ஜட்டி காயப் போடுவது எப்படி?

ராத்திரி துவைச்சு வீட்டுக்குள்ளயே காயப் போட்ட எல்லா ஜட்டியும் காயல. drierக்கு உள்ள payment cardலயும் பணம் இல்ல. துவைச்சு காஞ்ச ஜட்டியும் ஒன்னும் இல்ல. ஜட்டி போடாம பள்ளிக்கூடம் போய் பல வருசம் ஆச்சு. ஆக, அன்னிக்கு காலைல தான் இந்த கேள்வி உதிச்சுச்சு.

உடனடியாக ஜட்டி காயப் போடுவது எப்படி?

ம்..பால் காய வைச்சுக்கிட்டே யோசிச்சப்ப தான் அந்த idea வந்துச்சு..பால் எல்லாம் காய வைக்கிற micro wave oven க்கு ஜட்டி காய வைக்கத் தெரியாதா? பாலுக்கு 2 நிமிசம். ஜட்டிக்கு 1 நிமிசம் போதும்னு நினைச்சு ஜட்டிய ஒரு தட்டுல வைச்சு ovenக்குள்ள அனுப்பியாச்சு.

living roomல வந்து பால ஆற வைச்சுக் குடிச்சுக்கிட்டு இருக்கையிலயே ஏதோ ஒரு வாசம்..ம்ம்..அடுப்புல ஒன்னும் வைக்கலயே?? பால் தான தீயும்..வேற என்ன தீயும்??

ஆஆ..ஜட்டீஈஈஈஈஈஈஈஈ..50 ரூபாய் VIP ஜட்டீ..

ஓடிப் போய ovenஅ திறந்தா ஒரே புகை மூட்டம்..குளிர்காலத்துக்கு வீடு எல்லாம் ஜன்னல் அடைச்சு வச்சிருந்தது.

புகையப் போக்க காத்து வேணுமே? சரின்னு ஜன்னல திறந்த காத்தோட்டமா இருக்கணுமேன்னு ஜட்டிய வெளிய பிடிச்சா, அடிச்ச காத்துக்கு ஜட்டி பத்திக்கிட்டு எரியுது.!!

ஜட்டி சுட்டதடா ! கை விட்டதடா !! 🙁

அப்புறம் தான் மண்டைல விளக்கு எரிஞ்சது. நெருப்ப அணைக்க தண்ணி கூட பயன்படும்னு..உடனே குழாய திறந்து ஜட்டியில் பற்றிய நெருப்பை அணைச்சாச்சு..

நல்ல வேளை வீட்டுல டச்சுப் பிள்ளைகள் இல்ல..இல்லாட்டி, என் மானம் மருவாதி எல்லாம் கப்பல் ஏறி இருக்கும்..சுத்தம், சுகாதாரம்னு கத்துற அந்த பிள்ளைகள்ட்ட பாட்டும் வாங்கி இருக்க முடியாது.

எரிச்சு முடிஞ்சதுக்கப்புறம், நல்ல ஜட்டி ஒன்னு மறைஞ்சு இருத்தது கண்ணுல தெரிஞ்சுச்சு. அத எடுத்துப் போட்டுக்கிட்டு, புகை போக எல்லா ஜன்னலயும் திறந்து வைச்சிட்டு, எரிஞ்ச ஜட்டிய குப்பை தொட்டில மறைச்சி வச்சிட்டு, college கிளம்பிப் போயாச்சு..இத என் colleague கிட்ட சொன்னப்ப ஏன் iron box பயன்படுத்தலன்னு கேட்டார்..ஹ்ம்..அத எப்படி மறந்தேன்??

இது ஒரு மானக்கேடான விசயம் தான். ஆனா, கேட்டவங்க எல்லாம் சிரிச்சாங்க..

எத்தனை நாளைக்கு தான் வடிவேலப் பார்த்தே சிரிக்கிறது..

ம்ம்..நான் எல்லாம் என்னத்த research பண்ணி என்னத்த கண்டுபிடிச்சு??

🙂 🙂

உங்கள் வலைப்பதிவில் பாடல்கள் ஒலிபரப்புவது எப்படி?

நான் அண்மையில் விரும்பிக் கேட்ட பாடல்களை கீழே ஒலிபரப்புகிறேன். நீங்களும் இதுபோல் எளிதாக செய்யலாம்.


Get Your Own Hindi Songs Player at Music Plugin

மேலே உள்ள பாடல் பட்டியல் – உன்னைக் கண்டேனே (பாரிஜாதம்), உன்னாலே உன்னாலே (உன்னாலே உன்னாலே), காற்றின் மொழியே (மொழி).

இது போல் நீங்களும் பாடல்களை ஒலிபரப்ப,

1. http://www.musicplug.in செல்லுங்கள்.
2. ஒரு பயனர் கணக்கு உருவாக்குங்கள்.
3. நீங்கள் விரும்பும் பாடல்களுக்கு அருகில் உள்ள + குறியை அழுத்தி, ஒரு albumல் சேருங்கள்.
4. இப்பொழுது அந்த albumஐத் திறந்து பாட விடுங்கள்.
5. கீழ் வருவது போல் உங்கள் இயக்கியில் உள்ள embed code அருகில் உள்ள copy to clipboard என்ற பொத்தானை அழுத்தி, நிரலை பிளாக்கரில் ஒட்டி விடுங்கள்.

அவ்வளவு தான்..உங்கள் சொந்த juke box, radio mirchy, சூரியன் FM எல்லாம் தயார் 🙂

இந்த Musicplug.in தளத்தை அண்மையில் தான் கண்டுபிடித்தேன். இதன் சிறப்பியல்புகள்:

1. Raaga.comக்கு இணையான பாடல்களின் ஒலிப்புத் தரம்.
2. Raaga.comஐ மிஞ்சும் கவர்ச்சியான தள வடிவமைப்பு.
3. நண்பர்களுக்கு மின்மடலில் பாடல் அனுப்ப, இணைப்புகளை பகிர, இப்படி உங்கள் தளத்தில் இருந்து ஒலிபரப்ப என்று ஏகப்பட்ட வசதிகள்.
4. இந்தி, தமிழ், தெலுங்கு, கன்னட, மலையாள, பஞ்சாபி பாடல்கள்.
5. முக்கியமாக உயிரை வாங்கும் விளம்பரங்கள் இல்லை. Raagaவில் “ஊட்டுக்கு பணம் அனுப்புறியா, அனுப்புறியா”-னு ஒரு மேரி அக்கா கூவிக்கிட்டே இருக்கும் 🙂
6. பாடல்கள், பாடல் பட்டியல் தானாக திரும்பத் திரும்ப பாடும் வசதி.
7. புதிய, பழைய பாடல்கள் என்று நிறைய குவிந்திருக்கின்றன.
8. Realplayer தேவை இல்லை. Raagaவில் இது முக்கியத் தொல்லை.
9. லினக்ஸ், Firefox எல்லாவற்றிலும் பாடுகிறது. Raaga லினக்சில் மக்கர் செய்யும். Realplayer plugin போடு என்று அழும் !

தளத்துக்கு போய் பாட்டு கேட்டுப் பார்த்து சொல்லுங்களேன்..யார் கண்டார்? தமிழ்ப் பதிவுலகில் இதைத் தொடர்ந்து வானொலிப் பதிவுகள் வந்தாலும் வரலாம். வந்தாலும் நல்லா இருக்கும் தான்.

Raaga, 5 ஆண்டுகளுக்கு முன் எப்படி இருந்ததோ இப்பொழுதும் அப்படியே இருக்கிறது. நுட்ப அளவில் ஒரு மாற்றமும் இல்லை. Youtube போன்ற தளங்கள் நிகழ்படப் பகிர்வுகளை பரவலாக்கியது போல் இந்த தளமும் இந்தியப் பாடல் பகிர்வுகளை பரவலாக்கக் கூடும். கூடிய சீக்கிரம் இந்த தளம் Raagaவை ஏறக் கட்டி விடும் என்பது என் கணிப்பு. பார்க்கலாம்.


பி.கு.
1. இந்த இடுகையை நீங்கள் திறக்கும்போது தானாகவே பாடத் தொடங்கி விடும். இது போல் அல்லாமல் பயனர் விரும்பி பாட வைக்க musicplug நிரலில் autoplay=true என்பதை false என மாற்றிக் கொள்ளுங்கள்.
2. தமிழ்த் திரைப்பாடல்களை துல்லியமாக, எளிதாகத் தேட ஆன்ந்த் ஒரு நிரல் உருவாக்கி உள்ளார். தகவலுக்கு நன்றி, மு.கார்த்திகேயன்.

தொடர்புடைய இடுகை:

வலைப்பதிவில் ஒலிப்பதிவு இடுவது எப்படி?

திரும்பத் திரும்ப பார்க்கும் திரைப்படங்கள்

சின்னப் வயசுல விரும்பினாலும் விரும்பாட்டியும் விதி, சம்சாரம் அது மின்சாரம் பட கதைவசன ஒலிநாடாக்கள் வீட்டிலோ பக்கத்து வீட்டிலோ ஓயாமல் ஓடிக் கொண்டிருக்கும்..

நிறைய படங்கள் நல்லா இருந்தாலும் சில படங்கள் தான் அலுக்காம திரும்பத் திரும்ப அலுக்காம பார்க்க முடியுது.. வளந்த வயசுல ரஜினி படங்கள் அப்படி அலுக்காமல் பார்த்தது.. சன் தொலைக்காட்சி புண்ணியத்தில் பாட்ஷா படத்த நிறைய தடவை பார்த்திருக்கேன். கில்லி, பிதாமகன், காக்க காக்க இதெல்லாம் திரையரங்கிலயே மூணு முறைக்கு மேல பார்த்தது.

தமிழ்ப்படம் எல்லாம் மண்டை காஞ்சு இந்தி, தெலுங்கு-ன்னு போக ஆரம்பிச்சப்ப சில அருமையான மசாலா படங்கள் கிடைச்சுச்சு..

பொம்மரில்லு – ஜெனிலியா, பாடல்கள், பாசம், இளமை, திரைக்கதைக்காக இந்தப் படம் என் திரைல ஓடுது, ஓடுது, ஓடிக்கிட்ட்ட்டே இருக்கு..! தமிழ்ல சந்தோஷ் சுப்ரமணியம் என்ற பேர்ல வந்திருக்கு. தெலுங்குப் படத்தைப் பார்த்த பிறகு தமிழ்ப் படத்தைப் பத்து நிமிடம் கூடப் பார்க்க முடியல.

அத்தடு – தெலுங்குப் படம் – இதப் பார்த்த அன்னியில இருந்து மகேஷ் பாபு ரசிகர் ஆகியாச்சு..தமிழ்நாட்டு நாயகர்கள்ட்ட கூட வராத ஏதோ ஒரு ஈர்ப்பு இவர் கிட்ட இருக்கு.. இது வரைக்கும் 20 தடவைக்கு மேல பார்த்திருப்பேன்.. இந்த படத்துல தனிச்சு சொல்லன்னு இல்லாம மொத்தமாவே ரொம்ப பிடிச்ச மசாலா படம். தமிழ்ல நந்துஎன்கிற பேர்ல வந்திருக்கு.

தூம் – 2 – அண்மையில் தமிழ் மொழிமாற்றப் படம் பார்க்கப் போய் செம சிரிப்பு. இந்தியில பார்த்தாலும் சிரிப்பு தான்னாலும் தமிழாக்கம் கலக்கல்.

Children of heaven – இரானியப் படம் – இது நான் மட்டும் இல்ல உலகம் முழுக்க உள்ள திரைப்பட ஆர்வலர்கள் விரும்பிப் பார்த்துக்கிட்டே இருக்க படம். இந்தப் படம் பிடிக்காட்டி அவன் மனுசனே இல்ல.. இது வரை பார்த்திருக்காட்டி அவன் திரைப்பட ரசிகனே இல்ல.. அலி, சாரா பாசக் கதைய பார்த்துக்கிட்டே இருக்கலாம். மனம் சோர்வா இருக்கப்ப அந்த வெள்ளந்தி முகங்களைப் பார்த்தா நூறு சாமியப் பார்த்த மாதிரி.. கண்டிப்பா பார்க்க வேண்டிய படம்.. இது வரைக்கும் ஒரு 25 தடவை பார்த்திருப்பேன்.. ஊர்ல ஆங்கிலமும் தெரியாத இரானிய மொழியும் தெரியாத தங்கைகளுக்கும் இந்தப் படத்தை புரிந்து விரும்பிப் பார்க்க முடிந்தது.. அப்ப இதோட மொழி என்ன? காட்சி மொழியில் ஒரு அருமையான திரைப்படம்.. படத்த பார்த்தா தான் புரியும்.. போக்கிரி விஜய் குடலை உருவி மாலை போடுறத எல்லாம் சோளப் பொறி சாப்பிட்டுக்கிட்டே பார்க்கிற ஆட்கள் கூட இந்தப் படம் பார்க்கும்போது அலி, சாராவின் சின்ன வலிகளுக்காக மனம் பதறுவாங்க.. அது.. படம் !

சச்சின் – 2005ல விடாம வீட்டுல dvdல ஓடுன படம். இந்தப் படம் திரையரங்குல ஏன் ஓடலன்னு இன்னி வரைக்கும் எனக்கு புரில.. இத நான் போட்டுக் காமிச்ச எல்லாருக்கும் பிடிச்சிருக்கு.. இந்தோனேசியா நாட்டு நண்பன் கூட ரசிச்சுப் பார்த்தான்.. tamitorrents தளத்துல அதிகமா பதிவிறக்கப்பட்டிருக்கு.. இருந்தாலும் ஓடாதது விஜய்க்கு வருத்தமா தான் இருக்கணும்.. ஒன்னு இரண்டு நல்ல நேரடிப் படத்துல அவர் நடிக்கலாம்னு நினைச்சாலும் நம்மாளுங்க விட மாட்டாங்க போல.. இது குஷி படம் மாதிரி மேம்போக்கா பலர் சொன்னாலும் அத விட பல மடங்கு என்ன ரசிக்க வைச்ச படம் இது. 30 தடவையாச்சும் பார்த்திருப்பேன்.. ஜெனிலியா, விஜய் இரண்டு பேர் பாத்திரப் படைப்பு, இசை, வடிவேல் நகைச்சுவை, ஒளிப்பதிவு எல்லாம் ரொம்பப் பிடிச்சது. மனசை லேசாக்கிற படம்.

பழைய Paper கவிதைகள் – கனவு !

விழித்துக் கொண்டே இருக்கிறேன்,

கனவுகளில் நீ வரும்போது,

உறங்கிவிடக்கூடாது என்பதற்காக.

உன்னை

நல்ல குடும்பத்துப் பெண் என நினைத்திருந்தேன்.

எப்படி அனுமதிக்கின்றனர் உன் பெற்றோர்?

இப்படி இருட்டிய பின்னும்

கனவில் வர?

கும்மிருட்டு நிரம்ப பயம் எனக்கு.

உன் படுக்கையறை விளக்கை அணைக்காதே.

வருவதாய் இருக்கிறேன் இன்றிரவு,

உன் கனவில்.

உன் ஒன்றுவிட்ட சித்தப்பனுக்கெல்லாம்

பயந்து பயந்து

உன்னை சந்தித்தது போதும்.

கொஞ்சமாவது உறங்கிப் பழகு.

கனவில் வருகிறேன்.

பழைய Paper கவிதைகள் – பிரிவு !

சொல்லாமல் ஊருக்குப் போன நீ

சொல்லிக் கொண்டு

செத்தாவது போயிருக்கலாம்.

உகாண்டாவில் வெயில் அதிகம்.

கவுண்டம்பாளையத்தில் வழிப்பறி.

மூன்றாம் உலக நாடுகளில் வறுமை.

எதன் பொருட்டு பார்க்க வந்தேன் என வினவும் உன் அம்மாவிடம்

வேறு என்ன சொல்லச் சொல்கிறாய்?

மனசு வலிக்குதுன்னா?

விரட்ட விரட்டத் திரும்ப வரும்

உன் நாய்க்குட்டியை விட

வெட்கங் கெட்டதாயும்

உண்மையானதாகவும்..

உன் நினைவுகள் !

தாமதமாய் வரும் மழைக்கும் கூட

வலிக்குமோ என பச்சை காக்கும் புல்வெளி

என் நேசம்.

கதீஜா சுஜாதா எல்லாம்

__தா என்றே வாசிக்கிறேன்..

என்ன நினைவு இருக்கக்கூடும் உனக்கு?

ரவிசங்கர் ஓர் இசை மேதை

என்பது தவிர.

காதல் தோல்வியென்றால்

தாடி வளர்ப்பதில் எல்லாம்

உடன்பாடில்லை எனக்கு.

வேண்டுமானால் வளர்க்கலாம்,

மூளையை.

இன்றோ நாளையோ

“அவளோட உன்ன பார்த்தேன்..தொலைச்சுப்புடுவேன் (நாயே)!”

என்றுன்னப்பன் குரைக்கக்கூடும்.

தயாராய்த் தான் இருக்கிறேன்.

நீ

மான்குட்டிக்கும் முயல்குட்டிக்கும் பிறந்தவள்

என்றொருமுறை பிதற்றியதை

நினைத்துச் சிரிக்க.

யாரும் வரும் வரை

தனித்திருப்போம்

நானும் கடற்கரையும்.

உயிரோடு புதைப்பது பெருங்குற்றம்.

தண்டனை மட்டும் கிடையாது.

எந்த நாட்டுப் பெண்களுக்கும்.

கண்ணீர் கட்டி வைக்க

கடல் வெட்டி வைத்தேன்.

கப்பல் விட்டு

வேடிக்கை பார்க்கிறாய் நீ!

பசி தூக்கம் மறந்து

காதல் வளர்க்கிறேன்.

எதை வளர்க்க என்னை மறந்தாய்?

உன்னை குற்றம் சொல்லவும் கூடாது தான்.

ஒரு முறை நீ நினைத்ததற்கே

என் தூக்கம் போனது..

எத்தனை முறை உன்னை நினைத்து இருப்பேன்..

நீ செத்தும் போயிருக்கலாம் !

முதல் சந்தோஷமோ கடைசி துக்கமோ

முதலில் சொல்வேன் உன்னிடம்.

புதிதாய் பிறந்த பட்டாம்பூச்சியோ

மகனை இழந்த கண்ணீரோ

உனக்காய் வைத்திருப்பேன்..

எப்பொழுது வருவாய் நீ?