இலக்கண அடிப்படை தமிழ் சொற்திருத்திக்கான வரைவு

Due to time constraints, I am posting the draft in English. This idea of a grammar based spell checker for Tamil was proposed by Mauran and drafted by me in Thamizha! group but yet to be materialised. I welcome all Tamil computing enthusiasts to help realise this project.

I see an immediate possibility to come up with a grammar based spell checker for Tamil. Such approaches are there in other languages also but they do it usually by statistical occurrences of regular mistakes rather than on a rule based approach. Based on our current human resources and immediacy of the issue, we can do a grammar based rule approach.

This approach would virtually eliminate all typos in Tamil if not the spelling mistakes..

Here is what we need to do.

1. compile a database of letter sequences in Tamil in that are not grammatically allowed.

It can be done as follows –

1a. Compile a 247×247 matrix for Tamil letters and remove the allowed combinations and upload the rest to the database.

for example –

அஅ – spelling mistake
அஆ- spelling mistake
அஇ- spelling mistake
அஈ- spelling mistake

..and so on for அ against all 247 Tamil letters. upload the spelling mistakes to the database and leave the rest.

Repeat this procedure for each of the Tamil letter against each of the Tamil letter..

1b. To address the issue of சந்தி, we create a rule that is similar to the one below..

ச்+space+ச, சா, …சௌ – may not be a typo or spelling mistake and hence we don’t add it to the database.
ச்+space+any other letter except (ச, சா, …சௌ) is a spelling mistake and hence we add it to the data base

and repeat the procedure for க், த், ப்

1c. to address the issue of ஒற்றெழுத்து, தொடக்க எழுத்து we create rules as follows:
space+உயிரெழுத்து = allowed
space+மெய்யெழுத்து = spelling mistake and add it to the data base..here a point to be noted is that space+மெய்யெழுத்து can occur for non-Tamil words and names and we give it as a hint in the error message.

and create rules for உயிரெழுத்து+space, மெய்யெழுத்து+space, உயிர்மெய்யெழுத்து+space, space+உயிர்மெய்யெழுத்து on a case by case basis. It is to be noted that உயிரெழுத்து+space can occur in poetic instances.

People like me, mauran can take responsibility for creating the above said matrix, rules and checking them..or i can do it myself completely if Mauran has time constraints..The guideline needed is in what file format, text format should this database be created so that it is readable for the Firefox extension, or any word processor? I need technical guidelines on these aspect.

2. Now this database is to be converted into a Firefox extension.

Things to do here –

the regular dictionaries in Firefox or word processors compare the input word in the database and if it is not there then announces it as a spelling mistake. But our approach should do the inverse. If this needs a completely new dictionary script to be written, then the technical people like Mugunth, Sethu, Sundar can help.

After creating such script the database should be embedded in it and the extension should be uploaded to Firefox repository or from a private site initially.

Care should be taken that besides creating a Firefox supported dictionary we do this in order to support any word processing application..

ஒருங்குறி குறியாக்கத்தில் தமிழில் தோன்றும் வழுக்கள்

இன்று ஒருங்குறி குறியாக்கத்தில் அமைந்த தமிழ்த் தளம் ஒன்றில் Firefox உலாவி கொண்டு தேடுகையில் பின்வரும் வழுவைக் கண்டேன்.

உண்ட என்று தேடினால் உண்டு, உண்டான் உண்ட் என்ற எல்லா உண்+டகர வரிசைச்சொற்களையும் காட்டுகிறது. ஒருங்குறி குறியாக்கத்துக்கு  டா, டு, டி இவையெல்லாம் வேறு வேறு எழுத்துக்கள் என்று தெரியவில்லை. 

ஒருங்குறி குறியாக்கம் கணினியில் தமிழைக் காட்ட உதவும் அளவு கணித்தல் வேலைகளைச் செய்ய உதவவில்லை. எடுத்துக்காட்டுக்கு, திருக்குறளில் எத்தனை இடங்களில் உண்ட என்று வருகிறது என்று கணிக்க வேண்டுமானால் ஒருங்குறி குறியாக்கம் உதவப் போவதில்லை. match whole word என்று சொன்னால் தான் கொஞ்சமாவது துல்லியமான முடிவு கிடைக்கும். அதுவும் செய்யுள்களில் உரைநடை போல் ஒவ்வொரு சொல்லும் தெளிவாக முடியாமல் அடுத்த சொல்லுடன் இணைந்து இருக்கும் என்பதால், match whole word பல இடங்களில் உதவாமல் போகலாம்.

ஒரு ஆவணத்தில் பல இடங்களில் உள்ள ஒரே பிழையைக் கண்டு replace all கொடுக்கும்போதும் சிக்கல் வரும். எடுத்துக்காட்டுக்கு,
உண்ட உண்டு உண்டா என்று எழுதி

உண்ட வரும் இடங்களில் எல்லாம் உண்டா என்று மாற்றச் சொன்னால்,

உண்டா உண்டாு உண்டாா என்று தான் மாற்றங்கள் வரும்.

இந்த இடத்தில் match whole word only என்று கொடுக்க மறக்காமல் இருந்தால் சரியான முடிவுகள் வரும். ஆனால், இதுவும் செய்யுளில் உதை வாங்கலாம்.

ஒருங்குறி் குறியாக்கத்தில் தமிழில் தோன்றும் வழுக்கள், போதாமைகள் குறித்த அதிகாரப்பூர்வ விளக்கங்கள் இங்கு.

இந்தப் போதாமைகளில் சிலவற்றை வேறு இடங்களிலும் பார்த்த நினைவு. ஆனால், ஒரு குறிப்புக்காக இங்கு பதிகிறேன்.

தொடர்புடைய சில இடுகைகள்:

* ஒருங்குறிச் செருப்பு.

* கீதா கயீதா ஆன கதை.

* தமிழ் ஒருங்குறி – தேட்டைச் சிக்கல்

* தமிழ் எழுத்துக்கள் வரிசைப்படுத்தல்.

திரட்டிச் சார்பின்மை!

தமிழ் வலைப்பதிவுகளை வாசிக்க தற்போது கூகுள் திரட்டி பயன்படுத்துகிறேன். இதனால் வந்த நன்மைகள்:

1. பிடிக்காத, தலைவலி தரும் வலைப்பதிவுகளை நாம் விரும்பாவிட்டாலும் பார்த்துத் தொலைக்க வேண்டியதில்லை. அவற்றை நீக்கச் சொல்லி யாருக்கும் எழுதிக் காத்துக் கொண்டிருக்கத் தேவை இல்லை.பிடித்த பதிவுகளை மட்டும் தான் சேர்த்துக் கொள்ளப்போகிறோம் என்பதால் பிடிக்காத பதிவுகளை நீக்கும் வேலை இல்லை.

2. எவ்வளவு நாள் ஆனாலும் நம் விருப்ப வலைப்பதிவுகளைத் தவற விடாமல் எளிமையாகப் படிக்கலாம்.

3. பின்னூட்டக் கயமையில் ஏமாந்து மொக்கைப் பதிவுகளைப் படிக்க வேண்டியதில்லை.

4. ஒவ்வொரு தளமாக சென்று பார்க்காமல் அனைத்து வலைப்பதிவுகளையும் ஒரே இடத்தில் முழுமையாகப் படிக்க முடிகிறது.

5. வலைப்பதிவுகள் மட்டுமல்லாமல் ஆங்கில, தமிழ் இணையத்தளங்களின் செய்திகளையும் கூட ஒரே இடத்தில் படிக்க முடிகிறது.

6. பதிவுகளை நாம் விரும்பும் துறை வரிசை, கால வரிசையில் படிக்க முடிகிறது.

7. அருமையான, எளிமையான தள இடைமுகப்பு. கூகுள் வழங்கியின் வேகம்!

மொத்தத்தில் நான் விரும்பிய பதிவுகள், தளங்களை நான் விரும்பும் வகையில் யாருடைய திணிப்பும் சார்பும் இல்லாமல் எளிமையாகப் படிக்க முடிகிறது. நான் எதைப் பார்க்க நேரிடும், படிக்கிறேன் என்பதை நானே தீர்மானிக்கிறேன்.

தமிழ்மணம் சில சமயம் வழங்கிக் கோளாறால் செயல் இழந்த போது, “கை, கால் ஓடவில்லை” என்று சொல்லும் அளவுக்கு சிலர் ஒரு திரட்டியைச் சார்ந்து இருப்பவர்களாக இருக்கிறார்கள். கூகுள் திரட்டி போன்ற தன்விருப்பத் திரட்டிகளை உருவாக்கிக் கொள்வது இதைத் தவிர்க்கும். Tamilblogs, தேன்கூடு, தமிழ்மணம் ஆகியவை தங்களிடம் இணைக்கப்பட்டுள்ள பதிவுகளின் முழுமையான விவரம் அடங்கிய OPML கோப்பை வழங்குவது நல்ல முன்மாதிரியாக இருக்கும். தற்போது தேன்கூடு இத்தகைய OPML கோப்பு வழங்குகிறது. ஆனால், இது முழுமையானதாகத் தோன்றவில்லை.

தமிழ்மணத்துக்கு என் புதுப்பதிவுகளை அனுப்பிக் கொண்டிருந்த போது இருந்ததற்கும், தற்போது எந்த ஒரு திரட்டியையும் சாராமல் வலைப்பதிவதற்கும் உள்ள வேறுபாட்டை எண்ணிப் பார்க்கிறேன்.

1. முன்பு தொடர்ந்தாற் போல் வரிசையாக இடுகைகளை இட மாட்டேன். காரணம், தமிழ்மண முகப்பில் ஒரு இடுகை மட்டுமே பெரிதாகத் தெரியும். அடுத்தடுத்த இடுகைகள் ஒரு வரி இணைப்பாக மட்டுமே தெரியும். இதனால், ஒரு இடுகைக்கு கிடைக்கக்கூடிய கவனத்தைக் குறைக்கக்கூடாது என்பதற்காக காத்திருந்து அடுத்த இடுகையை இடுவது வழக்கம். வார இறுதிகளில் இடுகைகளை இட யோசிப்பேன். காரணம், இந்நாள்களில் வாசகர் வரவு குறைவாக இருக்கும். அதையே திங்கள் கிழமை இட்டால் அதிகம் பேர் வருவரே என்று யோசிப்பேன். போலி டோண்டு, சல்மா அயூப் என்று தமிழ்மணப் புயல்கள் அடிக்கையில் நல்ல இடுகை போட்டால் காணாமல் போய் விடுமே என்று காத்திருந்திருப்பது உண்டு. இல்லை, நல்ல இடுகை போட்டாலும் போதிய கவனம் கிடைக்காதது போல் தோன்றும்.

சில சமயம் பின்னூட்டங்களையும் உடனடியாகவோ வரிசையாகவோ பதிப்பிப்பதில்லை. இதனால், அண்மையில் மறுமொழியப்பட்ட இடுகைகள் பட்டையில் இருந்து கிடைக்கும் கவனம் குறையும் என்பது காரணம். ஒரு வேளை 😉 பின்னூட்ட மழை பொழியும் பதிவாக இருந்திருந்தால், பின்னூட்டங்கள் 40 நெருங்குவது போல் தோன்றினால், நானே பின்னூட்டம் இட்டு கவனத்தை வீண்டிக்க வேண்டாமே என்று பின்னூட்ட உரையாடலை ஒரு செயற்கையான, வேகம் குறைவான, தொடர்ச்சியற்ற முறையில் கொண்டு சென்றிருப்பதற்கும் வாய்ப்பு உண்டு.

இப்பொழுது நினைத்த நாள், நினைத்த நேரம், நினைத்த வேகத்தில் வரிசையாக எந்த மனக்கட்டுக்களும், வாசகர் வருகை குறித்த மனக்கணக்குகளும் எதிர்ப்பார்ப்புகளும் இன்றி இடுகைகள், பின்னூட்டங்களைப் பதிப்பிக்கிறேன். ஒரு நாளுக்குத் துண்டுத் துண்டாக 50 இடுகைகள் இட்டாலும் ஏன் இப்படி செய்கிறாய் என்று யாரும் கேட்கப்போவதில்லை. முறையிடப் போவதில்லை. இதே தமிழ்மணத்தில் இணைந்திருக்கையில் செய்தால், தமிழ்மண வைரஸ் என்று முறையிடப்பட்டிருப்பேன்.

2. முன்பு, நல்ல இடுகை ஒன்று எழுதி இருப்பதாகத் தோன்றினால், அது பூங்காவில் வருகிறதா, வாசகர் பரிந்துரையில் வருகிறதா என்று பார்த்துக் கொண்டிருப்பேன். மெனக்கெட்டு கள்ள வாக்குகள் போடுவதும் உண்டு.

இப்பொழுது வலைப்பதிய மட்டும் செய்கிறேன். வீண் பரப்பு வேலைகளுக்கான உந்துதல் இல்லை.

3. புது பிளாக்கருக்கோ wordpressக்கோ பிற வலைப்பதிவு மென்பொருள்களுக்கோ மாறும் முன்னர் இதைத் திரட்டிகள் ஆதரிக்குமா என்று தயங்க வேண்டி இருக்கும். திரட்டி நிரல்களில் ஏதேனும் குறை வந்தால் அதை சரி செய்ய பொழுது வீணாகும்.

இப்பொழுது நினைத்த வலைப்பதிவு மென்பொருளில் எந்தத் தயக்கமும் இன்றி உடனடியாக வலைப்பதியலாம்.

4. தமிழ்மணத்தில் ஒரு பதிவை இணைக்கும் முன் பதிவு முழுக்கத் தமிழில் இருக்க வேண்டும், மூன்று பதிவுகள் இருக்க வேண்டும் என்று கட்டாயம் சில சமயம் தேவையற்ற ஒட்டுப் பதிவுகளை இட வைத்தது. தவிர, தமிழ்ப் பதிவில் நடுவில் ஆங்கிலத்திலும் எழுத முடியாது.

தற்போது, என் பதிவில் என்ன மொழியில் வேண்டுமானாலும் மாற்றி மாற்றி எழுதிக் கொள்ளலாம். யாருடைய ஏற்பும் அவசியம் இல்லை.

திரட்டிகளைச் சாராதிருக்கத் தொடங்கிய பின், நான் எதை, எப்படி, எங்கு, எப்போது, எவ்வளவு வலைப்பதிகிறேன் என்பதை நானே தீர்மானிக்கிறேன். ஒரு திரட்டியோ அதில் இணைந்துள்ள பிற வலைப்பதிவர்களின் போக்குகளோ இப்பொழுது என் வலைப்பதியும் போக்கைத் தீர்மானிப்பதில்லை. இது ஒரு வகையில் நுட்ப, மனக் கட்டற்றதாய், எனக்குப் பிடித்ததாய் இருக்கிறது 🙂

எல்லோருக்கும் இக்கட்டுக்கள் இருக்க வேண்டும் என்று அவசியமில்லை. ஆனால், புதிதாகவோ விவரம் தெரியாமலோ இருக்கும் பெரும்பான்மைப் பதிவர்கள் தங்களை அறியாமல் இக்கட்டுக்களை இட்டுக் கொள்ளும் வாய்ப்பு நிறையவே உண்டு.

என் கட்டற்ற கணினி, கட்டற்ற கலைக்களஞ்சிய, கட்டற்ற அகரமுதலி ஆர்வ வரிசையில் தமிழ்ச் சூழலில் கட்டற்ற வலைப்பதியும் / வாசிக்கும் வழக்கமும் ரொம்பவும் பிடித்ததாய் இருக்கிறது 🙂

ஒருங்குறி, எ-கலப்பை, விசைப்பலகை – ஒரு குட்டிக் கதை

பலரிடமும் நீங்கள் எந்த விசைப்பலகையில் கணினியில் தமிழில் எழுதுகிறீர்கள் என்று கேட்டால், “எ-கலப்பை” அல்லது “ஒருங்குறித் தமிழ்” என்று பதில் வருகிறது. குறியேற்றம் வேறு, மென்பொருள் வேறு, விசைப்பலகை வேறு என்ற புரிதல் வியக்கத்தக்க அளவில் மிகக் குறைவாகவே இருக்கிறது.

இது குறித்து தெளிவாக, விரிவாகப் புரிந்து கொள்ள மயூரனின் கட்டுரையைப் படிக்கப் பரிந்துரைக்கிறேன்.

தற்போதைக்கு, இது குறித்து எளிமையாக விளக்க ஒரு குட்டிக் கதை / உவமை இருந்தால் நன்றாக இருக்குமே என்று யோசித்துப் பார்த்தேன் 🙂

குறிப்பு ஒன்றை எழுதி, அதை ஒரு பெட்டிக்குள் வைத்துப் பூட்டி, அதை ஊர்ப் பொதுவில் வைத்து விடுகிறீர்கள் என்று வைத்துக் கொள்வோம். ஒவ்வொருவரும் பெட்டியைத் தனித்தனியாகத் தான் படிக்க முடியும்; அதுவும் ஒவ்வொருவரிடமும் சாவி இருக்க வேண்டும். உங்கள் பூட்டுக்கான சாவியை ஒவ்வொருவருக்கும் தர வேண்டிய பொறுப்பு உங்களைச் சேர்கிறது. சாவி இல்லாதவர்கள், நீங்கள் சாவி செய்து தரும் வரை பொறுமை இல்லாதவர்கள் பெட்டியைத் திறக்காமலேயே போய் விடுவார்கள்.

நீங்கள் எழுதும் குறிப்பை மூன்று முறைகளில் எழுதலாம்:

– கரித்துண்டு – தாள் முறை.

– marker பேனா – தாள் முறை.

– fountain பேனா – தாள் முறை.
——————————–
உவமைகள் போதும். இனி உவமேயங்களைப் பார்ப்போம்.
——————————–

தமிங்கில விசைப்பலகை – கரித்துண்டு.

பழைய-புதிய தட்டச்சு விசைப்பலகை, பாமினி விசைப்பலகை – marker பேனா.

தமிழ் 99 விசைப்பலகை – fountain பேனா.

குறியேற்றம் (encoding), decoding – பூட்டும் சாவியும்.

பல்வகைப் பேனா தயாரிப்பாளர் – எ-கலப்பை, சுரதா, தமிழ்விசை நீட்சி.

இப்பொழுது பின் வரும் கேள்விக்கு பதில்களைப் பாருங்கள்:

1. எப்படி தமிழ் எழுதுகிறீர்கள்?

விடை: fountain பேனா / கரித்துண்டு கொண்டு எழுதுகிறேன் என்று சொல்வது போல் தமிழ்99 விசைப்பலகை / தமிங்கிலத் தட்டச்சு விசைப்பலகை கொண்டு எழுதுகிறேன் என்று எளிதாக சொல்லலாம் அல்லவா?

எ-கலப்பை என்பது கடைக்காரர் பெயர். ஒருங்குறி என்பது பூட்டு சாவி பெயர். பூட்டு, சாவி, கடைக்காரரைக் கொண்டு எழுத முடியாது அல்லவா? அது போலவே எ-கலப்பையில் தமிழ் எழுதுகிறேன், ஒருங்குறி முறையில் தமிழ் எழுதுகிறேன் என்று சொல்வதும் தவறு.

2. எந்த விசைப்பலகை சிறந்தது?

<<இது ஒரு தமிழ்99 விழிப்புணர்வு விளம்பரம். ஏற்கனவே தமிழ்99 பயன்படுத்துபவர்கள், இந்த விடையைப் படிக்க அவசியமில்லை 😉 >>

உங்களுக்கு முதன் முதல் எழுதக் கற்றுக் கொடுத்தவர் கரித்துண்டு கொண்டே எழுதக் கற்றுக் கொடுத்தார் அல்லது அவசரத்துக்கு கரித்துண்டு தான் முதலில் கிடைத்தது என்று வைத்துக் கொள்வோம். அதே வேளை தினமும் நீங்கள் பல பக்கங்கள் இப்படி குறிப்புகள் எழுத வேண்டுமானால், இப்படி எத்தனை காலத்துக்கு கரித்துண்டு வைத்து வசதிக்குறைவாக எழுதுவீர்கள் சொல்லுங்கள்? நீங்கள் கற்றுக் கொண்ட முறை பிழை, திறன் குறைந்தது என்று அறியும்போது அதை மாற்றிக் கொள்ள வேண்டும் தானே? கரித்துண்டு மட்டுமே பார்த்தவருக்கு fountain பேனா கொண்டு தாளில் எழுதுவதின் எளிமை புரியாது. பயன்படுத்திப் பாருங்கள். புரியும். தமிழுக்கென சிறப்பாக விசைப்பலகை இல்லாத / தெரியாத காலத்தில், அவசரத்துக்குப் பயின்ற முறை தமிங்கிலத் தட்டச்சு முறை. தமிழுக்கு என்று தனி சிறப்பான விசைப்பலகை இருப்பது அறிந்த பிறகும் கற்கால முறையிலேயே இருப்பது தகுமா?

Marker பேனா கொண்டு தாளில் எழுதுவது கரித்துண்டு கொண்டு எழுதுவதைக் காட்டிலும் எளிது தான். ஆனால், marker பேனா தாளில் எழுதுவதற்காக வடிவமைக்கப்பட்டது அல்ல என்பதை நினைவில் கொள்ளுங்கள். அது போலவே பழைய-புதிய தட்டச்சு முறை தட்டச்சுப் பொறிக்காக வடிவமைக்கப்பட்டது. கணினிக்காக அல்ல. எனவே, தட்டச்சுப் பொறி விசைப்பலகையின் தேவையற்ற வசதிக் குறைவுகளை அப்படியே கணினிக்கும் கொண்டு வர வேண்டும் என்று இல்லை. பாமினி போன்ற பிற விசைப்பலகை முறைகள் கணினியில் உள்ள விசைகள் அமைப்பைக் கருத்தில் கொண்டு வடிவமைக்கப்படவில்லை. அவற்றின் உருவாக்கமும் அடிப்படையும் குறியேற்றங்களைப் பின்பற்றி வந்தது. எனவே, marker பேனா வகையறாக்கள் யாவும் கணினி / தமிழுக்கென தனிச்சிறப்பாக வடிவமைக்கப்படவில்லை என்பதால் திறம் குறைந்தவை என்பதை உணர வேண்டும்.

தமிழ்99 விசைப்பலகை மட்டுமே கணினி விசை அமைப்புகள் / தமிழின் சொல் இலக்கணம் ஆகியவற்றைக் கருத்தில் கொண்டு வடிவமைக்கப்பட்ட புத்திசாலித்தனமான விசைப்பலகையாகும். அதைக் கற்றுக் கொள்ள முன்வாருங்கள்.

3. ஏன் ஒருங்குறி சிறந்தது?

பூட்டின் சாவி தனித்துவமாக இருந்தால், அச்சாவிகள் இல்லாதவர்கள் பெட்டியைத் திறந்து படிக்காமலேயே போய் விடுவார்கள் அல்லவா? ஆனால், ஒருங்குறி என்ற சாவி எல்லார் வீட்டிலும் ஏற்கனவே இருக்கக் கூடியது என்று வைத்துக் கொள்வோம். அந்தச் சாவிக்கேற்ற ஒருங்குறிப் பூட்டை போட்டால், எல்லாராலும் பூட்டைத் திறந்து படிக்க முடியும் தானே? தினம் ஒரு பூட்டு போட்டு மக்களை சாவி வாங்கச் சொல்வதற்குப் பதில், மக்களிடம் உள்ள சாவிக்கு ஏற்ற மாதிரி பூட்டு போடுவது தான் ஒருங்குறி முறை. இதுவே ஒருங்குறி முறையின் நன்மை.


பேனா, பூட்டு-சாவி என்ற உவமைகளை மட்டும் மனதில் வைத்துக் கொண்டால் ஒருங்குறி, எ-கலப்பை, விசைப்பலகை ஆகியவற்றை ஒன்றுடன் ஒன்று குழப்பிக் கொள்ளாமல் இருக்கலாம்.

குட்டிக் கதை சொல்லப் புகுந்து பெரிய கதையாகிப் போச்சு 😉 பரவாயில்லை. நாலு பேருக்கு நல்லது நடந்தா எவ்வளவு பெரிய கதையும் குட்டிக் கதை தான் 😉

எத்தனை பேர்?

இன்று நம்மை நினைத்துக் கொள்பவர்கள் எத்தனை பேர்?

நம் வெற்றிக்கு வாழ்த்துக்கள் மட்டும் சொல்லி விருந்து கேட்காமல், அதைத் தன் வெற்றியாக கருதி அடுத்தவர்களிடம் சொல்லி மகிழ்பவர்கள் எத்தனை பேர்?

நம் இழப்புக்கு வருந்துபவர்கள் எத்தனை பேர்?

எப்படி இருக்கிறாய் என்று கேட்பதற்காக மெனக்கெட்டு அழைப்பவர்கள் எத்தனை பேர்?

அடுத்து நம்மை எப்போது பார்ப்போம் என்று நினைப்பவர்கள் எத்தனை பேர்?

நாம் கேட்காமலேயே தேவையறிந்து உதவுபவர்கள் எத்தனை பேர்?

கடனாகக் கொடுக்காமல், கொடுக்கும் பணம் நமக்கு உதவுமே என்று தருபவர்கள் எத்தனை பேர்? இலட்சக்கணக்கில் தந்த பணத்தையும் ஆண்டுக் கணக்கில் திரும்பக் கேட்காமல் மறந்திருப்பவர் எத்தனை பேர்?

நம் பிறந்த நாள் வர ஆண்டு முழுக்க காத்திருப்பவர்கள் எத்தனை பேர்?

மறக்காமல் நமக்கு மெனக்கெட்டு கடிதம் எழுதுபவர்கள் எத்தனை பேர்? நாம் எழுதிய கடிதங்களை சேர்த்து வைத்திருப்பவர்கள் எத்தனை பேர்?

இப்படிச் செய்தால் நமக்குப் பிடிக்கும் என்று பார்த்துப் பார்த்துச் செய்பவர்கள் எத்தனை பேர்?

நம் காயங்களுக்காக நம்மை விட துயரப்படுகிறவர்கள் எத்தனை பேர்?

கேட்டு வாங்கி நம் புகைப்படங்களைப் பார்ப்பவர்கள், சேர்த்து வைப்பவர்கள் எத்தனை பேர்?

தனக்கொன்று வாங்குகையில் நமக்கும் ஒன்று சேர்த்து வாங்குபவர்கள் எத்தனை பேர்? தனக்கு ஒன்றை வாங்காமல் நமக்காகப் பொருள் சேர்ப்பவர் எத்தனை பேர்?

தனக்கு எது எளிது என்பதைப் பார்க்காமல் நமக்கு எது நல்லது என்று பார்ப்பவர்கள் எத்தனை பேர்?

நோயுற்ற போது உடனிருந்து பார்ப்பவர்கள் எத்தனை பேர்?

நாடு தாண்டியும் நம் திருமணத்துக்காக மட்டும் வருபவர்கள் / வந்து போனவர்கள் / வரப் போகிறவர்கள் எத்தனை பேர்?

ஒரு மன வருத்தத்தில், அகம் பார்க்காமல் தானே முன்வந்து இறங்கிப் பேசுபவர்கள் எத்தனை பேர்?

நமக்கு ஒன்று என்றதும் ஓடி வருபவர்கள் எத்தனை பேர்?

நமக்காகப் பரிந்து பேசுபவர்கள், நாம் இல்லாத இடத்தில் நம்மைப் பற்றி அவதூறு வந்தால், அதற்காக வெகுண்டு பேசுகிறவர்கள் எத்தனை பேர்? நம்மைப் பற்றி நினைத்து இன்னொருவரிடம் சிலாகித்துச் சொல்பவர்கள் எத்தனை பேர்?

நாம் வாங்கித் தந்த சிறு பொருளையும் பொக்கிஷம் போல் வைத்திருப்பவர்கள் எத்தனை பேர்?

நடுநிசிப் பொழுதில் நமக்கு ஒரு கலக்கம் என்றால் தயங்காமல் நாம் அழைத்து எழுப்பக்கூடியவர்கள் எத்தனை பேர்?

நம்மிடம் உரிமையுடன் ஒன்றைக் கேட்டு வாங்க எத்தனை பேர்? கேட்காமலேயே ஒன்றை எடுத்துக் கொள்ள உரிமை உள்ளவர்கள் நமக்கு எத்தனை பேர்?

நம் வெற்றிக்காக, உடல் நலத்துக்காக, நன்மைக்காக வேண்டிக் கொள்கிறவர்கள் எத்தனை பேர்?

நம் உறவினர்கள், நண்பர்கள், நலம் விரும்பிகள் எத்தனை பேர்?

நாம் இறந்தால் அழுகிறவர்கள் எத்தனை பேர்? இடுகாடு வரை வரப்போகிறவர்கள் எத்தனை பேர்? நாட்கணக்கில் அழப்போகிறவர்கள் எத்தனை பேர்? ஆண்டுக்கணக்கில் அழப்போகிறவர்கள் எத்தனை பேர்? நம் இறப்பைத் தாங்காமல் உயிரை மாய்த்துக் கொள்ளப் போகிறவர்கள் எத்தனை பேர்?

நாம் வாழும் வாழ்க்கையின் பொருளாய், பயனாய் இருப்பவர்கள் எத்தனை பேர்?

நம்மை உயிராய் நினைப்பவர்கள் எத்தனை பேர்?

நாம் உயிராய் நினைப்பவர்கள் எத்தனை பேர்?