்கள், இலக்கியம்-வெகுமக்கள் பொழுது போக்கு இதழ்கள் என்ற குறுகிய வட்டத்திலேயே தமிழ் வாசிப்பு உள்ளவர்கள், ஆங்கில வழியில் படித்தவர்கள் ஆகியோருக்குத் தமிழ் விக்கிப்பீடியா சற்று கடினமாக இருப்பது எதிர்பார்த்ததே. தமிழை விட ஆங்கிலம் நன்றாகப் புரிந்தால், தயவு செய்து ஆங்கில விக்கிப்பீடியாவே பயன்படுத்துங்கள். அல்லது, தமிழ் கற்றுக் கொள்ள முயற்சி செய்யுங்கள். தமிழ் மட்டுமே அறிந்ந, தமிழ் வழியில் அறிவு பெற விரும்புவோருக்காக மட்டுமே தமிழ் விக்கிப்பீடியா எழுதப்படுகிறது.

3. தமிழ் விக்கிப்பீடியாவில் ஏன் பல துறை கட்டுரைகள் இல்லை? ஏன் ஒரு சில துறைகள் குறித்து நிறைய கட்டுரைகள் உள்ளன? ஏன் விரிவான கட்டுரைகள் இல்லை?

தமிழ் விக்கிப்பீடியா 2003 முதல் இயங்குகிறது. இதில் முனைப்புடன் தொடர்ந்து பங்களிப்போர் 20-25 பேர் தான்.

தமிழ் விக்கிப்பீடியாவில் 18,000+ கட்டுரைகள் என்று சொன்னாலும், அவற்றில் பெரும்பான்மை குறுங்கட்டுரைகளே. பல முக்கிய துறைகளில் அடிப்படை கட்டுரைகளே கூட இல்லை. இருக்கும் கட்டுரைகள் பல ஒரே துறை சார்ந்தவை. இவை பங்களிக்கும் சிலரின் ஆர்வப் புலங்கள் சார்ந்து வருபவை. கட்டுரைகளில் இலக்கண, எழுத்துப் பிழைகள் மலிந்து உள்ளன. பல தகவல்கள் இற்றைப்படுத்த வேண்டும். இவை யாவும் தமிழ் விக்கிப்பீடியர் மிகவும் நன்கு உணர்ந்த குறைகள். வெளியில் இருந்து வரும் விமர்சனங்களை விட, தமிழ் விக்கிப்பீடியர் இவை குறித்து இரு மடங்கு கவலையையே கொண்டுள்ளோம். ஆனால், விமர்சிப்பவர், ஆலோசனை கூறுவோர் எவரும் ஒரு துளி பங்களிப்பைக் கூடச் செய்யாமல் எம்மால் எப்படி இவற்றைச் சரி செய்ய இயலும்?

மற்றபடி கட்டுரை எண்ணிக்கை குறித்த வெற்றுப் பெருமை ஏதும் எமக்கில்லை. தமிழ் விக்கிப்பீடியாவின் தரத்தைத் தொடர்ந்து கவனித்து வருகிறோம். இது தொடர்பான பின்வரும் பக்கங்களைப் பார்க்கலாம்:

http://ta.wikipedia.org/wiki/விக்கிப்பீடியா:தமிழ்_விக்கிப்பீடியா_தரக்_கண்காணிப்பு

http://ta.wikipedia.org/wiki/விக்கிப்பீடியா:Tamil_Wikipedia:_A_Case_Study

மற்ற பல இந்திய விக்கிப்பீடியாக்களை விட, வெற்று எண்ணிக்கையைப் பெருக்கும் கட்டுரைகளை மிகவும் தீவிரமாக எதிர்த்து வருகிறோம். கண்டிப்பாக இனி வரும் காலத்தில் கட்டுரைகளின் துறைப் பரப்பு, ஆழத்தைப் பெருக்க கவனம் செலுத்துவோம்.

4. தமிழ் விக்கிப்பீடியாவில் திரைப்படம் போன்ற ஒரு சில துறை சார் கட்டுரைகள் மலிந்திருப்பது ஏன்?

தமிழ் விக்கிப்பீடியாவில் திரைப்படம், இன்னும் சில துறைகள் குறித்த பெருவாரியான கட்டுரைகள் உள்ளது உண்மை தான். இதற்கு காரணம், தமிழர்களின் பொது ஆர்வமாக திரைப்படம் இருப்பதே. பெரும்பான்மை தமிழர்கள் திரைப்படம் குறித்து தேடுகிறார்கள். அவர்கள் இதன் மூலமாவது விக்கிப்பீடியாவை வந்தடையட்டுமே என்ற நோக்கம் தான். நான் ஆங்கில விக்கியை அதிகம் பயன்படுத்துவதே உலகத் திரைப்படங்கள் பற்றி அறியத் தான். எந்தத் துறையாகினும் அதில் நல்ல உள்ளடக்கத்தைத் தர முயல்வோம்.

இன்னொரு முக்கிய காரணம், திரைத்துறையில் ரசிகர்கள் கூடுதல். விக்கிப்பீடியாவில் அரசியல் கட்டுரைகளின் பிரச்சினைகளை விமர்சித்துக் கொண்டே ஒரு கட்டுரையும் எழுதாமல் இருப்பவர்களைப் போல் அல்லாமல் ரசிகர்கள் தங்கள் விருப்பத் துறை குறித்து கட்டுரைகளை எழுதித் தள்ளுகிறார்கள். இத்திரைப்படம் சார் கட்டுரைகள் பலவும் கனடாவில் உள்ள 20 வயது இளைஞர் நிரோசன் சக்திவேலால் எழுதப்பட்டது. ஆங்கில விக்கிப்பீடியாவிலும் நிகழ்பட ஆட்டங்கள் முதற்கண்டு பல துறைகளில் இப்படி ஏராளமான கட்டுரைகள் உள்ளன. ஒரு துறையில் கட்டுரையில் மலிந்திருக்கிறது என்றால் அவர்களைப் பாராட்ட வேண்டும். பிற துறை ஆர்வலர்கள் எழுதாமல் விட்டது அவர்கள் தவறுதல் அல்லவா?

5. தமிழர்கள் கூட்டு உழைப்புக்கு பழகியவர்களா? இத்திட்டம் தமிழகத்தில் வெற்றி பெறுமா?

“தமிழர்கள் கூட்டு உழைப்புக்குப் பழகாதவர்கள், விக்கிப்பீடியா முறைமை ஒத்துவராது” என்ற கூற்றை ஒத்துக் கொள்ள மாட்டேன். இன்னும் போதுமான அளவு நாம் சரியான தமிழர்களை இனங்காணவில்லை என்பதே பிரச்சினை.

பங்களிப்பு குறைவுக்கான காரணங்களை தன்னார்வத் தமிழிணையத் திட்டங்களுக்குப் பங்களிப்பு குறைவாக இருப்பது ஏன் என்ற கட்டுரையில் பார்க்கலாம்.

2001ல் தொடங்கிய ஆங்கில விக்கிப்பீடியாவை ஒரு மாணவனாகிய நானே 2005ல் தான் அறிந்து கொண்டேன். விக்கிப்பீடியா என்று ஒன்று இருப்பதை இன்னும் பல இணையப் பயனர்களுக்குத் தெரியவில்லை. தெரியாமல் பயன்படுத்திக் கொண்டிருபோர் பலர். ஆங்கில விக்கிப்பயனர்களிலேயே கூட தமிழ் விக்கி என்று ஒன்று இருப்பது தெரியாதோர் பல. இருப்பது தெரிந்தும், விக்கிப்பீடியாவில் உள்ள கட்டுரைகளை நாமே எழுதலாம் என்று அறியாதோர் பலர். என்னுடைய post doc படிக்கும் நண்பர் ஒருவருக்கே நான் இது பற்றிச் சொல்லப் போகத் தான் தெரிந்தது. இது ஒரு விழிப்புணர்வுப் பிரச்சினை. 2009ல் தமிழ் விக்கி பற்றி அறிந்த ஒரு பயனர் 300க்கும் மேற்பட்ட ஆழமான கட்டுரைகளை எழுதி உள்ளார். அவருக்கு 2003லேயே தெரிந்திருந்தால் எவ்வளவு கூடுதலாகப் பங்களித்திருக்க இயலும்? இன்றும் தமிழ் விக்கி பற்றி புதிதாக அறிந்து கொள்வோர், “ஆகா, இது முன்பே தெரியாமல் போனதே” என்று வருந்துகிறார்கள். எம்முடைய இலக்கு விக்கிப்பீடியா பற்றி தெரிந்தும் பங்களிக்க விரும்பாதோர் குறித்து அல்ல. தெரிந்தால் பங்களிக்கக்கூடியவர்களைச் சென்றடைவதே.

6. தமிழ் விக்கிப்பீடியாவுக்குப் பங்களிக்க விரும்புகிறேன். ஆனால், விக்கி மென்பொருளைப் புரிந்து கொள்ள முடியவில்லையே?

விக்கி மென்பொருளை மின்மடல், பிளாகர் போல மேலும் இலகுவாக்க முயற்சிகள் நடந்து வருகின்றன. தமிழ் விக்கிப்பீடியாவில் உள்ள உதவிப் பக்கங்களையும் கூட்டி வருகிறோம். விக்கியில் பங்களிப்பதற்கான உதவியை எந்தப் பக்கத்தில் வேண்டினாலும் நிச்சயமாக மற்ற பயனர்கள் உதவுவர்.

7. விக்கிப்பீடியாவின் நிருவாகிகள், அதிகாரிகள் வைத்தது தான் சட்டமா? ஏன் இந்த அதிகார அமைப்பு?

குறிப்பு: விக்கிப்பீடியாவின் அதிகார அமைப்பு பற்றிய விமர்சனங்கள் பெரும்பாலும் ஆங்கில விக்கிப்பீடியா அனுபங்களை வைத்தே. கீழ்க்காணும் குறைகள் தமிழ் விக்கிப்பீடியாவுக்குப் பொருந்தா.

விக்கிப்பீடியாவில் எல்லா பக்கங்களையும் மாற்றி எழுத எல்லாருக்கும் உரிமை உண்டு. ஆனால், விக்கிப்பீடியா வளர வளர வேண்டுமென்றே தவறான தகவல்களை எழுதும் விசமிகளும் வந்து சேர்கிறார்கள். எனவே, தவறான தகவல்களைக் கண்காணித்து நீக்கவும், விசமிகளைத் தடுக்கவும் சில பயனர்களுக்கு கூடுதல் பொறுப்புகள் வழங்கப்படுகின்றன. இது கிட்டத்தட்ட காவல்காரன், கூப்பை கூட்டுபவன் வேலை தான். இந்தப் பொறுப்பையும் எல்லாருக்கும் விட்டால், விசமிகள் அவற்றைப் பயன்படுத்தியே விக்கிப்பீடியாவை அழிப்பர். எனவே, தொடர்ந்தும் விக்கிப்பீடியாவுக்குப் பங்களிக்கும் நம்பகமான பயனர்களுக்கு திறந்த முறையில் வாக்கெடுப்புகள் நடத்தி பொறுப்புகள் வழங்கப்படுகின்றன. ஒரு சில பக்கங்களில் தொடர்ந்து தீவிரமான விசம வேலைகள் நடந்தால், அந்தப் பக்கத்தைப் நிரந்தரமாகவோ தற்காலிகமாகவோ பூட்டி வைக்கவும் வேண்டி வருகிறது. புதிதாக வரும் சில பங்களிப்பாளர்களால் இப்பக்கங்களைத் தொகுக்க இயலாமல் இருக்கிறது. ஆங்கில விக்கிப்பீடியாவில் ஒரு சில நிருவாகிகளின் நுண்ணரசியல் காரணமாக இந்த அதிகார அமைப்பே கேள்விக்குள்ளாகிறது.

மனிதர்கள் கூடி இயங்கும் எல்லா இடங்களிலும் ஏதோ ஒரு வகையில் அதிகார அடுக்கு வருகிறது என்றே நினைக்கிறேன். அதிகார அடுக்கு இல்லாமல் செயல்படுவது சாத்தியமா, அத்தகைய அமைப்பு வருமா என்று தெரியவில்லை. ஆனால், இந்த அடுக்குமுறை ஏற்பாடு சமூகத்தில் உள்ள வழமையே என்று புரிந்து கொள்வது முக்கியம். எப்படி ஒரு ஊருக்குள் வந்த புதியவன் அல்லது அந்த ஊரில் உள்ள இளைஞன் சிறிது சிறிதாக நல்லது செய்து மக்களுக்கு அறிமுகமாகி கூடுதல் பொறுப்புகளைப் பெற்றுக் கொள்கிறானோ அதே போல் விக்கிப்பீடியாவிலும் தொடர் பங்களிப்புகள் மூலம் கூடுதல் பொறுப்புகளைப் பெற்றுக் கொள்ள முடியும். தமிழர்களுக்கு எதிராகச் செயல்படுபவர்கள் ஆங்கில விக்கிப்பீடியாவில் மலிந்து இருந்தால், தமிழ் ஆதரவாளர்களும் அவர்கள் அளவு பொறுமையாகப் பங்களித்தே அணுக்கங்களைப் பெற்றுக் கொள்ள இயலும். சர்ச்சைக்குரிய கட்டுரையில் மட்டும் திடீர் என போய் குதிக்காமல் கொஞ்சம் கொஞ்சமாக பல கட்டுரைகளிலும் பங்களிப்புகளைச் செய்த பின் நிருவாகப் பொறுப்பைக் கோரலாம். எடுத்தவுடனேயே புறக்கணிப்பதால் இழப்பு தமிழருக்கே. தமிழரின் எண்ணிக்கையைக் காட்டிலும் மிகக் குறைவான எண்ணிக்கையிலான எதிரிகள் நிருவாகப் பொறுப்புக்கு முன்னேறும்போது ஒரு சில தமிழர்களாவது அதற்கு இணையாக ஏன் உழைக்கக்கூடாது? ஆங்கில விக்கிப்பீடியாவில் மட்டுமல்ல நிகழ்வாழ்க்கை அரசியலிலும் கோட்டை விட்டு விட்டுப் பிறகு புலம்புவதும், விமர்சனம் செய்வதும் தமிழர் வழக்கமாகவிட்டது.

8. ஆங்கில விக்கிப்பீடியாவில் உள்ள குறைகள், அரசியல் தமிழுக்கும் வராது என்று என்ன நிச்சயம்? ஏன் தமிழ் விக்கிப்பீடியாவுக்கு பங்களிக்க வேண்டும்?

ஏனெனில், ஆங்கில விக்கிப்பீடியாவைப் புறக்கணித்துச் செயல்பட்டாலும் ஆங்கிலப் பயனர்களுக்கு ஏராளமான தகவல் தளங்கள் உள்ளன. ஆனால், தமிழ் விக்கிப்பீடியாவுக்கு மாற்றாக தமிழில் தற்போது எந்தத் திட்டமும் இல்லை.  முழுக்க முழுக்க சரியான திட்டம் என்று ஏதும் இல்லை. உடனடியாக, அத்தகைய திட்டம் தோன்றும் அறிகுறியும் காணோம். அது வரும் வரை காத்திருக்கவும் முடியாது. இணையத்தில் தமிழில் தகவல்களைப் பெறுவது என்பது தமிழர்களின் உடனடித் தேவை. அதற்கு நமக்கு இருக்கிற களங்களைப் பயன்படுத்திக் கொள்கிறோம். விக்கிப்பீடியாவை வளர்ப்பது எமது நோக்கமல்ல. விக்கிப்பீடியாவும் ஒரு களம். வேறு நல்ல களம் கிடைத்தால் அதற்குப் பெயரவும் உடன்பாடே. விக்கிப்பீடியா உள்ளடக்கங்கள் கட்டற்ற உரிமத்தில் கிடைப்பதால் அவற்றை வேறு நல்ல திட்டங்களுக்கும் பயன்படுத்திக் கொள்ளலாம்.

அரசியல் கலக்காமல் எழுதக்கூடிய நுட்பம், அறிவியல், கணிதம், மருத்துவம், கலை போன்ற  மக்களுக்குப் பயன்படக்கூடிய எண்ணற்ற துறைகள் உள்ளன. இந்தத் துறைகளிலாவது பங்களிக்கலாமே?

விக்கிப்பீடியா மேம்படுவதற்கு வாய்ப்பு உண்டென்றால் அது கூடுதல் பங்களிப்பால் மட்டுமே சாத்தியம். புறக்கணிப்பால் அல்ல.

9. தமிழ் விக்கிப்பீடியா தனித்தமிழ் தாலிபான்களின் கையில் உள்ளதா? ஏன் பிற வெகுமக்கள் ஊடக நடையில் இருந்து மாறுபடுகிறது?

தகுந்த இடங்களில் அளவோடு பிற மொழிச் சொற்கள் பயன்பாட்டின் தேவை இருப்பதை உணர்ந்தே இருக்கிறோம். தமிழ் விக்கிப்பீடியாவில் எண்ணற்ற, ஆயிரக்கணக்கான பக்கங்களில் கிரந்த எழுத்துகள், பிற மொழிச் சொற்கள் மலிந்து உள்ளன. தமிழ் விக்கிப்பீடியா தனித்தமிழ் தாலிபான்கள் கையில் இல்லை என்பதற்கு இதுவே சான்று. பிற மொழிச் சொற்களை ஒட்டு மொத்தமாக நீக்குவதற்கான முயற்சிகள் ஏதும் இல்லை. அது சாத்தியமும் இல்லை. தேவையும் இல்லை. கண்மூடித்தனமாக பிறமொழிக் கலப்பு, கண்மூடித்தனமான பிறமொழி எதிர்ப்பு என்று இந்த இரு நிலைகளின் நடுவிலேயே தமிழ் விக்கிப்பீடியா நலமுடன் தொடர்ந்து இயங்க முடியும்.

வெகு மக்கள் ஊடக நடையை அப்படியே கேள்வி கேட்காமல் பின்பற்ற வேண்டும் என்ற கட்டாயம் இல்லை. ஏனெனில், வெகுமக்கள் ஊடகத் தமிழ் நடை என்று ஒன்றுமே இல்லை. கிரந்தத்தின் பொதுப் பயன்பாடு குறித்த உரையாடல்களையும் காணலாம். தமிழ் விக்கிப்பீடியா வளர்ந்து வரும் ஒரு தன்னாட்சி மிக்க அறிவூடகம். ஒவ்வொரு நாளும் 50,000+ பக்கப் பார்வைகளுக்கு மேல் பதிவாகிறது. தமிழ் விக்கிப்பீடியா நடை புரியவில்லை என்று எவரும் சொல்வதில்லை. ஏன் வேறு மாதிரி எழுதுகிறீர்கள் என்று தான் கேள்வி வருகிறது.   இவர்கள் இருப்பதை மாற்றாதே என்பார்கள். யார் மாற்றினால் நாம் கேள்வி கேட்காமல் ஏற்றுக் கொள்ள வேண்டும் என்றும் சொல்வார்கள்.

தமிழ் விக்கிப்பீடியாவின் நடை எப்படி இருக்க வேண்டும் என்பதை தமிழ் விக்கிப்பீடியா பங்களிப்பாளர்களே கூட்டாகப் பேசி முடிவெடுக்கும் உரிமை உண்டு. விக்கி ஒரு கூட்டு முயற்சி என்பதால், எந்த ஒரு பக்கத்தையும் மாற்றி எழுதும் உரிமையும், இப்படி எழுதலாமே என்று கோரும் உரிமையும் உண்டு. எந்த அரசியலும் இன்றி அறியாமையால் பிறமொழி பயன்படுத்துபவர்களிடம் தமிழ் நலம் சார்ந்து வேண்டினால் அதன் நியாயம் உணர்ந்து தங்கள் நடையை மாற்றிக் கொள்ள முன்வருகிறார்கள். மற்றவர்கள் தமிழ் விக்கிப்பீடியா மீது உண்மையற்ற குற்றச்சாட்டுகளை வீசுகிறார்கள்.

தனித்தமிழ் என்பது தமிழ் விக்கிப்பீடியரின் கண்டுபிடிப்போ திணிப்போ அல்ல. ‘ஓட்டல்’, ‘உணவகம்’ என்று தமிழ் மொழி, எழுத்து சார்ந்தே எழுதும் வழக்கம் பொதுமக்களிடம் உண்டு. இதைப் பின்பற்றியும் இதன் தொடர்ச்சியாகவுமே தமிழ் விக்கிப்பீடியாவிலும் இயன்ற இடங்களில் பிற மொழி தவிர்க்கலாமே என்று வேண்டுகோள் விடுக்கப்படுகிறது. ஆனால், “ஹோட்டல் என்று தான் எழுதுவோம். மாற்றி எழுத வேண்டுபவர்கள் தனித்தமிழ் தாலிபான்கள்” என்று சொன்னால் பெரும்பான்மைத் தமிழர்கள் தாலிபான்கள் தான்.

உண்மை என்னவென்றால், இது வரை வளர்ந்து வந்த தமிழ் நடை, கருத்தாக்கம் என்பது அரசுகள், ஊடக அதிபர்கள், அதிகார அமைப்புகளின் கையிலேயே இருந்தது. இந்த அதிகார அமைப்புகள் திணிக்கும் தமிழ் நடையையும் கருத்துகளையும் கேள்வி கேட்கவும் மாற்றி அமைக்கவும் பொது மக்களுக்கு வாய்ப்பு இல்லை. இவை எழுதுவதே சரியான தமிழ் நடை, உண்மை என்று பழக்கப்படுத்தப்பட்டிருக்கிறோம். “ஏற்கனவே இருப்பது என்னவாக இருந்தாலும் அதை கேள்வி கேட்காமல் அப்படியே பின்பற்று” என்பது எப்படி அறிவுடைமை ஆகும்? எனவே, விக்கிப்பீடியா போன்ற புதிய வலுமிக்க வெளிகளில் மாற்றுச் சிந்தனைகள், கேள்விகள், உரையாடல்கள் வரும் போது அதிகார மையங்களாலும் அவற்றுக்குப் பழக்கப்பட்டவர்களாலும் ஏற்றுக் கொள்ள முடிவதில்லை. பொருளாதாரம், பண்பாடு, சமூகம் என்று அனைத்திலும் “பிற்போக்கு அரசியல்” என்று சாடி “இருப்பதைப் பேணுகிறோம், புதுமையைப் புகுத்துகிறோம்” என்று கண்ணுக்குத் தெரியாமல் மரபுகளை அழிக்கும் “முற்போக்கு அரசியலும்” உண்டு. “தனித்தமிழ் அரசியல்” என்று சாடுவோருக்கு அதை விட மிகப்பெரிய அரசியல் உண்டு.

10. தமிழ் விக்கிப்பீடியாவின் தமிழாதரவு நிலையால் அதன் வளர்ச்சி தடைபடுமா?

இது பூச்சாண்டி காட்டும் வேலை. தமிழாதரவு சர்ச்சைகள் ஏதும் இல்லா, கலப்பு மொழி, கிரந்த ஒலிப்புகள் கூடிய பிற இந்திய, தெற்காசிய மொழி விக்கிப்பீடியாக்கள், இணையங்கள் ஏன் வளராமல் இருக்கின்றன என்று சிந்தித்தால் விடை கிடைக்கும். தன்னார்வத் தமிழிணையத் திட்டங்களுக்குப் பங்களிப்பு குறைவாக இருப்பது ஏன் என்ற கட்டுரையையும் பார்க்கலாம். தமிழ் விக்கிப்பீடியாவின் தமிழாதரவுப் போக்குடன் உடன்படாத ஓரிருவர் வேறு களங்களில், சொந்தத் தளங்களில் தொடர்ந்து தங்கள் நடையில் எழுதுகிறார்கள். அதனாலும் தமிழ் இணைய உள்ளடக்கம் வளரும் என்பதால் எங்களுக்கு மகிழ்ச்சியே. மற்றவர்கள் வாய்ச்சொல் வீரர்கள்.

மேற்கண்ட விமர்சனங்கள் குறித்தும், இன்னும் பொதுவாகவும் சென்னை கிழக்குப் பதிப்பக விக்கி அறிமுக கூட்டத்தில் உரையாடினோம். அந்த விக்கிபீடியா அறிமுக ஒலிப்பதிவில் இன்னும் விரிவாக அறியலாம்.