மாற்று! எப்படி மாற்று?

மாற்று! தளத்தைப் பார்வையிட்ட நண்பர்கள் பலரும் கேட்ட கேள்வி, இத்தளம் எப்படி ஒரு மாற்றாக விளங்கும் என்பது தான். திரட்டிகள் என்ற அளவில் தமிழ்மணம், தேன்கூடு, TamilBlogs தளங்கள் இருப்பதும் பரிந்துரைத் தளங்களாக கில்லி, DesiPundit போன்ற தளங்கள் இருப்பதும் சுட்டிக்காட்டப்பட்டது.

மேம்போக்காகப் பார்க்கையில், மாற்று! இன்னுமொரு தமிழ்த் தளமாகத் தெரியலாம் என்றாலும், இதன் தோற்றம், செயல்பாடு, நிர்வாகம், ஒருங்கிணைப்பு, தள வடிவமைப்பு ஆகியவற்றில் குறிப்பிடத்தக்க மேம்பாடுகள் உண்டு.

வாசகருக்கான நன்மைகள்

* முழுக்கத் தமிழ் உள்ளடக்கம் உள்ள இடுகைகள் மட்டுமே காட்சிப்படுத்தப்படுகின்றன.
* வலைப்பதிவுகள் மட்டுமல்லாது http://www.varalaaru.com , http://www.bbc.co.uk/tamil/ , http://in.tamil.yahoo.com/index.htm , http://tamil.in.msn.com/ போன்று செய்தியோடை வசதி தரும் அனைத்துத் தமிழ்த் தளங்களில் இருந்தும் விருப்ப இடுகைகள் காட்சிப்படுத்தப்படுகின்றன. விரைவில் எந்த ஒரு தமிழ்த் தளத்தில் இருந்தும் விருப்ப இடுகைகளை காட்சிப்படுத்த இருக்கிறோம்.
* விருப்ப இடுகைகள் மட்டுமே காட்சிப்படுத்தப்படுவதால், இடுகைகளின் உள்ளடக்கம், தரம் ஒருவராலாவது விரும்பப்பட்டும் உறுதிப்படுத்தப்பட்டுமே வெளிவருகிறது. இதனால், மதம், இனம், சாதி, மொழி, தேசம், தனி நபர் மற்றும் இன்ன பிற அடிப்படைகளில் வெறுப்புமிழக்கூடிய இடுகைகள், கண்ணியக் குறைவாக எழுதப்பட்ட இடுகைகளை 99.9% மாற்று! தளத்தில் காண இயலாது.
* தானியக்கத் திரட்டிகளில் இணைக்கப்படாத வலைப்பதிவுகளின் இடுகைகளையும் இங்கு காணலாம். ஒரு பதிவரின் ஒவ்வொரு இடுகையும் படிக்கப்பட்டே பகிர்வதால் தரம், சுவை, பயன் மிகவும் குறைந்த இடுகைகளை காண்பது குறைவாக இருக்கும்.
* 40க்கும் மேற்பட்ட தலைப்புகள் வாரியாக பகுக்கப்பட்டு காட்சிப்படுத்தும் வசதி.
* பெரிதும் விரும்பிப் படிக்கப்பட்ட இடுகைகளுக்கு தாரகைப் புள்ளிகள் வழங்குகிறோம். இதனால், மாற்றில் இடுகைகளைப் பார்வையிடும்போதே பெரிதும் விரும்பப்பட்ட இடுகைகளை இனங்காணலாம்.
* முடிவில்லாமல் பின்னோக்கி இடுகைகளைப் படித்துக் கொண்டே செல்லும் வசதி. இதனால் பகுப்புகள், தாரகைப் புள்ளிகள் அடிப்படையில் மிகப் பழைய இடுகைகளையும் தொடர்ந்து படிக்கலாம்.
* எளிமையான, கண்ணை உறுத்தாத, விளம்பரங்கள் இல்லாத பக்க வடிவமைப்பு.
* தானியக்கத் திரட்டிகளின் உள்ளடக்கத்தை எழுத்தாளர்கள் தீர்மானிக்கிறார்கள். ஆனால், மாற்று!-ன் உள்ளடக்கத்தை வாசகர்களே தீர்மானிக்கிறார்கள். இதனால், supplier dictated medium என்பதில் இருந்து மாறி user dictated medium ஆக வாசகரை மையமாக வைத்து மாற்று! செயல்படுகிறது.

இதன் மூலம் கட்டற்ற வாசிப்பனுபவத்தை ஊக்குவிக்க முயல்கிறோம். மாணவர்கள், குழந்தைகள், பெண்கள் என்று சமூகத்தின் அனைத்துத் தரப்பினருக்கும் தரம் உறுதிப்படுத்தப்பட்ட இடுகைகள் எவ்வளவு இருந்தாலும் அவ்வளவையும் எண்ணிக்கை கட்டின்றி காட்சிப்படுத்த முனைகிறோம்.

சிறப்பான ஓடை வசதி:

* மாற்று தளத்தின் செய்தியோடையை இந்த முகவரியில் காணலாம். தாரகைகள் மட்டுமுள்ள செய்தியோடை – http://www.maatru.net/feed.php?tag=starred
பகுப்பு வாரியான செய்தியோடைகள் –
எடுத்துக்காட்டுக்கு, ‘தமிழ்’ என்ற பகுப்புக்கு http://www.maatru.net/feed.php?category=தமிழ்
என்ற முகவரியைப் பயன்படுத்த வேண்டும்.

வலைப்பதிவருக்கான நன்மைகள்

* மாற்று!-ல் தங்கள் தளத்தை இணைக்க என வலைப்பதிவர்கள் ஒரு நிரலையும் இணைத்துக் கொள்ளத் தேவை இல்லை. இதனால், அவர்கள் வலைப்பதிவின் வேகத்தை மாற்று! தளத்தில் இணைந்திருத்தல் பாதிக்காது. நிரல் ஏதும் இல்லாததால் அவர்கள் எந்த வலைப்பதிவு மென்பொருளைக் கொண்டும் வலைப்பதியலாம். தங்கள் வலைப்பதிவுகளை மாற்றில் இணைக்கச் சொல்லி விண்ணப்பிக்கவோ காத்திருக்கவோ தேவையில்லை. மாற்றுக்கு இணைப்பு தரத் தேவையில்லை. ஒவ்வொரு புது இடுகைக்கும் மாற்றுக்குத் தெரிவிக்கத் தேவையில்லை. துறை வாரியாகவும் தாரகைப் புள்ளி வாரியாகவும் இடுகைகளை காட்சிப்படுத்துவதால் சிறப்பாக வலைப்பதிபவர்களுக்கு கூடுதல் வெளிச்சமும் ஊக்கமும் கிடைக்கும்.

ஒவ்வொரு இடுகையாகத் தான் பகிர்கிறோம் என்பதால், ஒரு தமிழ்த் திரட்டியில் இடம்பெற வேண்டும் என்பதற்காக பதிவர்கள் தங்களின் ஒரு பதிவு முழுவதும் தமிழில் மட்டுமே எழுத வேண்டிய கட்டாயம் இல்லை.

இதன் மூலம் கட்டற்ற வலைப்பதிதலை ஊக்குவிக்க முனைகிறோம்.

பதிவர்கள் தங்கள் வலைப்பதிவின் பக்கப்பட்டையில் தமிழ் வலைப்பதிவுகளின் செய்தி ஓடை தருவது வழக்கம். மாற்று! குறிச்சொல் ஓடைகளைப் பயன்படுத்தி துறை சார் ஓடைகளை வலைப்பதிவுகளில் தரலாம். எடுத்துக்காட்டுக்கு, என் கணிமை வலைப்பதிவில் கணினி, இணையம் குறித்த ஓடைகளைத் தந்திருக்கிறேன்.

தள நிர்வாகம், செயல்பாடு, ஒருங்கிணைப்பு

தளம் துவங்கியதில் இருந்து இன்று வரையும் என்றும் இது ஒரு கூட்டு முயற்சியாகும். தளத்துக்கான ஆலோசனைகள், நிரலாக்கம், வடிவமைப்பு ஆகியவை அனைத்தும் மாற்று! பங்களிப்பாளர்களின் கூட்டு முயற்சியாகும். மாற்று!-ல் பங்களிப்பாளராக ஆவதற்கென்று சிறப்புத் தகுதிகள் ஏதும் இல்லை. மாற்று! கொள்கைகளுக்கு உட்பட்டு இணக்க முறையில் ஒரு குழுவாகப் பங்களிக்கக்கூடிய அனைவரையும் மாற்று! தளத்திற்குப் பங்களிக்க வரவேற்கிறோம். தற்போதைய மாற்று! பங்களிப்பாளர்கள் எவரும் தனிப்பட்ட முறையில் பெரிதும் அறிமுகமானவர்களோ முகம் பார்த்துக் கொண்டவர்களோ இல்லை. எனினும், நேர்மறையான தமிழிணையச் சூழல் என்ற நன்னோக்கத்தை முன்னிறுத்தி இணைந்திருக்கிறோம். தளத்துக்குத் தலைவர், நிர்வாகி, முடிவெடுப்பவர், உரிமையாளர் என்று தனியாக யாரும் கிடையாது. கருத்தொற்றுமையின் அடிப்படையிலேயே செயல்படுகிறோம். தளம் குறித்த அனைத்து செயல்பாடுகளையும், இடுகைகளின் தரம் குறித்த கருத்து வேறுபாடுகளையும் திறந்த நிலையில் உரையாடுகிறோம்.

ஒருவர் மாற்று! பங்களிப்பாளர் ஆன பின் அவரது இடுகைகளை காட்சிப்படுத்துவதைத் தவிர்க்கிறோம். இதனால், எங்கள் இடுகைகளை நாங்களே விளம்பரப்படுத்தாமல் இருக்க முனைகிறோம்.

இது ஒரு கூட்டு முயற்சி என்பதால் என்றும் ஒரு வணிக நோக்கமற்ற, விளம்பரங்கள் இல்லாத ஒரு தளமாக இருக்கும்.
பெயரளவில் கூட .net ஆக இருப்பதைக் கவனிக்கவும். .com இல்லை.

தமிழிணையச் சூழலில் உள்ளடக்கம், செயல்பாடு, பங்களிப்பு ஆகியவற்றில் மாறுபட்ட ஒரு அணுகுமுறையைக் கொண்டு வர மாற்று! முனைகிறது. இதன் மூலம் Quality, Change (வினை) , alternative என்ற பொருள் தரும் மாற்று! என்னும் சொல்லுக்கு ஏற்ப ஒரு ஆக்கப்பூர்வமான தமிழிணையச்சூழலைக் கொண்டு வர முயல்கிறோம்.

செயல்பாட்டு அளவில், பரிந்துரைக்கத்தக்க இடுகைகளின் கட்டற்ற திரட்டியாக மாற்று! விளங்கும்.

இணையத் தமிழ் உள்ளடக்க உருவாக்கம் – தமிழ்நாடு அரசு கவனிக்குமா?

என்றாவது, தமிழ் வளர்ச்சித் துறை தொடர்புடைய தமிழக அரசு அமைச்சர் / அதிகாரி கண்ணில் படலாம் என்ற பேராசையில், தமிழக அரசுக்கு சில வேண்டுகோள்கள்.

* தமிழ்நாடு அரசு இணையத்தளத்தின் அனைத்துத் தகவல்களையும் முழுக்கத் தமிழில் தாருங்கள். TSCII வடிவில் இருந்தாலும், கூடவே ஒருங்குறித் தமிழிலும் ஒரு பதிப்பு தாருங்கள். இதன் மூலம் தமிழக அரசுத் தகவல்களை கூகுள் போன்ற தேடுபொறிகளின் மூலம் தேட இயலும்.

* தமிழ்நாடு அரசுப் பள்ளி மற்றும் கல்லூரி பாட நூல்கள் அனைத்தையும் ஒருங்குறி உரையாகவும், Pdf கோப்புகளாகவும் தாருங்கள். ஆங்கில வழியத்தில் படித்தவர்கள், தமிழ் வழியத்தில் படித்திருந்தாலும் அத்தகவல்கள்-தமிழ்க்கலைச்சொற்கள் மறந்தவர்கள், இலங்கை-சிங்கப்பூர்-மலேசியா வாழ் தமிழர்கள் ஆகியோருக்கு உதவும். இந்நாடுகளின் கலைச்சொல்லாக்கத்திலும் தமிழ்நாட்டுடன் இசைவு இருக்கும். தமிழ்நாட்டுப் பாட நூல்கள் நாட்டுடைமை என்பதால் இவற்றைப் பொதுக் களத்தில் எவருக்கும் பயன்படுவது போல் வைக்க வேண்டும்.

செய்தி: தமிழ்நாட்டுப் பள்ளிக்கூடப் பாடநூல்கள் இப்போது இணையத்தில் pdf வடிவில் கிடைக்கின்றன !

* நாட்டுடைமையாக்கப்பட்ட அனைத்துத் தமிழ் நூல்களையும் ஒருங்குறி உரையாகவும், Pdf கோப்புகளாகவும் தாருங்கள். உலகம் முழுக்க எண்ணற்ற ஆர்வலர்கள் மதுரைத் திட்டம் போன்றவை மூலம் தங்கள் பொன்னான நேரத்தைச் செலவிட்டு இந்நூல்களை மென்னூலாக்கி வருகிறார்கள். இது தேவையற்ற காலம் மற்றும் உழைப்பு விரயமாகும்.

* தமிழ் இணையப் பல்கலைக்கழகத்தின் தளத்துக்கும் ஒருங்குறித் தமிழ்ப் பதிப்பு தாருங்கள். அத்தளத்தில் உள்ள தேவையற்ற பயனர் எளிமையைக் குலைக்கும் கூறுகளை நீக்கி, எளிமையான உரை வடிவத் தளமாகத் தாருங்கள்.

* தமிழ்நாட்டுப் பல்கலைக்கழகங்களின் இணையத்தளங்கள் அனைத்திலும் தமிழ்ப் பதிப்பு கொண்டு வரப் பணியுங்கள்.

* கடந்த இரண்டு ஆண்டாகத் தமிழ் இணைய மாநாடு நடைபெறவில்லை. அதனை மீளத் தொடங்குங்கள்.

* தமிழ்நாட்டுத் தமிழ்ப் பாடம், கணினி அறிவியல் பாடங்கள் ஆகியவற்றில் கணினியில் தமிழ்ப் பயன்பாடு குறித்துப் பாடங்களைச் சேருங்கள். பள்ளிகளுக்கு வாங்கும் கணினிகளில் தமிழ்99 தமிழ் விசைப்பலகை அச்சிப்பட்டிருப்பதை உறுதி செய்யுங்கள். பள்ளிக் குழந்தைகளுக்கு கணினியை அறிமுகப்படுத்தும்போதே தமிழ்த் தட்டச்சையும் சேர்த்து அறிமுகப்படுத்துங்கள். தமிழ் லினக்ஸ், தமிழ் Firefox, தமிழ் Open Office என்று திறமூலத் தமிழ் மென்பொருள்களை ஊக்குவியுங்கள். இதனால் அரசுக்குச் செலவும் மிச்சம். குழந்தைகளும் ஆங்கிலம் மீதான மருட்சி இல்லாமல் எளிதில் கணினியைக் கையாளத் தொடங்குவார்கள்.

* தமிழ்நாட்டில் புதிதாகப் படித்து வெளிவரும் தமிழாசிரியர்களின் தரம் மெச்சிக் கொள்ளும் மாதிரி இல்லை. மிகச் சிறந்த மாணவர்களை தமிழ்ப் படிப்புக்கு ஈர்க்க கல்லூரியில் தமிழ்ப்பட்டப்படிப்பு முழுக்க இலவசமாகவும் (விடுதிச் செலவு உட்பட) அதில் பயிலும் மாணவர்களுக்கு சிறப்பு ஊக்கத்தொகையும் வழங்குங்கள். இதனால், தமிழ்ப் படிப்புக்குப் போட்டி ஏற்பட்டுச் சிறந்த மாணவர்கள் அப்படிப்பை நாடுவார்கள்.

நாடி ஜோசியம் !

இந்த முறை ஊருக்குப் போனப்ப, மருதமலை அடில உள்ள ஒரு நாடிஜோசிய மையத்துக்கு அக்கா என்னை அழைச்சுக்கிட்டுப் போனாங்க. தம்பி ஆராய்ச்சி பண்ணாம இணையத்துலயே கிடக்குறானே, தேறுவானானு அவங்க கவலை..என்னடா வெளிநாட்டுல ஏதாச்சும் girl friend கிடைக்குமான்னு என் கவலை 😉 ஆக, திருமணக்காண்டம், வேலை காண்டம் இரண்டும் பார்க்குறதுன்னு முடிவு. ஏற்கனவே, அக்காவப் பத்தின விவரங்கள் எல்லாம் அந்த மையத்துல தெளிவா சொல்லி இருந்ததால, நம்மள பத்தி எப்படி சொல்லுறாருன்னு ஒரு பரபரப்பு.

போன உடன என் வயசு, கட்டை விரல் ரேகை ரெண்டும் வாங்கிக்கிட்டு ஒரு disclaimer கொடுத்தாரு. அதாவது, எனக்கான ஓலை அந்த மையத்துல இல்லாட்டி அன்னிக்கு குறி சொல்ல முடியாதுன்னும் அதுனால பணமும் வாங்க மாட்டம்னும் சொன்னாரு. நேர்மை, நேர்மை!

அதிர்ஷ்ட்ட வசமா 🙂 நம்ம விதி எழுதின ஓலை மருதமலை அடிவாரத்தில் துயில் கொண்டிருந்தது. தொடர்புடைய பல ஏடுகள்ள இருந்த என்னைப் பற்றின விவரங்கள் உள்ள ஏட்டைக் கண்டுபிடிச்சார். அது ஒரு knock-out round மாதிரி..எனக்கு ரெண்டு மனைவியா, எங்க அப்பாவுக்கு ரெண்டு மனைவியா, அப்பா பேர்ல சாமி இருக்கா, நான் சிறைக்குப் போயிருக்கனா, எனக்கு உடல் ஊனமா, என் பெயர்ல வடமொழி எழுத்து இருக்கா, ங் இருக்கா, ச் இருக்கான்னு அப்படின்னு வரிசையா பல கேள்விகள். எல்லாம் இல்லை, இல்லைன்னு சொல்லச் சொல்ல கழிச்சுக் கட்டிக்கிட்டே வந்தார். அதுவே, ஒரு game மாதிரி நல்லா இருந்துச்சு. கடைசியா நம்ம ஏடு சிக்கிக்குச்சு.

அப்புறம், அதுல அவரு போட்ட bit என்னன்னா, அன்னிக்கு அந்த ஏடு பத்தி நான் தெரிஞ்சுக்கிணும்னு பிராப்தம் 😉 இருப்பதால் தான் அந்த ஏடு அன்னிக்குக் கிடைச்சதாம். அவர் சொல்லுற விவரங்கள் எல்லாத்தையும் ஒலிநாடாவில் வேற பதிந்தார். ரொம்ப professional தான் !

அப்புறம், என் பேர், பிறந்த நாள், மாதம், ஆண்டு, நேரம், உடன் பிறந்தவர் எத்தனை, அப்பா தொழில், என் தொழில், அப்பா பேர், அம்மா பேர், இருக்கும் இடம் எல்லாம் துல்லியமா சொன்னார் !!

<<இப்ப, நான் வாயைப் பிளந்து கதை கேட்டது மாதிரி ஒரு smiley போட்டுக் கொள்ளவும்>>

எனக்கு அடுத்த ஆண்டு நல்ல வேலை வாய்ப்பு ஒன்று வரும் எனவும் 29 வயதுக்குள் settle (!) ஆகிடுவேன்னும் சொன்னார்.
கல்யாணத்துக்குப் பிறகும் அக்காவுடன் பாசமா இருப்பேன்னு சொன்னார்.

<<இங்க அக்கா முகத்தில் bulb எரிவது போல் ஒரு smiley போட்டுக் கொள்ளவும்>>

நான் பொறுமை இழப்பது கண்ட ஜோசியர் திருமண காண்டத்துக்கு வந்தார். அவர் அடுத்தடுத்து அடுக்கிய குண்டுகள்:

* 29 வயசுல தான் திருமணம் ! (இன்னும் 4 வருசமா 🙁 !!)
* அப்பா அம்மா பார்க்குற பொண்ணு தான் (ஹ்ம்ம்)
* உள்ளூர்ப் பொண்ணு தான் (வெளிநாட்டு வாழ்க்கை வீணா?)
* ஏகப்பட்ட பொண்ணு பார்த்துத் தள்ளிப் போய் தான் திருமணம் இறுதியாகும் (இது வேறயா??)
* பொண்ணுக்கு முழங்கைல மச்சம் இருக்கும் (நல்ல வேளை முழங்கைல இருக்கு. கொஞ்சம் தேடிப் பார்க்கலாம்)

அப்புறம், பொதுவா எனக்குப் பரிகாரம் பார்க்க வேண்டும் என்று சொல்லி ஒரு தொகையைக் கேட்டார். ஏற்கனவே, திருமணத்துக்குப் பிறகு அக்காவுடன் பாசமாக இருப்பேன் என்று ஒரு bit நங்கூரம் போலப் பாய்ச்சப் பட்டிருந்ததால் அக்கா ஒப்புக்கொண்டார். அப்புறம் consulting charge 250 INR+per காண்டம் @ 200 INR ஐ சாமி சாட்சியாக பவ்யமாக அவரிடம் தந்து விட்டு வந்தோம்.

ஜோசியத்துக்குப் பின்:

– இது மூட நம்பிக்கையாகவோ ஏமாற்று வேலையாகவோ இருக்கட்டும். ஆனால், என் பிறந்த நாள் உள்ளிட்ட விவரங்களை எப்படிச் சொல்ல முடிகிறது? இது என்ன technique? mind reading என்று உண்மையிலேயே இருக்கிறதா? இருந்தால் பாராட்டத்தான் வேண்டும்.

– ரெண்டு மனைவிக் காரன், அது தெரியாத முதல் மனைவியுடன் ஜோதிடம் பார்க்க வந்தால் எப்படி உண்மையான பதிலைச் சொல்வது? 😉

– கடந்த காலத்தை அவர் துல்லியமாகச் சொல்வதால் எதிர் காலம் பற்றி அவர் சொல்வதிலும் ஒரு நம்பகம் கலந்த எதிர்ப்பார்ப்பு வருவது உண்மை.

– என்னைப் பற்றி எனக்கு ஏற்கனவே தெரிந்த பெயர், பிறந்த தேதி உள்ளிட்ட விவரங்களை அவர் வாயால் கேட்பதற்கு நானே காசு தருகிறேன். நல்ல comedy, முட்டாள்த்தனம். ஆனா, இது ஒரு நல்ல அனுபவம்.

– இந்த அனுபவத்தைச் சொல்லி இன்னும் ஓரிரு நண்பர்களாவது அந்த மையத்துக்குப் போய் இருப்பார்கள்.

– இந்த மச்ச விவரம், மணப்பபெண் பற்றிய பல விவரங்கள் பொதுவாக பலருக்கும் ஒரே மாதிரி அடித்து விடப்படுகிறது என்று கேள்விப்பட்டேன்.

– திருமணம் என்று ஆனால் என்ன, என்றோ ஆவதற்கான scope இருப்பதை நினைத்து மகிழ்ச்சி கொள்ள வேண்டும் என்று சில நண்பர்கள் positive thinking உடன் ஆறுதல் சொன்னார்கள் 😉

– தமிழகத்தில் இதற்கு நல்ல craze இருக்கிறது. இதற்காக தஞ்சை கோயிலில் வைத்து ஒரு பட்டயப்படிப்பே நடத்துவதாகக் கேள்வி !

அடுத்துப் பார்க்க விரும்பும் நபர்கள் – லாட்ஜ் மருத்துவர்கள், ஆசிரமச் சாமியார்கள் 😉

நாடி ஜோதிடம் குறித்த விக்கிபீடியா கட்டுரை.

தமிழ் செல்பேசி விசைப்பலகை வடிவமைப்புக்கான தேவை

செல்பேசியில் உள்ள ஆங்கில விசைப்பலகையைக் கொண்டு தமிழ் குறுஞ்செய்தித் தகவலை எழுதுவது நேரத்தை வீணாக்கும், அயர்வூட்டும் வேலையாகும்.

எடுத்துக்காட்டுக்கு, உண்ணி என்று எழுத ஆங்கில எழுத்துக்களான uNNi – யை அழுத்த எத்தனை விசை அழுத்தங்கள் வருகிறது என்று பார்ப்போம்.

u – 2 விசையழுத்தங்கள் (8ஆம் எண் விசையில் tக்கு அடுத்து u அழுத்த வேண்டும்).

N – குறைந்தது 2 விசையழுத்தங்கள் (6ஆம் எண் விசையில் mக்கு அடுத்து n அழுத்த வேண்டும். ந, ன, ண என்று மூன்றுக்கும் n என்ற விசையை மட்டும் வைத்தோமானால் கூடுதலாக ஒன்று அல்லது இரண்டு விசையழுத்தங்களும் தேவைப்படும்).

N – குறைந்தது 2 விசையழுத்தங்கள்.

i – 3 விசையழுத்தங்கள் (4ஆம் எண் விசைப்பலகையில் g, hக்கு அடுத்து i வருகிறது).

ஆக, உண்ணி என்ற மூன்றெழுத்துத் தமிழ்ச் சொல்லை எழுத குறைந்தது 9 விசைகளை அழுத்த வேண்டும் !!

ஆங்கில ஒலிப்பியலைக் கொண்டு தமிழை உள்ளிட முனைவதாலேயே இந்தப் பிரச்சினை வருகிறது. தவிர, ஆங்கிலத்தில் நம் விசையழுத்த வரிசைகளைக் கொண்டு பொருத்தமான சொற்களைப் பரிந்துரைக்கும் அகராதிகள் இருப்பது போல் தமிழுக்குத் தற்போது இல்லை.

தமிழுக்கே இவ்வளவு சிக்கல் என்றால் ஆயிரக்கணக்கான எழுத்துக்கள் உடைய சீனம் போன்ற மொழிகளில் இதை எவ்வாறு கையாளுகிறார்கள்?

இதையொட்டி வலையில் தேடுகையில், சீன செல்பேசி விசைப்பலகை வடிவமைப்புகான ஆய்வறிக்கை ஒன்று கண்ணில் பட்டது. இவ்வறிக்கையில் முக்கியமாக, 10 முதல்15 வரையான பக்கங்களைப் படித்துப் பாருங்கள்.

தமிழுக்கான செல்பேசி விசைப்பலகை ஒன்றை மனக்கணக்காகவே உருவாக்கலாம் என்று முன்னர் நினைத்திருந்தேன். ஆனால், இந்த ஆய்வறிக்கையைப் பார்த்த பின் கொஞ்சம் நிரல் எழுதி மெனக்கெட்டால், சிறந்தது என அறிவியல்பூர்வமாகவே நிறுவத்தக்க தமிழ் செல்பேசி விசைப்பலகையை உருவாக்கி விடலாம் என்று தோன்றுகிறது.

முயன்று பார்க்கிறேன் !!

வலை 2.0

வலை 2. 0 (Web 2.0) என்பதை நீங்கள் அடிக்கடி கேள்விப்பட்டிருக்கலாம்.

வலை 2.0 என்னவென்று எளிமையாகப் புரிந்து கொள்வதற்கு வலை 1.0 என்னவென்பதை புரிந்து கொள்வது நல்லது. தினமலர் போன்ற தளங்களில் நீங்கள் பார்வையிட மட்டுமே முடியும். அத்தளத்தில் உள்ள உள்ளடக்கத்தை மாற்றவோ, பக்கம் காட்சிப்படுத்தப்படும் வரிசையையோ நீங்கள் மாற்ற முடியாது. இப்படி, நாம் பார்க்கும் இணையத்தளங்களின் மீது நமக்கு ஒரு கட்டுப்பாடும் இல்லாமல் passive readerஆக இருப்பது போன தலைமுறையான வலை 1.0 இணையத்தளங்களின் குணமாகும்.

ஆனால், வலை 2. 0 இணையத்தளங்கள் என்பவை கட்டற்றவை; மக்களை இணைப்பவை; கூட்டு முயற்சியை ஊக்குவிப்பவை; விருப்பங்களைப் பகிர்ந்து கொள்ள உதவுபவை; உள்ளடக்கத்தை மாற்றவும் காட்சிப்படுத்தலை தன்விருப்பமாக்கவும் அனுமதிப்பவை; வாசகர்களுக்கு தளத்தின் மீது கூடிய கட்டுப்பாட்டைத் தருபவை; பொதுமக்களின் அறிவைக் கொண்டு கட்டெழுப்பப் படுவதால், அதிகாரப் பரவல், அறிவுப் பரவல் ஆகியவற்றுக்கு வழி வகுக்கிறது. இணையத்தில் ஒரு மெய்நிகர் ஜனநாயக அமைப்பைக் கொண்டு வரவும் உதவுகிறது.

இதை எளிமையாக விளக்கும் அருமையான ஒரு நிகழ்படம் கண்ணில் பட்டது.

Flickr, Delicious, Wikipedia போன்றவை பிரபலமான உலக வலை 2.0 தளங்களாகும்.

தமிழ் வலைச்சூழலில் உள்ள வலை 2.0 இணையத்தளங்கள் எனப் பின்வருவனற்றைக் கருதலாம்:

1. தமிழ் விக்கிபீடியா, தமிழ் விக்சனரி முதலிய தமிழ் விக்கிமீடியா திட்டங்கள். – இவற்றில் மீடியாவிக்கி நிரலாக்கம் முதல் உள்ளடக்க உருவாக்கம் வரை கட்டற்ற கூட்டு முயற்சியே.
2. பெட்டகம் – விருப்ப இணைப்புகளின் வகைப்படுத்தப்பட்டத் தொகுப்பு.
3. மாற்று! – நிரலாக்கத்தில் கூட்டு முயற்சி, விருப்பப் பகிர்வுகளின் தொகுப்பான உள்ளடக்கம்.