நான் அறிந்த சில இணையத் தமிழ் நுட்ப ஆர்வலர்கள் பெயரைப் பதிந்து வைக்கிறேன்.
(எந்த வரிசையிலும் இல்லை)
1. முகுந்த் – தமிழா! அமைப்பின் முனைப்பான பங்களிப்பாளர்களில் ஒருவர். இவர் உருவாக்கிய எ-கலப்பை பல தமிழர்கள் கணினியில் எளிதாகத் தமிழ் எழுத உதவுகிறது.
2. மாகிர் – தமிழூற்று – தமிழர்களின் அறிவுச் சுரங்கம் என்ற பெயரில் தமிழிணையம் சார்ந்து பல நுட்பப் பணிகள் ஆற்றி வருகிறார். தமிழ் இணையத்தளங்கள், வலைப்பதிவுகள், விக்கி இயக்கங்கள் தொடர்பில் பயனுள்ள தேடு கருவிகள், வழிகாட்டுக் கருவிகள் உருவாக்கி உள்ளார்.
3. கோபி – இந்திய மொழிகள் பலவற்றுக்குமான ஒருங்குறி எழுது கருவிகள் செய்திருக்கிறார். இது தவிர, பல பயனுள்ள தமிழ் சார் Firefox நீட்சிகள் செய்து தந்திருக்கிறார்.
4. ஜெகத் – இனியன் என்ற பெயரில் இந்திய மொழிகளுக்கான தமிழ் எழுத்துப் பெயர்ப்புக் கருவியைத் தனி உழைப்பில் கொண்டு வந்திருக்கிறார்.
5. Voice on Wings – முகுந்த், கோபியுடன் இணைந்து Firefox தமிழ்விசை நீட்சியின் உருவாக்கத்தில் பங்கு வகித்தவர். விக்கிப்பீடியா, வலைப்பதிவுகள் தொடர்பான Firefox நீட்சிகளையும் உருவாக்கி இருக்கிறார். இவரது அண்மைய உழைப்பு – மாற்று!.
6. மயூரன் – தமிழில் கட்டற்ற முயற்சிகள் எங்கிருந்தாலும் அங்கு மயூரனும் இருப்பார்! தமிழ் லினக்சு, தமிழ் உபுண்டு, தமிழ்க் கணிமை குழுக்களில் இவரது ஈடுபாடு பலரும் அறிந்தது.
7. காசி – தமிழ் வலைப்பதிவுகள் பெருகத் தொடங்கிய போது அவற்றைக் காட்சிப்படுத்தி, கூடிய வாசக வெளிச்சம் கிடைக்க உதவியாகத் தமிழ்மணம் திரட்டியை உருவாக்கினார்.
8. சுரதா – தமிழிணையக் கருவிகளுக்கு இவர் உருவாக்கிய சுரதா தளம் ஒரு களஞ்சியம் போல். இவருடைய சுரதா ஒருங்குறி எழுதி, பொங்குதமிழ் கருவிகளைப் பயன்படுத்தி இராதவர்கள் மிகக் குறைவே.
9. மறைந்த உமர் தம்பி அவர்கள் – இவரது உழைப்பும் உணர்வும் கோபி, மாஹிர் போன்ற பலரையும் தூண்டி விட்டது பெரும் சிறப்பாகும்.
10. மறைந்த சாகரன் என்னும் கல்யாண் – தேன்கூடு, பெட்டகம் என பல நல்ல இணையத்தளங்களை உருவாக்கினார். ஆனால், இவரது மறைவுக்குப் பிறகு இம்முயற்சிகளும் மறைந்தது சோகம்.
11. சிந்தாநதி – பல தமிழ் இணைய முயற்சிகளில் பின்னணியில் இருந்து செயல்பட்டு ஊக்குவித்தவர். இவரது அகால மறைவு பெரும் இழப்பு.
12. முனைவர் A. G. Ramakrishnan – இவரது குழுவினர் தமிழில் எழுதிய உரையைப் பேச்சுக்கு மாற்றும் செயலியைக் கண்டுபிடித்துள்ளனர்.
13. K. S. Nagarajan – NHM writer, NHM converter என்ற இரண்டு அருமையான மென்பொருள்களை உருவாக்கியவர். தமிழில் தற்போது கிடைக்கும் எழுதிகளில் NHM writer மிக அருமையானது. முழு நேரமாகவே தமிழ்க் கணிமைகளில் ஈடுபட்டிருக்கும் இவரிடம் இருந்து இன்னும் நிறைய எதிர்பார்க்கலாம்.
14. சுந்தர் – தமிழ் இலக்கண கணிமை, விக்கி நுட்பம் ஆகியவற்றில் ஆர்வம் உள்ளவர். தானியங்கியாக தமிழ் விக்சனரியில் ஒரு இலட்சம் சொற்கள் சேர்த்தது சுந்தரின் மிக முக்கியமான பங்களிப்பு.
{ 7 comments… read them below or add one }
தொகுத்தமைக்கு நன்றி ரவி.. எல்லாருக்கும் வாழ்த்துக்கள் என்பதைத் தவிர நாம் என்ன செய்திருக்கிறோம் என்ற கேள்விகளையும் எழுப்புகிறது இந்தப் பதிவு..
(இன்றைய நிலவரத்தில், இதைத் தமிழ்மணத்தில் இட்டிருக்கலாம்
)
ஏற்கனவே, உலகில் உள்ள சிந்தனைகள், நுட்பங்களை தமிழ்ச் சூழலுக்குக் கொண்டு வந்ததற்கே இவ்வளவு நன்மை என்றால், தமிழக மென்பொருளாளர்கள், மென்பொருள் மாணவர்களில் ஒரு சிலராவது வாரம் ஒரு மணி நேரம் தமிழ்க் கணிமைப் பணிகளுக்கு ஒதுக்கினால் எவ்வளவோ செய்யலாம். தமிழ்க் கணிமையில் செய்யப்பட வேண்டியவற்றை குறித்து அடுத்து எழுதுகிறேன்.
ரவி.. உங்க பெயரையும் சேர்த்திருக்கலாமே!!!!
தமிழார்வலர் பணி எல்லாத்திலையும் நீங்களும் இருப்பீங்களே!!
மேலே உள்ளவங்க எல்லாம் நுட்ப ஆர்வலர்கள் மட்டுமல்லாமல் அதற்கான நிரலாக்க வினைத்திறமும் உள்ளவர்கள். எனக்கு htmlஏ ஒழுங்காத் தெரியாது
கல்லூரியில் பேசாம கணினி அறிவியல் படிச்சிருந்தா நானும் கொஞ்சம் பங்களிக்க முடிஞ்சிருக்குமேன்னு இப்ப தோணுது..இருந்தாலும், ஓய்வு நேரத்துல php, javaனு சிலவற்றையாவது கத்துக்க முடியும்னு நினைக்கிறேன்.
ஆமா.. ரவி.. நிரல் எழுதுதல் என்பதை விட அதற்கான ஆர்வம் முக்கியம்.. அது உங்களிடம் நிறையவே உள்ளது.. நீங்கள் நிரல் எழுதப் போகும் காலம் வெகு தொலைவில் இல்லை!!! இல்லை!!!!
//எல்லாருக்கும் வாழ்த்துக்கள் என்பதைத் தவிர நாம் என்ன செய்திருக்கிறோம் என்ற கேள்விகளையும் எழுப்புகிறது இந்தப் பதிவு..//
http://poorna.rajaraman.googlepages.com/home
Missed amachu